哲學分類文章 顯示方式:簡文 | 列表

August 1,2015

若是按怎拄按怎,啥人會想欲...



自來若講著娼妓ê問題,抑是性產業合法化,就會聽著一款講法,號做:「咱呔會無愛予怹有另外ê頭路thang做?若是怹有選擇,啥人會想欲賣肉--leh?」Tsia-ê話,佇無偌久進前,閣佇一齣電視連續劇ê廣告內底聽--著。

就是今仔日無張持去想著tsia-ê話其實怪怪,毋才會來寫tsit篇。毋過,欲講我感覺tse話佗位怪進前,希望逐家愛先有寡背景智識,關係「性產業合法化」佮「性工作者ê工作權佮保障」,tse是真有學問佇--leh-ê,若無經過較深ê討論佮思考,獨獨用直覺咧huâ算,較ke嘛是tsia一空、hia一空,問題了了,也tsit篇無拍算欲餾tsia-ê舊議題,有興趣ê人會用得家己揣資料來消化。
...繼續閱讀

lausenghian 發表於 樂多13:29回應(0)引用(0)

May 4,2013

拄顛倒bái


自本,我想講我做一个誠實个懷疑論者就好,按呢對會起家己个良心,嘛袂使極步顧人怨。毋過,J這站仔出力push我重閣「認信」,予我姑不將著閣用心計較家己个立場,真不幸,伊按呢做个結果,是kan-tann予我對一个懷疑論者,行向無神論者niā-niā.....

Dawkins講了無毋著,設使咱無想欲做極端个懷疑論者(懷疑這世間有任何客觀觀察个可能性),按呢,照理性,任何代誌攏是會當透過機率佮證據來做出選擇个,無欲看機率佮證據,就講家己是「誠實个懷疑論者」,事實上是咧家己騙家己,這號講法是夯順風旗、不止仔無負責任。

lausenghian 發表於 樂多18:41回應(0)引用(0)

February 3,2013

賺食ê法度


前我bat寫一篇〈啥物號做物化〉,昨hng暗beh睏進前,koh tī網路頂看著講tann有bē少khah細牌ê má-toh ia̍h是藝人,hōo好額人包飼,koh講25歲以下ê khah有行情,若生媠,一月日有thang提二三十萬ê所費,khah大牌--ê,一月日tsiânn百萬khah ke to有。

文章內底koh講著一个例:一个香港ê má-toh,hōo一个台灣生理人用十五萬倩伊陪食暗,結果伊hông落藥眩倒了後kā強,伊真毋甘願,對法院告,tsit件代誌,另外一个má-toh煞kā剾洗講:「滿面錢貫痕(muá-bīn tsînn-kǹg-hûn),想mā知提人十五萬thài有可能陪人食飯就準煞。」 Koh,一寡hông包飼ê少年查某囡仔講in mā是孤不而將,學校畢業月給兩萬thóng,日子歹過、現實tio̍h約量(iok-liōng),艱苦--幾-冬-仔,就ē-tàng一世人免koh為著食穿煩惱,啥人無愛!?若毋是為著錢伯--à,tsī-tsuī甘願參hia-ê有歲koh bái猴ê查埔睏--leh?
...繼續閱讀

lausenghian 發表於 樂多11:38回應(0)引用(0)

January 23,2013

性別、男女



凊彩提一本社會學ê冊來掀,就會發覺講「性別」tsit个詞tī英語有兩个對應:一个是gender,koh一个是sex。頭前tsit个是「社會tik、文化tik」ê男女區分,後壁tsit个tsiah是先天(sian-thian)--ê、生理頂懸ê構造差異(tsha-ī)

檢采早就有專家teh設想beh按怎佇咱ê話來分拆tsit兩个無仝ê觀念--ah,佇看著專家ê建議進前,拙者就取「男女」來指gender,用kōo「性別」來指sex。
...繼續閱讀

lausenghian 發表於 樂多11:14回應(0)引用(0)

November 8,2012

從犯


咱人對結構性ê罪惡,著愛有啥mih程度ê回應,tsiàⁿ有資格無hông當做「從犯」?或者是tsiàⁿ有資格uì道德責任卸身離--leh?
 
若是無主動參與佇hin內底,kan-taⁿ被動受塑造,自按呢tsiâⁿ做文化資本再生產ê一粒螺絲,按怎?設使是按呢kám嘛愛食額?
 
