雙倒水別莊 http://blog.roodo.com/senghian/ 母語走反來 tī tsia zh-tw Roodo Blog System All Rights Reserved 〈The Soul of Seediq Bale〉台譯

我bē-hiáu Seediq，所致我是照江自得ê華文詞來譯--ê。

原曲－Atayal(『泰雅』) 古調
改編：拉卡˙巫茂（阿飛）
華文詞：江自得
族語翻譯：Dakis Pawan


細囝喂，我知影講
Tī hit號熱情無受束縛ê日子
恁beh學ē-hiáu一塊歌
為著teh beh hông放bē記--得ê祖靈唱tsit塊歌
Hō͘隨个音符kā祖靈攬kah tiâu~-tiâu
恁tiô跳ê身軀向祖靈跳舞
恁靈魂ê尊嚴親像洘tsu̍t-tsu̍t ê雲--裡ê sih-nah
Hō͘對敵m̄敢對直看--恁

總--是，細囝喂！
恁ê怨恨hō͘天地暗sàm
遠兜ê星mā看bē著--去-ah
啊！Hia-ê星已經沓沓仔hua--去teh落tshē

細囝喂！
恁刀尾ē gàn--人ê光
Hō͘月娘面色死白
恁刀尾kō血
Hō͘暗暝to̍h火燒過暝

細囝喂，恁聽！
Uì樹林仔內底掖--落-來ê聲
是祖靈teh怨嘆
或者是風teh吐大氣

細囝喂，恁聽！
Uì濁水溪流--落­-來ê哭tshueh
是祖靈háu-ng-ng
Ia̍h是雲teh tshngh-iⁿ- iⁿ

細囝喂！
恁看，世界teh bán-tshuah無停煞
恁看，土地tò͘紅hm̍h-hm̍h m̄出聲
恁看，Pusu Qhuni hiauh皮一片一片直透跋

恁摸看māi--leh，恁kō血ê雙手
獵場ê塗沙kám iáu ē捧（phóng）--得
恁摸看māi--leh，恁氣苦ê頭殼額
Lè-táu ê虹橋kám iáu伸ē得thang開
恁摸看māi--leh，恁疑gâi bē定著ê喙
Kám iáu ē-tàng tī逐个季節tàⁿ出話語

細囝喂，恁kám知？
樹林仔內ê松柏子已經tsiâu tī風--裡pit--去hu--去
目屎反tshiō光線ê月娘tsa̍h tī恁赴死ê路--裡
烏phú鬱卒ê雲遮bē離--ê
是ǹg稀微ê星光勻勻仔khîⁿ倚--過ê哀悲

細囝喂，恁kám知？
時間就ká-ná火鬚hiah-nī仔輕
恁靈魂--裡ê星已經點to̍h
恁ê夢親像khóng色ê海洋曠闊
但礙恁靈魂--裡歡喜ê目屎已經枯tâ

細囝喂，恁kám知？
若beh唱祖靈ê歌濟濟艱苦恁tio̍h吞--落
若beh講家己ê話濟濟侮辱恁tio̍h含忍（hâm-jím）
若beh夢想ē tsiâⁿ濟濟缺憾恁tio̍h吞忍（thun-lún）

細囝喂，恁是按怎--ah？
細囝喂，恁thài ē án-ne-siⁿ？ ]]> http://blog.roodo.com/senghian/archives/18886436.html http://blog.roodo.com/senghian/archives/18886436.html 文學 Mon, 06 Feb 2012 11:26:43 +0800 舊詩一首
Uì電子批內底挖--出-來-ê，時間是2007年（或者是koh-khah早）；無題頭。貼tī tsia留底。

(2012-02-05修)

雨滴hiah細
久--來河溪mā漲水溢佈岸
Tshuah流一港一港pui̍h樹水崩山
M̄知
一屑屑仔ê期望
Ē khuann-khuann-á thia̍p做無才調tsih-tsài ê重擔
人lia̍h做感心ê話句
Nǹg入耳khang suah kinn-tsò鎖鍊
Sô-tsò一尾冷ki-ki ê鎖蛇
Sǹg tiàm ām-kún
Ná sǹg ná ân
是你殘忍ê愛--oh
你mî-tsinn-mî-nuā ka-nn̂g ê德行--oh
我ê艱苦飼你得飽足
Kám有按算tī時beh放我suah
]]> http://blog.roodo.com/senghian/archives/18880642.html http://blog.roodo.com/senghian/archives/18880642.html 罔話 Sun, 05 Feb 2012 18:02:35 +0800 流行
敢無人捌問講是啥人咧tshuā頭？就準毋是一个人，上無，嘛kánn有一陣人咧參詳，in「開會」了後，「決定」一个趨勢，in ê決議發消息湠--出-去，逐所在就開始綴in ê喙尾。

若無，是按怎見若講著後一季ê穿插流行啥，或者是這馬按怎裝上時行，tsia-ê專家煞袂十喙九尻川，顛倒是不止仔會齊，對平面雜誌到電子媒體，毋管是西國、日本、東南亞、南美洲，攏看著仝一个「潮流」，全世界出名ê時裝設計師，看法齊（tsiâu）kīng相倚，這，thài有可能？

流行，事實上是資本主義商業運作內底ê一部份，咱知一寡產業技術ê tsáng頭，根本是掌握佇少數彼幾間大公司ê手頭，電子零件佮特殊材料且無講，咱取製藥這項來比論，全世界有一半以上ê新藥，是佇美國申請上市--ê，連德國這个佇歐洲做頭ê工業國家，分--著-ê，嘛干焦是製業產業ê餅幼仔爾爾（較無十份一），若照按呢kā想，流行這號物，後壁牽涉--ê，是啥款ê利益結構佮「決策」機制，恐驚仔就真明--ah。

毋kú，咧做這塊餅分這塊餅ê人（團體），檢采是佇歐洲？

猶會記得，以早，若講一个人穿插真流行，加加減減是講伊真敢穿，無像普通人遐一般，毋過，彼个hippie ê時代已經過；現此時，「流行」煞變做一款「一般」ê現象，時行仝一款款式，時行仝彼幾个色水.....大多數人綴「時行」咧變換穿插，「流行」ê意思嘛無仝--去-ah，在我來看，以早ê「流行」假若（ká-ná）加較有個性。
]]> http://blog.roodo.com/senghian/archives/18862542.html http://blog.roodo.com/senghian/archives/18862542.html 文化 Fri, 03 Feb 2012 21:19:25 +0800 永遠佇--咧ê大尾魚
Big Fish（中文譯做『大智若魚』）是一齣關係講古ê影戲，佇彼內底，事實就是故事，故事就是事實，我按呢講，並毋是講故事有影就是事實，毋過，若咱有--ê，就是干焦故事，正港ê事實崁密無通看見，到一个地步，咱歡喜有故事較贏事實，按呢，故事佮事實，事實上嘛會用得講無啥無仝。

