雙倒水別莊

學過語言學ê人應該lóng知，語言學家ê研究上重視「母語人」ê文本（包括口語kap書寫），「母語人」講有就是有，講無就是無，講怪就有怪，講好就是好。若是咱ê台文作家，咱tsiah-ê號做為母語teh拍拚ê「母語人」，直直寫hit款北京語法ê台文，未來袂免得就ē變做台語句法ê直接證據：證明台語kap華語根本無啥句法tik ê精差！ 按呢免偌久，台語自然tik就ē hō͘主流ê「方言論述」收編--去，因為tī咱中間出現有母語意識、有母語語感koh有影響力ê句法學家進前，咱ê文本生產，已經teh提供咱ê對敵「方言論述」上好ê養分，hō͘咱家己人扁喙--a。


事實上，tsit種代誌已經沓沓仔teh發生--a，咱若有人認真teh讀句法ê論文kap冊--ê，應該不時ē為著hiah-ê學者引用怪巧ê語料teh受氣，明其然知he是病句，suah hō͘人大大典典tī論文--ni̍h用來支持伊ê理論，koh-khah是台語語法kap北京語無啥差ê理論，恁看母語運動者ē去hō͘活活gîng--死-袂。


我當然知影語言是ē變--ê，我mā m̄是beh提倡本質論，反對語言ê交流，我beh強調--ê kan-taⁿ是：做1 ê弱勢語言，若kan-taⁿ tī詞彙kap呼音頂懸去表達伊家己ê獨立性，he當然ē比進一步指出語法頂懸ê精差khah無hiah有力！


Tsîng-kàu-taⁿ，通世界ê後殖民作家所做--ê，攏是去扭曲殖民者ê語言，來產生反殖民ê效果，咱台灣ê母語作家--leh，suah是beh用殖民者ê語言來扭曲咱家己ê語言，造成「反反殖民」ê效果--sìm？


Tī咱猶無人tī學界有夠額ê影響力，kā台語kap華語ê語法界線畫kah明明明以先，請台文作家為咱反殖民ê運動目標ke想--寡，寫作ê時盡量直接用台語思考，tī落筆進前用台語ê語感ka三思（sàm-su），tsiah袂替咱ê對敵製造不利咱ê證據，因為弱勢語言書寫tuaⁿ-tiah ê必要性，m̄是社會語言學、語言變遷ê議題，伊是有運動頂懸無thang取代ê意義tī--teh--ê。

Tsîng-kah-taⁿ，對語言政策ê口角ē-sái講就是「文化功能論」kap「溝通工具論」ê戰爭，tī tsit-ê tshia-puâⁿ ê中間，「文化功能論」內底koh有2派teh拚館，也就是tsit-ê「功能」kám有包括「國家認同」kap「主體建構」，換話來講，就是teh諍「國家認同」kám 定著kap「某物款語言ê選擇」有tī-tāi？

對語言ê選擇佮1个人kā語言hē佇啥物位置，是這个人teh kā伊家己ê本性做定義，嘛是社會環境ê核心問題。若準咱紲接使用外來語言，紲接對這个外來語言盡忠，uì文化ê層面來講，咱敢無去紲接著咱佇新殖民統治下跤ê奴隸性？ (Ngugi wa Thiong'o 1981:15, Decolonising the Mind: The Politics of Language in African Literature)


伊佮往過落勾--去，致使伊嘛無踮現此時存在。（D. M. Thomas. The White Hotel. 先覺出版中文譯本 1999:231）

教育部屬下的「國家教育研究院籌備處」最近佇「國語日報」放風聲，想欲共一節的母語教學取消。In講「世界各國鮮少將母語列為國教課程」，「鄉土語言應回歸到彈性課程，讓各校因地制宜選修，不需要必修。」In主張全面檢討九年一貫國教課程，進行「中小學課程發展基礎模式」研究，預計二到三年內小規模修訂，五至八年內大幅度改革。In講以前母語列為國小必修是「受政治力和意識形態影響」。主要是欲設計（In講是國家教育研究？）共母語教育除掉，轉去以前「國語」獨尊的單語政策。講這才是無受政治力佮意識形態影響？現此時國中的母語課就是選修矣，敢有人咧選？其實講較白咧，選修不過是「賜死」的代名詞。