蕭艸梅之艸梅垣

落雨彼日，天氣恟恟反冷。田頭圳水無巡，田尾稻花袂媠；菸才剝離，稻期接續，日子免閣疏開。

日頭著還袂落山，那會看無田岸，找無依偎？我無張無持跋入路溝，佇落雨彼日。雨水沃澹路燈，點燾的菸骨猶袂燾盡，怎樣這個黃昏，比一般時過了較緊。

敢是眠夢？若是，安怎袂有清醒。我看著鋤頭變作槍尾刀、圳水溪水轉濁；菸葉稻花染著紅、雞仔鳥仔亦袂赴走閃。

彼日了後，月娘就惦惦毋走，據在風透、無管雨刮，徛佇天邊，陪汝聽候。

已經袂記得菸味，煞親像有鼻著汝煮暗頓的芳氣，只是我的雙腳伸攏袂直、兩蕊目睭撐攏袂開。請免替我驚疑，佇溝底有真濟人作陣；汝睏袂落眠的時，我攏會轉去看汝。

後記：水上機場附近已經真少播田、種菸，總是逐遍經過，攏想著見證者李君瑞先生講起彼段：「一台牛車，阮四個人作伙扛歸十個，『怹』腹肚內腸仔塊走的聲 攏聽會著，阮將『怹』扛去北回，直接囥落溝底疊齊齊，干單用土嵌起來，無閣挖堀仔，埋佇叼位亦袂記啊……。」 2005/01/03

◎〈落雨彼日：為二二八罹難者寄未亡人〉之前的「夫妻作」是〈未亡人：記訪二二八受難者家屬〉。

刊於《台灣日報．台灣日日詩》，2005.2.28

（點選首頁左欄聆聽）