是啦，新歷史主義講咱無可能知影歷史事實，咱咧讀ê歷史，實在是人揀--出-來ê材料，經過某一款立場來詮釋ê故事，若按呢來看，kā故事佮事實抐（lā）抐做一伙，敢猶有遐可惡？

閣較趣味ê是，咱檢采會當kā這齣電影提來佮另外彼齣The Invention of Lying相對比，兩齣戲攏關係著白賊這件代誌，窮實，戲劇本身，就是一款白賊，敢毋是？我想，兩位監督（導演）攏知知--咧，in ê戲（故事）嘛攏有刁工去磕著這點，一齣是用通世界第一齣狀（tsōng）--出-來ê「歷史劇」來表現（逐家都聽甲耳仔仆(phak)仆、愛甲欲害），另外彼齣是用講古ê老爸來比並寫作ê囝（老爸對囝講：「咱無遐（hia）無仝，是我kōo講，你kōo寫爾爾。」）佇Big Fish這齣戲--裡，雖罔無大大典典kā真假揬（tu̍h）破，毋過彼（he）假假真真，弄真狀（tsōng）假到一个地步，煞予戲ê本質嘛沓沓仔咧消溶，予人開始咧斟酌戲內底彼个新婦伊ê法語腔是咧搬戲，抑是伊自本ê腔口。（In翁佇眠床頂應伊講：「我無可能和一个法國查某人tsènn啥mih是loo-bán-thí-khuh。」）這敢毋是戲，毋過弄假佮真實ê界線予人暗靜仔（àm-tsīnn-á）擦消了後，戲煞顛倒變閣較真！

是講，這齣影戲，嘛予我想著一个佇心肝內直直膏膏纏ê問題：「是按怎世間人遮爾仔要意永遠hannh？」 Big Fish內底，彼个老爸欲過往進前，閣著愛囝kā講古，kā講予伊變做溪--裡ê彼尾大尾魚，tsiânn做故事內底ê一个角色，通永遠佇故事--裡活--落-去，這號心態，凡勢有人sannh kah，毋過，我煞感覺彼足sîng一寡致著「大頭病」ê人，in心心念念，就是銜頭、地位、名聲，因為in相信講，遮ê物件，會當予in ê名留踮歷史頂面，號做「歷史地位」，就親像影戲內底ê老爸仝款，佇故事內底tsiânn做永遠佇--咧ê角色，予囝孫仔一喙過一喙，一代傳（thn̂g）一代，直直落--去。（To become immortal as a role in the story.）

哈！Thài會遮爾仔看袂破啦！

且問：是佗一个人捌死，了後轉來kā咱講咱死會kōo另外一款形式「佇--咧」--ah？（No traveller returns, puzzles the will. Hamlet. Shakespeare.）就準咱有靈魂，咱敢就會知影這世間後--來ê發展？（路加福音 16:26「有一條深坑kā咱隔--開。」） 人若死，thài無愛好好仔kā世間ê攏總放予離，莫（mài）閣想講「人有kā我記牢（tiâu）牢--無？」「我ê名有寫佇冊--裡抑無？」（設使死了後閣有法度想兼問來講...）這款執迷，袂輸囡仔去憶著糖仔起tiunn-tuah--咧，實在有夠幼稚！

一般人講「活佇過去ê人」上蓋可憐，若我咧看，「想著死，就硬愛對世間執訣ê人」，就親像狗公見若是壁堵、電火柱，攏愛漩尿做號，彼才是上蓋可悲！（雨一下來，是賰啥mi̍h？世局是千年田、八百主，毋免有天地尾災，就有夠千變萬化--ah！）

死，就死，死了後按怎都毋知--咧，溪水清清，著留予正港ê魚仔去生湠，毋通閣欲激大尾看袂得通開。
]]> http://blog.roodo.com/senghian/archives/18834586.html http://blog.roodo.com/senghian/archives/18834586.html 電影 Mon, 30 Jan 2012 20:38:32 +0800 收冊奴想退悔
自早就有一款歹習慣，想beh有hit本冊tsit本冊koh另外hit本kap hit本，若斟酌kā想，tsit十外冬，冊買規山phiânn，借規山phiânn，印規山phiânn，koh想beh翕規山phiânn，結果--leh，真正有去讀--ê，suah khah無一牛車，ing暗想想--leh，tsit款症頭，無táⁿ-tia̍p bē用得--ah。

Tsīng出社會有趁錢了後，就痟買冊，買冊ê因端，或是因為「想beh」讀，或是因為有人teh風聲，hōo咱感覺「應該」讀，koh有一寡是感覺家己有某mih款欠缺，想beh加強hit方面ê智識，總--是，買--來了後，khah濟是hōo in tī冊櫉仔頂罰徛；讀研究所了後，koh-khah敢死，理論ê冊印十數本...tann，hia-ê冊li-li khok-khok，若beh siàu算，十本檢采讀無三本，結局是搬厝ê時險去hōo冊硩--死，搬kah beh死已經真連回，新siū無tè囤冊，mā只好送--人，無，就是用行李箱仔拖去舊冊店俗賣，想--起-來，無彩錢、無彩工、koh活歹命！

有bat搬厝了後，知影疼--ah，koh來，買冊來囤ê習慣改--起-來，m̄-kú，仝款瘋收冊，自án-ne，ùi學校圖書館借冊借規疊，有讀--無？有--啦！Ke減讀，mā是讀無hia-ê十份一（tsa̍p-hūn-tsi̍t），koh想講，tse冊用借--ê ē到期，無，咱kā翕起來做PDF好--啦。Hioh，均屬（kun-sio̍k）電子檔案無重聲，免驚仔徙siū ê時ē搬kah huah m̄敢，有影--neh，koh有影有翕一寡冊起來收。戇大呆to有影！Tse根本是仝hit號痟病夯另外一款症頭！Án-ne teh翕冊，夭壽tseh-thuah時間！明明嫌無閒thang好好仔讀冊，結果suah koh另外了時間做tsit款大戇工？M̄管是紙本冊、電子檔，講--起-來lóng是仝hit款收冊癖，舞kah hōo家己變做一个「收冊人」，m̄是「讀冊人」。
 