有一个毋知有tī代iah無ê高中公民課ê問題是親像按呢:「看見一个注水ê人teh半浮沉,uì邊--a過,看--著,煞無kā鬥相共,有罪--無?(人a̍h毋是我sak落水--ê啊!若死,嘛毋是我kā刣--死-ê!)
 
想kah tsia,對Camus關係「反變」(rebellion)ê強調,koh ke一層體會。 

Tuè陣e-sak,是動物ê本能,自覺hām反抗,koh kah是參本身生存kiau利益無直接關係ê反抗,就毋是動物ê本能--ah..... 

人,kám kan-taⁿ是動物(niā-niā)?答案:是/也毋是...

lausenghian 發表於 樂多14:41回應(0)引用(0)

August 11,2012

親近



新約聖經雅各書4章8節用一个動詞號做「親近」,巴克禮譯本佮紅皮聖經攏按呢翻,檢采是對中文和合本直接借--來-ê。經文頂半節是親像下跤按呢:

來親近上主,上主就會親近恁。(紅皮聖經)
親近上帝,伊就親近恁。        (巴克禮譯本)

仝tsit个詞,佇英文聖經,是翻做「to draw near / to draw nigh」(參考RSV、KJV),tsit篇,就是欲討論「神」佮「人」會「親近」抑袂。

想欲討論tse,有兩个原因,一个近,一个遠,近ê原因是昨昏去看著一篇蓋心適ê文章,相信真濟人是kā當做笑詼咧讀(貼佇ppt「笨版」,足濟人看甲笑hai-hai),毋過我讀了ê感想較無仝,我顛倒真欣羡作者佮in兜ê神明有tsiah-nī仔「親近」ê關係,講甲tsia,著翻頭來講另外hit个「遠」ê因端,會記得十外冬前,我猶規个人浸佇教會ê hit站仔,捌有一兩冬久,逐工攏開一兩點鐘家己關佇祈禱室祈禱,hit陣少年,有真濟屬佇少年人ê煩惱,人生ê方向--啦,感情--啦,佮厝--裡ê人ê關係--啦...佇祈禱室內底,我敬拜、我呵咾、我為家己求、嘛為著親tsiânn朋友求,為國家、為世界、也為人類求.....求掠外,也袂免得會問,若問,咱總嘛是向望有一个回應。

...繼續閱讀

lausenghian 發表於 樂多10:02回應(3)引用(0)

July 14,2012

啥mih khah價值


聽聲音檔

Beh十冬久長長短短參信仰kiau價值觀捙跋píng,uì一个基要派ê基督徒,變做懷疑者,過程中,我猶原不時咧挑戰家己ê想法,希望會當hōo規个價值觀koh-khah接近tī事實(或者是講「真理」)。

徛tī「不可知論」(agnosticism)來看,檢采咱一世人嘛無可能把握著真理,koh-khah無才調huah-hiàm講已經得著實拄實ê真理,真理tī伊正港ê追jip者ê面頭前,上蓋珍貴--ê,毋是內容,是一粒誠實、謙虛、無tīng--去.老--去ê心,若有tsit款心,咱袂因為年歲khah ke,就開始聖khiat(siànn-khiat)、咧家己捙袂顛,老實ê心,是永遠開放,隨時準備beh接受koh-khah合理ê意見--ê。

就準無koh再少年--ah,人按怎看據在--人,我是感覺tsu-bui仔tsu-bui。

雖bóng無koh親像以早對肉體以外ê靈魂、萬項物ê創造者kap主宰信tauh-tauh,總--是無張持煞發覺tsit號無仝,tī人生ê態度kap目標來講,並無造成hiah-nī仔大ê精差,就準性命無存在tī肉身(hi̍k-sin)之外,嘛無因為按呢,就產生對tsit世間ê執迷。設使人生是短短--à數十冬久ê旅程(數十億年內底數十冬久ê花火),一下過氣就收煞、前ê一切像潑踮正中晝花埕ê水tshìng消,啥to無留,按呢kā想,tī 喘氣tsit中間,真正有價值--ê,猶原毋是無siàu數ê金錢hām人phôo-thánn ê權力kiau地位,顛倒是hia-ê蹛旅程出尾ê時,翻頭想--起-來,tī「自我」kap「意識」beh hua--去進前,ē感覺歡喜、安慰ê項物。

Hia-ê項物,是愛,是hām心愛ê人sann-kap做伙ê記持;是付出,hōo tsit个世界koh-khah接近公義kap理想ê付出;是思考、是走揣真相、是覺悟ê、智識ê快樂;是經驗,濟濟無仝ê感官kap心靈ê經歷......tsia--ê,tsiah是值得去了氣力ê人生目標.....若無tsia-ê物,將重點hē毋著所在,有影了然。

lausenghian 發表於 樂多21:03回應(0)引用(0)

