長青電子報

李志晟牧師封牧就任詞（台）

志晟哥（新竹大專工作者）


議長、特會員及各位牧長同工、兄弟姊妹，大家平安：

　　感謝上帝的恩典，竟然無棄嫌我，允准極其小許的我，封立牧師此個職份。佇過去此兩個月的中間，我一直在思考，就任詞應該怎樣準備，愈準備愈會可體會一開始為什麼我的老父阻擋我獻身的路。

　　也愛感謝上帝佇500年前向加爾文啟示，然後台灣基督長老教會佇台灣設立，互我清楚知影和告白，咱是愛作和解的使者，是普世的，閣釘根佇本地，認同所有的住民，要通過疼及受苦，來成做盼望的記號。

　　感謝上帝佇我成長的家族，揀選我的阿嬤李林年長老，更賜予我一對真疼上帝的父母以及三個姊姊。若呣是佇我九歲彼年阮兜火燒厝，對耶穌基督的信仰是呣是猶原存在佇阮兜嘛呣知。彼場火燒，我攏給人講，彼是阮兜的出埃及記。

　　感謝上帝閣互我有真疼我的契父契母。雖然亻因猶未信基督，總是佇亻因的身上，我嘛會倘感受到上帝對我的疼。

　　感謝上帝允准我佇民和教會成長，有多多疼我的信仰前輩以及同伴。恁對我的提醒、愛疼及祈禱，是我服事上帝真大的幫助。對恁今仔日兩台遊覽車五點對屏東出發，我就知影恁多疼我。

　　感謝上帝佇我成長過程中間安排，教導我的吳和隆牧師、卓宗仁牧師、鄂主成牧師以及田永人牧師，每一個牧師攏是我學習的模範。

　　感謝上帝互我佇大學期間抵到的長青團契的契友，以及聖經神學研究班的同學及輔導，幫助我對聖經產生興趣，認真對聖經內底找求真理。

　　感謝上帝設立台南神學院，有真多老師、學長學姊以及同學，幫助我佇裝備的過程中間，互我真大的鼓勵及支持。

　　感謝上帝安排此六年多以來作夥同工過的每一位大專同工以及部員，閣安排我去印度受訓練，互我的信仰更加長闊高深。

　　感謝上帝安排來團契的學生，每一個學生攏是我學習的對象。因為有上帝，因為有此的學生，互我的生命變作更加意義。

　　列位親愛的兄姐，咱大家今仔日攏是在見證上帝的神蹟。我會倘受封立作牧師，呣是我較敖、較聰明卡厲害；是上帝佇我的生命中間所安排的天使，以及住我生命內底的每一個人，奇妙的大作為。願咱會倘盡咱的一生服事伊，願一切的榮光攏歸互上帝。