Ē記得bat tī一个老師ê研究室，看著伊冊囤kah無路thang去，tsit款情況，伊當然m̄是特殊ê例，因為咱mā有另外看過冊囤kah koh-khah厲害ê老師，無sio-siâng ê所在，是另外hia-ê老師ē不時坐tī冊桌仔頭前讀冊，逐工讀、不時讀án-ne，若我講--ê tsit位老師--leh，我就tsiok罕得看著伊讀冊，極ke是掀冊來備課、寫論文ê時掀參考冊án-ne，kap hit款骨力讀、綿tsinn讀ê老師tsiok無仝；tse以外，tsit位老師koh ē埋怨講伊冊m̄敢搬轉去厝--裡hē，而且買冊m̄敢hōo in某知，因為冊i無路，in某已經無法度吞忍--ah。

是講，to m̄是tsiok拚勢讀冊ê人，suah買冊囤冊bē輸食moo-hui，kám講，tse是一款疫症（傳染病）？
]]> http://blog.roodo.com/senghian/archives/18827128.html http://blog.roodo.com/senghian/archives/18827128.html 罔話 Sat, 28 Jan 2012 22:28:51 +0800 Blog落運（lo̍h-ūn） 若tī MSN hia ê時間無算，雙倒水別莊taⁿ mā起六冬久--ah，2006年1--月來kah taⁿ，算真有擋頭。

講有擋頭，是uì網路大環境講起--ê，講--起-來，tsit个blog拄起基ê時，káⁿ是blog上tshìng ê時代，行入二十一世紀，Facebook tshuā頭ê微網誌興--起-來，blog也沓沓仔teh落運。

咱m̄免引統計數字或者是研究報告，咱kan-taⁿ看家己身軀邊ê朋友就好。用我家己做例，若是五六冬前，一陣朋友，差不多lóng teh寫blog，也逐家時行tī家己ê blog頂kuân hē朋友ia̍h是tiāⁿ去行踏ê blog ê連結，後--來，用RSS，hō͘ blog變做一个網路sio貫串ê平台。
...繼續閱讀 ]]> http://blog.roodo.com/senghian/archives/18659593.html http://blog.roodo.com/senghian/archives/18659593.html 罔話 Wed, 04 Jan 2012 15:22:40 +0800 關係婚姻


J教授用心紹介covenant kap agreement無仝ê所在，講起自古早用血立約ê慣俗，參婚姻tī基督教內底是按怎bē用得拆分開ê因端，tse，hōo 我koh一擺去揣資料來看，思考婚姻ê源起頭是啥，婚姻tī人類社會--裡，tī無仝ê時代、文化，有啥無仝ê款式，因為我需要整理tsia-ê想法，khah知影家己愛按怎想khah好，啥mih款立場，tsiah是khah妥當--ê （對我個人ê理解出發）。

是--lah！用血立約、背約者死，確實是一寡文化內底ê現象，總--是，tsit个現象，是原始社會內底，tī the law of the jungle下跤，透過結盟求自保ê手段，tsit號手段，kám有超文化、超時代ê共通性或者是重要價值？Covenant hōo人用agreement/contract來替換，是退步ia̍h是進步？是必然ê發展或者是穢惡上帝？Beh回答tsia-ê問題，khah輸直接問講「咱kám有必要hiah "返祖"」（atavistic）？」 斟酌kā想，tse suah kap封建社會（封閉社會）行向文明社會（開放社會）ê脈絡，相連蒂帶（tuà）--neh。

若婚姻--leh，uì爸權發源，為著確認爸系ê後嗣來設立，兼考慮增加生產力kap經濟力（查某人tī古早是查埔人ê財產），若無，就是為著政治kap權力（透過結婚來結盟），現代ê婚姻，早就無古早ê內涵--ah，極ke是「借殼上市」ê新發明，beh tshiû根源講伊有神聖ê源頭，kám m̄是teh騙人騙家己？

咱koh舉一個例：西方文明內底，一夫一妻ê基本框殼，是Saint Augustine ê發明，聖經內底並無頭尾一致ê要求，咱kám知？
]]> http://blog.roodo.com/senghian/archives/18632805.html http://blog.roodo.com/senghian/archives/18632805.html 文化 Fri, 30 Dec 2011 15:56:18 +0800 毋通看伊無 倒爿這張相，是今仔日句法專題半中站下課翕--ê。

Kah tann已經三个箍仔內ê序大（A、L kap T）講做這無路用--ah，袂少人對這款理論tik ê基礎研究攏帶偏見。 

總是，阮相信語言ê運作毋是意識會當掌握--ê，就親像人是按怎會當看見、會當聽見，對聲音，有才調判斷伊來ê方向，彼後壁運作ê原理／原則，咱人無法度直接用淺白ê話開破，因為彼是佇意識下跤ê腦ê運作。 

對囡仔學習語言，in所得著ê材料（刺激）佮發展出語言才調ê速度，咱看著一个奇怪ê現象：刺激無遐夠額／齊全（stimulus poverty），發展煞不止仔緊；若閣加上對語言佮語言中間實拄實觀察會著ê共同性質，語言，應該毋是單純後天ê社會現象，伊有伊先驗／生物ê成份佇--咧。
 
阮相信佇腦科學／認知科學揣著技術／方法對腦內底語言ê運作做直接分析進前，阮會當透過形式／推理／歸納／數學／邏輯ê方式，來揣著語言後壁ê一寡原理原則。 

Einstein佮濟濟理論物理學者，干焦靠一枝筆佮思考，就會當行佇物理實證／實驗ê頭前，看著一寡宇宙後壁ê原理原則，阮形式語言學研究者，透過對語料ê觀察、整理佮形式化ê歸納，參模型ê起造，嘛希望會當行佇語言實證科學ê頭前，提供一寡預測、假設，佮有目識ê想法。 

所以，雖然恁是序大，毋過，我袂因為恁講按呢就放棄我欲做ê研究，恁毋捌，無怪--恁。
]]> http://blog.roodo.com/senghian/archives/18622531.html http://blog.roodo.com/senghian/archives/18622531.html 學術 Wed, 28 Dec 2011 20:55:51 +0800 If you [pi~~] with anyone...
昨暗厝頭家來kā我換電視，換好勢開來試看覓，無張持看著某一个新聞台咧報邱毅參陳致中辯論ê新聞，in引某一个學者ê評論，講tsit場辯論用詞真粗魯，水準蓋低等等，內中，有剪一段陳致中咧批評邱毅ê私生活，來回應邱毅對伊私生活ê攻擊，電視台剪ê hit段，是陳致中講：「你較早開補習班，開甲去［消音］家己ê學生，了後佮某離婚...」，看著tsit款ê處理方式，拍算消音hit字檢采是「kàn」抑是「tshàu」，我想任何看著電視台做tsit款處理ê人，檢采攏會按呢理解。

無想著講，我烏白tsūn，tsūn去較後壁ê頻道，煞拄好看著有一台咧重播規个辯論過程，自按呢，我就那無閒工課，那聽看in兩个人到底是有講啥物，嘛因為按呢，我聽著陳致中hit段ê發言，窮實，伊只不過是講：「你較早開補習班，開甲去"睏“家己ê學生，了後佮某離婚.....」

