Xiuluo的ACG、敗家與廢話留言

昨晚與BOC團去觀塘apm倒數，當日出席只有七人，聯絡不到其他團員，再加上倒數後既活動無法執行，已超出我們的預計之外。另外，社長沒有出現少很多歡樂，「社長~~你在那裡呀~~」。



是日名句：
很謎的謎之湯
下一站是......廁所
街坊裝修靚，街坊價錢平

當日約左佢地7:30pm係觀塘等，到左後便上去apm11樓Fun@apm與佢地會合，Fun@apm就係新開既機舖和網吧，佢地係果然打緊機，上到去打左舖太鼓9(當然係涼宮歌啦~)，之後希羅剛剛到，我地便到裕民坊大快活食晚餐。我和小丸叫左個「紅燒雞絲翅+叉燒拼油雞」$36，果然正呀，小迷叫左個鮑汁荷葉飯，陸仔既係焗豬扒飯，小K叫左個聖誕餐??，而若天和希羅都係食左野先出黎。由於小K突然唔舒服，冇胃口食野，只飲橙汁，而其餘食物均由小迷、若天和希羅瓜分，餘下謎之湯，這碗謎之湯果然強而有力，其味道難以形容，經眾人試食後，依然無法形容這碗湯既味道。食完野便到附近機舖繼續打機，小迷和希羅依然打太鼓9，我玩其他音樂Game(Drum Mania、Guitar Freak、Beat Mania等)，打到11:15左右便返回apm等倒數。


回到apm當然要找個好位看到表演台既地方啦，找左好耐，係地下表演台附近找到好位，剛好看到台上，但離表演台較遠。見到好多人都拿著紅色棒(吹氣既)，想知點拿到，不久，見到一位お姉ちゃん(姐姐)派緊呢D野(未吹氣狀態)，各人拿完便吹脹佢，敲打起上來非常之響。不知不覺就快到十二點，各人期待著這一刻既來臨(中途被誤導幾次)，倒數完後，全場既人敲打紅色棒，令到全場氣氛提昇至頂點，全場都熱血起來。後來上層既人將紅色棒拋下，望上去會見到滿天紅色棒，非常之莊觀，當飄到地上，全場既人都踏爆這些棒，令到全場響起有如炮竹之聲，持續響起數分鐘，最後各散東西，而我地去左附近M記休息。

之後我、小丸、陸仔和小K去網吧，而小迷、若天及希羅離開，我地行左好多間網吧都係爆滿，唯有回apm機舖打機，小丸係果度玩扭蛋，$15一次，第一次扭係魚，第二次扭又係魚，第三次扭都係魚，最後放棄再扭，而我係機舖打左舖結他機便離開，乘MTR前當然影返幅三條小魚先啦，小K拿埋腳架出黎影=.=|||，影完便各自回家。我去到家中留下7-11買野，諗住食軟雪糕啦，點知冇晒朱古力味，唯有要雲呢嗱味啦，點知整左比平時大三倍既軟雪糕，用左15-20分鐘才能解決這個軟雪糕。