雙倒水別莊

Tsa-poo gín-á 穿短衫短褲做頭前 tsông--入-來，褲是烏 kap 白 kau-tshap ê 花草，衫 ńg-á 是紅--ê，hit-lō 紅，是過年時 á teh 年 té lui ê lok-á ê 色水，真 hiánn 目 tī-leh。 

Beh án-tsuánn 講躇秋 leh，i ê 枝骨普通，面 mā 無 hit 款 hōo 人 tsi̍t-ē 看就 ē 神--去 ê súi，若 khah tsim-tsiok--leh，koh ē 知 he 抹 kah 厚厚 ê 水粉 ē-kha，有 kuá thiāu-á-tsí 留--落-來 ê khî，m̄-koh i ê 目 tsiu 親像 iap-thiap ê pōng-khang 內底 tshuē 著 ê 羊皮捲，hin 內底有古早古早 ê 神祕文字，beh 開拆源起頭 ê 啟示，huān-sè 你 mā bat tú 過 tsit 種人，究真 koh-khah 大蕊 ê 目 tsiu mā bē 大 kah toh 位--去（面 koh tio̍h 生鼻、khuà tshùi 兼帶耳--leh），總--是 ē 有 1 對目 tsiu，看--起-lih 是水 bâng-bâng，親像 khiā tī 東北角 beh 入頭城 ê 山崙 á 頂看太平洋，無張無 tî，hit phiàn 海 suah suá 來 tī 你 ê 心--ni̍h，khuann-khuann-á leh 起風，ta̍uh-ta̍uh-á beh giâ 泳，koh 看，烏仁 kap 白仁明明明，現現是 2 片白蚌殼 kuân 頂，安 2 粒 kiōng-beh 通光 ê 烏珍珠，tuè i 話句 kap 心情 ê 起落 se̍h ia̍h gô，。

暗頭 á tshia 倒 hit kui 桶 khó-tsut-tsut ê 墨，連山 kiânn kap 天中間，khah iù 絲 ê hâm-sau mā tsiâu 食色湠 tâm，墨 hiàn mua 風閃過關無嚴 gâi ê 窗縫，燒燒麻麻 thîn 入鼻 khang，hu-so 頭殼碗，tsim tsīnn 跤 tsinn 尾，活命樹 khiā 直 ûn-ûn-á 起 tiô，把守 ê Ki-lōo-peng kap 發火焰 ê 劍，kā 磺水 tshiō kah 出味。