當時仔，「睏」變做hiah垃圾，著予電視台消音啊？？？

對照下晡seminar ê時，阮做伙讀ê一篇關係不定詞佮自由選擇詞項（free choice item）ê論文，內底拄拄有一句例句，號做：「If you sleep with anyone, I'll kill you.」 若照hit台電視台ê logic，tsit篇句法論文內底例句太put-tóng，凡勢嘛愛kā「sleep」tsit字tsō烏或者是挖空，總--是，按呢敢無傷過khi-khiau？

關係政治人物ê私生活，或者是結婚、離緣，男女交往、用金錢做性交易，事實講，我根本無要意，感情ê代誌、欲佮啥人睏，he是咧行ê兩个人之間愛家己處理、liú-la̍k--ê，毋免別人去家婆關心。總是，佇「睏」tsit字kā人消音ê電視台（做tsit个決定ê人），實在有夠惡毒，在我來看，tse根本是刁工挖空予陳致中跳，人不過是講「睏」，你煞kā人消音，予觀眾誤會伊tshoh啥字眼出喙，若欲比in兩人辯論內容、用語按怎，tsit種媒體，才是正港ê糞埽，敢講毋是！？
]]> http://blog.roodo.com/senghian/archives/18460691.html http://blog.roodo.com/senghian/archives/18460691.html 文化 Thu, 15 Dec 2011 07:58:28 +0800 欲死tōng幌ê大尾紅龍

Tsit站仔歐洲聯盟行衰運，毋但揹債務揹甲哀哀叫，一寡成員國甚至想欲規氣拆分開，無想欲閣繼續結（kat）--落-去，幾若个國家ê民意調查，嘛顯示民間對聯盟ê支持度降低，較愛隨人行隨人ê。

Tse，予我想著--ê，煞是幾若冬前，歐洲聯盟當tshìng ê時，一寡人講tse就是聖經ê讖語欲成（tsiânn）--ah，in koh講歐洲聯盟就是《啟示錄》內底七个頭、十枝角ê大尾赤色ê龍（啟12:3；17:3；17:7），tsia-ê人koh根據「十枝角」，讖講歐盟會有十國，結果，莫講歐盟ê旗仔頂是十二粒星，今仔日ê歐洲聯盟嘛已經楦甲二十七國去--ah，角煞比in tànn--ê有重倍較加。

按呢無--打-緊，歐洲聯盟，並無照hia-ê人講--ê，愈來愈興，尾--ah予歐洲變做新ê羅馬帝國，並且出現一个政治大頭人（對敵基督--ê；Anti-Christ；約一2:18；2:22；4:3；約二1:7），了後介入宗教，變做政治宗教ê大帝國...

歹勢呢，歐洲聯盟這馬ê狀況，是莫裂胸散甲就阿彌陀佛--ah，欲按怎有才調閣較和齊、黏閣較倚，而且出現一个逐國攏聽趁ê頭人咧？

親像講tsit款讖語ê人，有影真gâu畫虎lān，講ê時喙舌轉蓮花，等代誌出破，煞無人出來會失禮，顛倒是過--一-站-仔，就閣另外有人出來吐大腸頭，照時勢變化，講一个新ê古予恁聽，出一个新ê讖語講欲成（tsiânn），按呢咧品講聖經偌厲害拄偌厲害，世局按怎行in早就知知知。

Hennh啦，一半擺仔臆著就品勢頭，臆無著就鼻仔摸咧激啞口（é-káu），有影世界gâu都著。

台北101拄起好無偌久，台北有一間會友成（tsiânn）萬人ê大教會，有人講讖語，講101會倒會崩崩--落-來...tann七冬都也欲過--ah，講會倒ê hit位「先知」，敢捌出來tshē毋是...或者是，欲繼續拗--落-去，橫直無成（tsiânn），就當做毋捌講tsit件代誌？
]]> http://blog.roodo.com/senghian/archives/18439961.html http://blog.roodo.com/senghian/archives/18439961.html 哲學 Tue, 13 Dec 2011 23:25:09 +0800 《置疑婚姻家庭連續體》摘譯

（第2頁）三十歲一下到，就無一項代誌，會比參加結婚式閣較討厭--ê-ah。參加結婚式比參加葬式閣較礙虐蓋濟佇咧：著包禮、著穿甲真pih-tsah、愛紹介家己、交代最近好--無、愛逐家做伙翕相、愛看愛情宣傳ê短片，閣愛閃避某一寡話題，而且，嘛愛假佯誠心祝福一對多敢會用離婚來收尾ê新人，閣著愛參無啥熟似ê人仝桌食飯食酒，食薰--咧煞愛孤孤單單去外口食。參加葬式加足簡單，只要激一个愛哭面、蝦米腰、去邊--a坐--咧就好勢--ah。（李智良，2008:62）

任何一个捌那滾kiūnn那kā朋友佮厝--裡ê人講咱愛--in，毋過就是無想欲參加in ê結婚式ê queer，攏對心肝底實實知影結婚式牽召ê強迫做干證充滿空間紡koh夯ê動力。強迫做干證毋干焦是講你袂用得缺席，（第3頁）閣較重要--ê是這个原始典型ê操演（prototypical performance）會發動閣較豐沛ê「做干證」ê意義。干證社群ê建構，造tsiânn結婚式：干證噷噷（hm̍h-hm̍h），是恬恬仔容允這个結婚式（咱這馬毋出聲，後日就永遠袂使閣出聲--ah）；「咱有在場」這个赤theh-theh、消極tik、有力量毋過煞無自由ê言說行為－－拍算特別是hia-ê hōo婚姻體制排斥放逐ê人ê出席－－就按呢kā婚姻特權ê正當性做認定，嘛kā伊phôo-thánn--起-來。（Sedgwick，1998:95）

頂懸引--ê兩段文字，一段是亞洲ê作家寫--ê，一段是美國ê學者，毋過in仝時說出一个強迫ê機制，hōo婚禮tsiânn做一款指導ê聖諭（sìng-jū），一款按怎交代過去、現在kiau未來ê軌道佇咧會場內底做監視、控制，袂輸攏總ê人佮婚禮干焦有一種正當ê關係，而且足濟話佇tsia袂講--得。結婚式--裡，新郎新娘講「我願意」，窮實和當事者ê心情意願抑動機無hiah大ê底代，英國ê語言哲學家J. L. Austin捌分析講，這句是操演（performative）句，伊毋是用來「描述」事實，是欲「做tsiânn」事實：你著愛根據這號儀式講出「我願意」，才會當tsiânn這个結婚式。閣來，婚禮和宴會--裡ê人客嘛攏愛做伙kā隨人ê性命參感情狀況攏收收--起-來，操演來做tsiânn結婚式定規ê心情、行為和語言，hông強迫來歡喜做干證。