March 17,2012

Hông放水流ê大肚nái仔


賣銅鑼(McDonald's)內底,兩个查某囡仔咧破讀(phò-tāu),其中一个咧展伊飼過偌濟拄偌濟ê寵物,代先是狗仔經,了後,就講著伊捌幾若擺佇學寮飼魚,tshím開始,若欲倒去厝--裡,攏會kā魚仔做伙捾--轉-去,尾--仔嫌費氣,自按呢魚枵死幾若隻。有一擺伊飼三尾大肚nái仔,放假ê時交代仝蹛--ê替伊飼魚,無辦胚仝蹛--ê放外外,等伊轉來一下看,一隻著重傷覕佇水底,兩隻欲死tōng幌不時來咧kā咬,當時仔就是枵了傷過頭,兩隻欲食彼隻上lám身ê掠枵,查某囡仔講甲tsia,會一句:「我自按呢kā in攏總摒入去水溝仔,無愛--ah!」另外hit个查某囡仔驚一趒,應講:「你thài會tsiah過份,kā摒摒去臭水溝仔!」恁敢知影飼魚--ê按怎應,伊講:「過份--ê是in!連家己ê同伴都咧食!」


我聽伊按呢講心內真不目!魚予你關咧水缸,無位討食,全向你飼,你嫌麻煩,無責無任,做你轉厝,害魚餓--著,自按呢in求生存ê本能予in相刣,tann,代誌會舞甲tsiah歹看,是你tsit个飼魚ê問題,抑是魚仔ê問題--leh?

咱魚且囥一邊,講咱人,都會因為枵甲半小死,有無理性ê行放--ah!煞咧怪予人關來看藝量ê魚!

聽講古早古早,創造天地萬項物ê主宰,伊造男造女,予in佇園--裡,閣佇園ê中央栽一欉果子樹,特別交代in毋通去食,另外,主宰嘛允准世界奸巧ê蛇,來siânn人食hit號袂使食ê果子.....尾--仔,兩个人攏因為無趁創造主ê話,自按呢hông趕出園仔,就親像彼兩隻放水流ê大肚nái仔.....

lausenghian 發表於 樂多14:58回應(2)引用(0)

March 9,2012

講了真有理


SI今仔日kā下跤tsia-ê話傳予我看,我真罕得對網路頂ê「一寡講法」感覺價值,毋kù這幾句to有影講了袂bái,是講,伊講--ê,嘛毋是啥mih我前毋捌ê道理,若欲講知抑毋知,是tsîng早就知--ê,重要--ê是,tsia-ê話講了蓋著,所致閣聽--一-擺,閣餾--一-下嘛真好。



有人問Dalai Lama:「關係人性,上蓋予你gông-ngia̍h--ê是啥?」

Dalai Lama:「人,為著趁錢,犧牲健康;為著欲tánn-tia̍p身體,犧牲錢財。 了後,因為煩惱未來,伊無法享受現此時,自按呢,伊無法度佇目今活。    人活咧ê時,袂記得性命短短--à,死ê時,才發見家己毋捌好好仔度活。」

lausenghian 發表於 樂多21:48回應(0)引用(0)

February 18,2012

正港ê信心


正港ê信心ē hōo你無躊躇、無保留來相信--伊,毋管伊存在抑無。因為,正港ê信心徛ē在,hām伊本身ê事實已經攏無tī-tāi。人若有正港ê信心,就準無伊,嘛有才調kā任何ê結果看做是伊造tsiâⁿ--ê,閣有法度狀出逐款ê藉詞(tsià-sû)來替伊圓話(uân-uē),就準伊根本無佇--leh。用別款話來講,就是正港ê信心是自立--ê(autonomous)。

設使人看袂著伊超自然ê行做,人看ē著--ê,獨獨是踮無伊ê世界--裡,嘛有可能tsiânn ê逐款自然ê結果,按呢,人所有--ê,就kan-tann是hit个自立--ê、正港ê「信」心,tsit號信心,kám有影猶原佇伊ê目睭--裡看做媠?

「信心」已經代替「伊」,tsiânn做信仰ê對象。Tsit款信心,kám毋是對伊ê一款侮辱?Tsit款信心,kám毋是用思想所鑄--起-來ê偶像?

lausenghian 發表於 樂多20:32回應(0)引用(0)
 [1]  [2]  [3]  [4]  [5]  [6]  [最終頁]