（第5頁） ...對無仝ê觀點來看，真濟queer認為婚姻是會礙著情慾或者是情感ê表達--ê，各樣ê親密形式才有提供咱追求幸福上好ê試驗。總--是，基本上tsia-ê聲齊（tsiâu）hōo對婚姻聖壇直tsông ê人陣崁過--ah。就準有久長ê批評歷史，和濟mí滿失敗ê證據，婚姻猶原是實現愛情ê金羊毛。（Love, 2008:53）

（第6頁） 無的確就若親像Heather Love講--ê仝款：「婚姻和家庭這種制度上ku怪ê特色，其中ê一項，就是in永永有才調hōo制度--裡佮佇制度外口ê人，攏感覺艱苦罪過（kan-khóo-tsē-kuà）。」（Love, 2007:125-139）。
]]> http://blog.roodo.com/senghian/archives/18371951.html http://blog.roodo.com/senghian/archives/18371951.html 文化 Sat, 10 Dec 2011 20:21:36 +0800 閣一款模樣
拜四Siraya語法課，讀著馬太福音第四章，耶穌hōo魔鬼tshuā起lih聖殿頂懸受試，「聖殿」tsit个詞，翻譯者kā翻做「人做敬拜ê kuva」，「kuva」tsit个詞，hām 平平是南島語族ê Cou（鄒）ê「kuba」仝源頭。

Cou ê kuba，是指男子集會所，男子集會所tsit个場所／制度，照老師ê講法，有幾若个台灣ê原住民族採用，比論：Cou、Puyuma（卑南）等等，照文獻，Siraya嘛有tsit个制度。

取tsit个制度ê民族，查埔囡仔若到一个歲數（親像四歲抑六歲），就愛離開老母，去蹛佇集會所內底，過團體生活，佇hia，年歲較濟ê人負責kā in牽教，年歲較少--ê愛順趁，受人差用，等較大漢，有出草成功了後，才有資格娶某生囝。

平平設tsit號制度，有ê集會所並無hōo人一直蹛--hia，毋過親像Siraya tsit款母系社會，查埔人是固定佇集會所徛起--ê，步平並無佮某囝做伙蹛，是有時仔才轉去揣某睏--一-下按呢，著一直到年老（古早三四十歲就算老--ah），才離開集會所，去佮牽手做伙。

Tsit个意思就是：Siraya ê大漢囡仔佮查埔人，是過團體生活，並無親像咱較慣勢按呢，翁佮某、爸母佮囝同徛，tsit世間ê文化多元，佇tsia閣得著一个實例。

接紲躘出玻璃沙漠，補充tsit个例，通（thang）知文化形式、社會制度、家庭組織，並無啥乜「袂改移ê真理」，濟濟社會學家，用一夫一妻、爸母細囝鬥陣來當做一个「正常」ê標準，甚至推（tshui）論講若無按呢，對囡仔ê發展不利，實在是因為in ê淺見、無知，有tsit款想法ê人，敢無欲佮人類學者加交陪--寡，對無仝文化ê內涵佮款式，做較深入ê認捌、了解？
]]> http://blog.roodo.com/senghian/archives/18237755.html http://blog.roodo.com/senghian/archives/18237755.html 文化 Fri, 02 Dec 2011 10:50:10 +0800 躘出玻璃沙漠（下pha） （頂pha佇tsia）

你kám猶kha̍h佇玻璃沙漠？人對你親像咧使兒差kán，愛你按怎穿插，叫你袂使創啥，叫你趕緊去做啥物，行放著親像啥款，毋通變做啥款？

Sian毋通耳空輕，聽人講in有一套無移易ê道理就即時相信。就準是現此時ê基要派，若時間khiú長來看，嘛定定是趨時涉勢爾爾。

舉例來講，目今基督教ê保守派，會使講是tann傳統價值ê守護者，in tsia̍p-tsia̍p kā in所堅持--ê掠做是無綴時代改易ê真理，毋過，翻頭看歷史，咱看--著-ê，煞是另外一个樣相。

In往過捌是君王死忠ê擁護者，壓制君王ê對敵，毋過，今仔日，in講in是民主ê跟綴者；in以早反對避孕，甚至kā掠做是謀殺ê大罪kuà，tann主張講he其實無足要緊；女性佇過去予in當做比男性較低等，毋過人in現此時嘛綴喙咧支持男女平等；烏人做奴ê時代，教會分做兩派，支持奴隸制度ê教會引聖經創世記挪亞酒醉ê 故事，講烏人做奴是上帝ê旨意，廢奴了後，hia-ê教會就攏總恬--去；閣來，新約聖經明明定規查某人著留長頭毛，祈禱佮講道著kā頭殼罩tiâu咧，目今多數ê保守派教會，煞干焦kā tse當做是舊時代特殊ê文化背景，無欲遵守嘛無要無緊；上尾講逐个凡勢對教會歷史--裡ê異端裁判所佮宗教法庭攏有印象，受審了後，hông刣--死或者是活活予火燒--死是定定有ê代誌。教會毋但捌家己執行死刑，佇六○、七○年代hit跤兜，開始沓沓仔有人主張kā死刑廢無，hit當陣濟濟教會徛佇反對廢除死刑hit爿，講he是上帝予統治者ê權力；等廢除死刑tsiânn做世界潮流，變做主流了後，教會都也講píng就píng，引hit仝一本聖經，tann若講著廢sak死刑，大部分ê教會攏會講in自頭就是按呢咧tshiàng明。
...繼續閱讀 ]]> http://blog.roodo.com/senghian/archives/18115005.html http://blog.roodo.com/senghian/archives/18115005.html 哲學 Wed, 23 Nov 2011 20:23:16 +0800 躘出玻璃沙漠（頂pha） 圖書館ê邊--仔是一條鋪石枋ê細條路，路邊ê低樹仔、草仔佮花欉ōm-ōm-ōm，平素時仔若熱--人ê日鬚反照，連玻璃窗仔都tòo一iân青huánn青huánn ê色水，毋過，今仔日uì內底看出去，煞掠準外口咧罩雺，倚近kā看較斟酌--leh，才知是幾若日落大水雨，雨水帶塗沙，kā玻璃噴kah花pa-li-niau，koh看較真--leh，致覺he塗沙ê花草頂頭，另外有黏寡長長、細細片仔ê葉幼仔，內中有「一片」koh頭伸長長，頭殼頂兩枝鬚幌--leh幌--leh，當時仔是刺毛蟲嘛去予風搧起來佇窗仔頂--ah！自按呢，無ti無tang，心情淡薄仔sàm-tām，感覺咱人，kám無親像tsia-ê刺毛蟲？

天已經開--ah，日頭tshiō--lueh，tse玻璃連鞭就會變做通光ê沙漠，hit隻刺毛蟲tham頭骨力趖，煞愈趖愈懸，離伊度活ê水佮草葉ná來ná遠，有影是tsit个環境對伊來講太大太僫得thang理解--ah，除了不管方向koh tshím試koh揣覓，無--者，就干焦會當留佇玻璃頂，等正中晝ê大日虎，kā曝做蟲乾。

毋甘願恬恬曝日hannh--死，愛欲離開tsit片屬佇咱ê世代、咱所佇咧ê所在ê玻璃沙漠，若欲目睭瞌--leh骨力烏白趖，較輸開始kinn絲，歇佇蝶仔蝦內底，發翼股躘飛予家己ê眼界楦闊！等thí翼趨飛ê時，咱自然毋免戇戇仔聽喙，咱會知影慼變，學會曉拄喙，咱無閣乖乖仔順趁，tse毋是單純咧張掇（tiunn-tuah）起khê-khang，是智識，是覺悟，予咱決定欲愛有咱人生ê主權！
...繼續閱讀 ]]> http://blog.roodo.com/senghian/archives/18114935.html http://blog.roodo.com/senghian/archives/18114935.html 哲學 Wed, 23 Nov 2011 20:09:56 +0800 看你咧kún-tsūn

我了解你無想欲白賊，因為教會教你毋通白賊，毋過，教會家己嘛捌白賊，兩千外冬，白賊攏已經毋知練過幾擺--矣，白賊--ê叫人毋好白賊，按呢，你敢閣hiah要緊白賊？

我知影你無想欲白賊，你講聖經內底愛人袂使白賊，總--是，聖經內底嘛講王是上帝所差，毋通反抗，你煞為著王權hông揠倒，民主建立咧拍pho̍k仔；聖經敢無講做奴--ê著好好仔盡奴才ê本份，你煞講奴隸受㪗放是大進步。

你敢無讀著聖經講查埔人是頭，較贏查某，講查埔人毋是為查某人來創造，顛倒查某人是為著查埔人來創造，毋但按呢，為著欲予查某人降服，in攏著留長頭毛，而且愛罩紗仔巾，通做in順趁查埔人佮上帝ê記認.....你敢無讀--著，抑是你對教示就親像食食（tsia̍h-si̍t），食欲揀食，讀聖經嘛會揀讀？

我毋是愛你gâu講白賊，我是欲講，若欲「揀讀」，按呢毋就斟酌「揀」。閣有，若一項教示變甲hiah死性，你想，按呢人講he是真理到底有偌濟可能性？兩千外冬--矣，教會直直修改in對聖經ê解說，而且現此時ê教會，佗一間無咧掠話頭、斬（tsánn）話尾，你煞猶hiah條直，共聖經內底ê字句，當做無通推（tshiu）tshiâu ê戒律，tsit款ê信仰，想予透徹，是真，抑是假--咧？
]]> http://blog.roodo.com/senghian/archives/18074051.html http://blog.roodo.com/senghian/archives/18074051.html 罔話 Mon, 21 Nov 2011 18:23:02 +0800 老，就厚症頭

當原初發覺講，對蹛ê所在行去學校，愛行三、四十分ê時，就決定欲牽一隻鐵馬來騎--ah，雖罔佇台北讀冊ê時，不管時嘛行欲一點鐘對學校轉厝，毋過，he究真是欲倒--去，無趕時間，若是欲去上課，上好時間掠較ân--leh，有伸勼較妥當。

閣再講，竹塹不比台北，佇台北行路來去轉，規tsuā路有人行道，倚車頭有地下街，行--起-來加真放心，若tsia--leh，光復路一段接二段hia，著tshua̍h對高速公路下跤過，經過兩个交流道，車濟無--打-緊，幾若百公尺hiah長，煞無人行道通行，幾若十冬--ah，咱毋知新竹市政府心內咧想啥，均屬咱都毋是在地--ê，貧惰去捶烏豆，行路無利便，咱就踏tōng輪。

學校對面hit間今年才收--起-來ê店，網路頂評價蓋bái，毋過，tann tsit台車就是佇hia牽--ê，hit當陣頭家娘姑情（koo-tsiânn）我買新車，我驚拍毋見，無愛，伊自按呢kā tsit隻人寄賣--ê賣--我，俗是有較俗--lah！而且，舊漚舊相（siùnn），有影袂驚人愛póo--去，就是無想著講，車佮人仝款，老，就厚症頭。

Tsit幾月日，調擋仔無算，干焦換部品，就有勾齒仔（『飛輪』）、鏈仔、一條擋仔內線，共總開六百箍，斟酌kā想，都強欲是買tsit隻車ê價數--ah！按呢，kám有khah省？

今仔早起，騎入去學校，來佇欲起lih人社院ê長崎，變速馬仔切--lueh，煞規个踏空--去，試幾若擺，攏切袂過，無ta-uâ，落車牽上崎...ná牽ná ka̍uh-ka̍uh唸：「Kán！Koh來teh討數--ah...」等e-poo四點外，刁工較早離開圖書館，欲牽去修理，伊煞koh好好，袂輸早起ê代誌自來毋捌發生...

Tsit隻漚古車lī-leh，有影，老，就厚症頭！
]]> http://blog.roodo.com/senghian/archives/17940625.html http://blog.roodo.com/senghian/archives/17940625.html 罔話 Mon, 14 Nov 2011 18:21:40 +0800 The Invention of Lying
暗時看HBO ê The Invention of Lying，一齣蓋gâu訕削ê影戲，就親像有人佇網路頂所講--ê，tsit齣電影主要予咱思考兩點：第一、有白賊ê世界檢采無比無白賊ê世界較bái；第二、編劇佮監督（導演）kā宗教洗面，嘛用戲文kā宗教ê源起頭甚至教主khe kah。關係第二點我就無beh講--ah，橫直我tsit兩三冬對宗教ê批評真濟，人in用he摳洗ê手路，比咱ke真高明佇咧...

關係第一點，較無看著討論嘛較心適ê位仔，是編劇上無透過兩个所在teh點tuh講白賊嘛愛有撙節。故事ê主人家Mark有兩擺機會，會當靠白賊來予伊心愛ê查某囡仔佮伊結婚，總是伊無，一擺是查某囡仔問伊：「有錢koh出名敢就會當改變基因？」閣一擺是佇結婚式內底，逐个問伊講天頂彼个人敢有指示伊佮意ê查某囡仔愛嫁予啥人，伊煞攏無白賊。第一擺無白賊，是因為伊知影白賊無法度改變後--來會發生ê代誌，親像基因遺傳、囝種老爸tsit款；第二擺無講白賊ê起致，戲內底無做交代。毋過，咱約其略臆有伊ê意思：「咱人有愛另外一个人--無，是無法度用“要求”用“命令”--ê。」簡單講，就是Mark伊相信愛情，伊beh愛hit个查某囡仔家已beh愛--伊，毋是因為「某mih款權威」ê關係決定beh嫁--伊。

毋過，咱看tsit齣活動寫真內底關係揀對象tsit件代誌，編劇ná親像無足了解「一般」社會上女性ê想法.....咱提異性戀來討論，對「一般」ê男性來講，確實是親像戲內底按呢，真注重女性ê外表，tse通對基因選擇演化優勢ê角度來分拆，tsit號情況，嘛是自古早就有ê趨勢；總--是，「一般」女性--leh，in要意--ê應該毋是外表／基因，是經濟能力佮社會地位，咱知tse嘛是自古早就按呢--ah。人類學者講tse是因為考慮著beh得著khah濟資源，通利益囡兒佮本身來設想--ê。我想，編劇若有接觸著人類學抑社會學ê研究，就袂kā男婦老幼選擇對象ê觀念規个攏硩佇基因tsit孤一个觀點來看--ah，按呢，會予tsit齣戲閣較符合人類社會ê現實。
]]> http://blog.roodo.com/senghian/archives/17933313.html http://blog.roodo.com/senghian/archives/17933313.html 電影 Sun, 13 Nov 2011 22:18:02 +0800 熱--人ê衫仔裾

毋但（m̄-nā）一擺佇路--裡看著tsit塊牌仔--ah，會有印象，是因為tsit塊公家單位ê牌仔kōo台語寫講「真歹勢！」我咧臆tsit款公家ê告示牌，檢采揣無第二塊。

Hit工閣搪--著，緊kā翕--落-來。

今仔日閣看著tsit張相，心內數念--ê，毋是頂懸ê台文，是hit个下晡光huánn-huánn ê日頭光，kap燒lō會流汗ê樂暢。

毋知是按怎，一直感覺今年ê熱--人走著特別緊，無ta-uâ，kan-tann會當佇記持--裡去tsang熱--人ê衫仔裾（ki）。

「莫（mài）走--啦！心愛--ê...」
]]> http://blog.roodo.com/senghian/archives/17921807.html http://blog.roodo.com/senghian/archives/17921807.html 罔話 Sun, 13 Nov 2011 13:34:59 +0800 雨落tsiah-nī粗
竹塹ê風真透，有時仔無張無持透方時風（png-sî-hong），會乞予吹一下khí-moo蓋bái；毋過，竹塹ê雨比--起-來就無hiah-nī厚，平平佇北部，定定是台北咧落雨，若來佇竹塹，極加烏陰，有時仔出日都有，總講就是tsia袂親像台北不三時都浸踮雨--裡。

是講tsit幾工ê雨竹塹閃無離，一个朋友講，伊佇竹塹讀大學讀四冬，研究所讀冬外--ah，上知影tsia ê天時，若連竹塹都落雨，台灣別所在定著愛落。

我討厭落雨，嘛討厭寒--人，tann，tsit兩項煞kap-kap做伙，是精差溫度猶佇二十度tsit跤兜，無講tsiânn實寒甲佗位--去。

欲暗仔下課，因為鐵馬前輪ê擋仔害--去，孤不將著騎欲半點鐘去修理，可憐學校對面ê店仔前一站仔倒--去，見若欲修理車，攏愛騎tsiah遠，干干仔雨落袂停，等車創好勢，轉--來ê路--裡，閣落甲不止仔粗，出力lop tsiūnn光復路ê長崎，ná lop ná大喙喘氣，雨潑佇面--裡，雨水走入去鼻空，淡薄仔滲入去肺管，以早泅水ê記持雄雄對頭殼底浮--起-來，當時仔騎鐵馬ê感覺會佮泅水tsiah-nī成hannh.....
]]> http://blog.roodo.com/senghian/archives/17900117.html http://blog.roodo.com/senghian/archives/17900117.html 罔話 Thu, 10 Nov 2011 23:15:55 +0800 啥號做物化 Tsit个問題我想蓋久--ah，想罔想，to嘛hênn--leh，無頂真hiau資料來看，也tann干焦會當小喋--一-下，檢采無法度深入，閣內容有濟濟誤tânn也kú-kánn。

毋知tī時開始，不時聽著人kōo「物化」tsit个詞teh做評論，比論in會講透過有肉tshài ê查某囡仔teh tshui銷物件，是kā女體物化；嘛有人講性工作者出賣身體來tsuán食，是kā尊貴ê身軀kap人格物化，一來二去，若照我個人ê解讀，tsia-ê講法ná親像攏牽涉著kā「身體」用做商業行為kap趁食ê家私，設使我tsit款理解無問題，按呢，我煞感覺不止仔疑ngā，想來去倒，想無thang tháu--neh。

咱束結來講：「佇tsit个時代，咱隨人ê身軀，beh按怎有可能mài去hām商業行為kap趁食sio牽連？」就準咱毋是汽車展覽、3C展覽ê show girl，就準咱毋是性工作者，咱kám就無用咱ê身軀teh趁錢？咱ê身軀kán攏參商業行為斷半參tshap？

Beh thài-ē有可能hannh！佇tsit个工商發展ê資本主義社會--裡，啥人有才調家己種作家己食，家己起厝家己蹛，規个hōo工作ê本身參個人ê實際需要sann結合，thang uì tsit款工作hām人本身脫節、顛倒參金錢勾連ê中間脫走--leh？咱出賣家己ê時間、體力、心神，就是beh愛幾萬箍仔ê月給，thang去換食食（tsia̍h-si̍t）、衫仔褲、徛起ê所在、kap做藝量ê項mi̍h，咱佇工課路內底，看頂司使（sái）兒差kán，有時仔閣著予客戶抑頭家倒摳正削，閣較是咒khàng lé罵，咱攏恬恬仔吞忍，身體流汗按怎忝頭不論，心內流血人格受傷不管，想較真--leh，kám有影有比現身軀予人看ê show girl抑是出賣身體ê性工作者較高尚？Kám tsiânn實按呢就較有贏面？若有，請恁kā我拆白！

當然，咱人類ê社會行甲tsit个坎站，無啥可能目一nih變做規个無仝ê款式，也我講頂懸tsia-ê代誌，毋是beh講予恁逐个刺鑿，嘛毋是beh使唆恁peh起來kap啥人捙拚，我beh講--ê，獨獨是：既（kah）若社會有階級ê精差，既若專業分工已經tsiânn做事實，既若金錢已經變做社會運作無法度缺欠ê媒體，咱啥人有才調予家己ê身軀、人格參靈魂對頭到尾自由、自主，毋免為著生存來委屈家己（出賣身體、加加減減人格受損斷）？咱啥人有法度予工作佮本身ê需要完全結合，拒絕金錢介入造成「異化」？假使咱頭前tsit幾个「基本目標」to做袂到，按呢，咱beh用「物化」來評論啥人、啥貨抑啥款頭路ê時，kám無beh先想看咱規年thàng天是為啥mih teh流汗，三不五時氣身惱命有啥mih款ê因端？咱，kám tsāi-tsuí無為著生存，向某mih寡人出賣一部份ê「家己」？若beh kā人戴「物化」ê帽仔，凡勢愛先留一頂予家己，kám毋是？
]]> http://blog.roodo.com/senghian/archives/17761691.html http://blog.roodo.com/senghian/archives/17761691.html 哲學 Thu, 03 Nov 2011 19:17:40 +0800 世界甜 Tsit間果子店tī沙鹿（Sua-lak），車頭出--來直直行，來tī大路正對面就是。

Hit暗，陳憲國老師請逐家食弓蕉，攏總買兩pî，弓蕉芳koh甜，隨人分兩jí，結果koh賰一ngeh，尾--à tu來我tsia，也我自按呢一暗hut三jí弓蕉.....tsit世人kah tann毋捌食弓蕉食kah tsiah-nī夠氣....

翕tsit張相，是beh問逐家，是「世界甜」khah甜，a̍h是「開台甜」khah甜...
]]> http://blog.roodo.com/senghian/archives/17400935.html http://blog.roodo.com/senghian/archives/17400935.html 語言 Thu, 13 Oct 2011 20:26:38 +0800 母親--啊！啉tse苦杯
阮講kioh你是阮ê母親
無容允有人對阮ê愛憢疑
自來阮用歌佮詩kā你呵咾
翕相紀錄你無仝ê面容
...繼續閱讀 ]]> http://blog.roodo.com/senghian/archives/17330253.html http://blog.roodo.com/senghian/archives/17330253.html 罔話 Tue, 11 Oct 2011 12:00:48 +0800 風颱天
【Tsit篇是代擬ê比賽演講稿】

各位評審，在場 ê 朋友，食飽未:

毋知恁對風颱天按怎看法，老實講,我以早是愛甲欲害，tse原因無講恁凡勢嘛攏知，風颱若來，學校佮補習班就免siunn理睬，看是欲踮厝--裡the，抑是欲去外口看電影bóng ûn街，較早捌有一句時行ê話，號做「天頂ê禮物跋落地」，我往過就是按呢咧看風颱--ê，風颱天阮就thang好涼勢仔涼勢。

毋過，風颱天歇睏毋是必然ê道理，若毋信，你看電影院佮百貨公司仝款門開開開，人客窒甲滇滇滇，另外，電視新聞內底，記者閣著刁工tshî風淋雨潦過來泅過去，袂輸咧表演特技，我是看甲飽佮醉，自按呢我決定大漢無愛踮電視台作穡，較免風颱天閣著phe命變猴戲，袂輸齒bín攑咧欲去kā 鱷魚洗喙齒，想攏袂曉台灣ê新聞製作ná會tsiah-nī-á無花字 (hue-jī)。

後--來，我較大漢--矣，才知影，風颱天對濟濟人來講，是親像tsing-piàng hiah-nī-á雄死，有人予風颱拍歹溫暖ê厝宅 (tshù-theh)，財產予風吹--去予水流--去，風颱走--矣，經濟煞oh維持 (î-tshî)，毋知佗位會當徛起，閣較有人是因為風颱來過身，或者是失去心愛ê牽手、爸母、囝兒，想想咧，風颱歇假煞ná親像是建立佇別人ê痛苦頂面，毋才後--來，我無閣hiah-nī-á期待風颱天。

是講，風颱欲來袂問我意見啦。俗語話講:「夏至風颱著出世。」 (Hā tsì, hong-thai tioh tshut-sì) 亞熱帶ê台灣，見若熱--人，風颱免請家己來。閣tsit幾冬，秋天ê小陽春 (siáu-iông-tshun) 若熱--起-來嘛蓋驚--人，都風颱憶著 (it-tioh) 熱，九月了後閣毋肯放咱煞，我想，古早人講「九月颱無人知」(Káu--gueh thai, bô lâng tsai) ê時，絕對想袂到講二十一世紀ê風颱會tsiah înn纏。過去五十冬，十一--月初立冬hit跤兜，就計共(kē-kiōng)有六个風颱行跤到，若地球ê溫度繼續tshìng 懸--起-lih，未來風颱sńg-tng人ê本等恐驚仔會ke閣較gâu，後半冬逐不時都來咧kā咱攪擾。

話講到tsia，袂輸風颱天無一塊好咧，其實嘛毋是攏按呢啦，咱知影講台灣ê溪水愛走東西向，順山勢落崎直sià入海，坐袂定著無足大才 (tāi-tsâi)，著靠水庫囤 (tún) 水才有事使 (ū sū-sái)。換話來講，就是：台灣人若欲水有夠用有夠啉，按呢風颱雨就愛bóng sîn！若規个熱--人攏直直出大日虎，無落較tsiânn mih ê雨，按呢，咱日子嘛會綴咧艱苦。為著欲予水庫止喙焦，風颱天ê時，咱上希望水庫啉了有飽lâ。

上尾--矣，毋知各位敢知影，風颱驚啥?予恁想袂到！當時仔風颱上驚ê就是霆雷公啦！這我無烏白講 oo，人講：「一雷破九颱, 無雷九颱來。」(Tsit luî phuà káu thai, bô luî káu thai lâi.) 意思就是，若定定霆雷，風颱就會驚會畏，所以熱天若不時霆雷公，彼年風颱ê氣勢就無hiah旺。斟酌kā想，tsit站仔熱--人甲tann，ká-ná罕得聽雷公霆--hoonnh，無的確今年風颱會真厚oo，若是按呢，風颱天ê時，希望逐个做伙佇心內祈禱，向望無人因為風颱受著傷害，嘛感謝風颱飼水庫啉水，兼予著磨(tioh-buâ) ê辛勞佮學生仔有一个意外ê假期。

關係風颱天我就講到遮，多謝逐个tsiah-nī斟酌聽!
]]> http://blog.roodo.com/senghian/archives/17313199.html http://blog.roodo.com/senghian/archives/17313199.html 罔話 Mon, 10 Oct 2011 21:20:22 +0800