文化分類文章 顯示方式:簡文 | 列表

March 7,2014

補充「天地生成」


前我捌寫一篇文章號做「天地生成」,內底講起著關係「性」ê功能,ing暗看著下跤tsit塊影片,伊uì演化佮社會學ê角度討論「咱人是按怎愛穿衫」tsit个議題,其中,一个因端是:咱ê智慧發展到一个程度,腦佔身體ê比例蓋大,致使人類ê幼嬰仔無法度親像一寡動物足緊就獨立,需要tshiânn需要io;啊「穿衫」tsit件代誌,抾起保護、燒暖、衛生hām社會功能,會當減少性刺激,予人類mài hiah tsia̍p發生性行為,才袂生囝生siunn濟,自按呢無法度好好仔tshiânn囝,所以,穿衫tsit个慣勢就tiâu--leh,因為伊有人類「物種生存」頂懸ê優勢。

也就是講,因為演化,有人類ê智慧發展佮社會功能等等起致,咱人愛beh穿衫,咱uì tsia kā想看覓--leh:演化,予咱人為著智能發展,發生tsiah-nī濟生理變化佮為著物種生存適應ê行為改變,照講,若是「性」獨獨是「生殖功能」,按呢頭前tsia-ê情況綜合來講,應該是「袂直直起痟(華語:『發情』)ê人」會較佔生存優勢,也就是講,hia-ê袂直直起痟ê人,著愛是「演化ê勝利者」才著。

毋過,人類演化kah tann,煞猶原hām大部份ê動物無仝,人類就是「隨時會當起痟」--ê,tsit項生物 / 演化ê事實,其實嘛有證明講:人類ê「性行為」在水(絕對)毋是單純ê生殖功能!




lausenghian 發表於 樂多21:57回應(0)引用(0)

January 30,2014

舊曆年恭禧!


恭禧恭禧,今仔日是二九暝, 越南、韓國、中國、新加坡、台灣kap一部份ê日本人hām馬來西亞人,閣有佇海外ê漢人、越南人、韓國人 ,攏欲過 東亞漢字文化圈ê舊曆新年 ~祝逐家新年頭好字運,規年食有賰!


lausenghian 發表於 樂多11:34回應(0)引用(0)

January 5,2014

天地生成


Hām大多數ê動物無仝,人類無分季節、不管時日to會當起痟(華語『發情』),tsit个現象牽涉著「性」ê意義,值得思考。 咱知影tse生物現象,計是演化ê結果,有人beh講是受創造--ê,無--打-緊,對下跤ê論點bē有影響。

咱按呢論起:設使講「性」親像某一寡人講--ê按呢,究勘到底,伊獨獨是「生殖」ê目的,抾起「生殖」以外ê別項,包括性ê爽快等等,kan-tann是beh hōo人有生殖ê動機、thang好傳種(thn̂g-tsíng),換話來講,就是有性ê爽快ê人,自然增加生殖行為,基因khóo-pih較濟,後--來tsiânn做演化ê勝利者,所以kah尾--à,性kap性ê爽快規个kap-kap做一伙,總--是性ê爽快毋是伊ê目的,究真性ê爽快kan-tann是手段,是演化ê背後推動(tshui-tōng)「生殖 / 基因khóo-pih」ê家私。(Tī另外hia-ê人ê思考內底,就ài講做「性ê爽快」是創造者鼓勵人生囝。)

頂懸tsit个講法,會使講真普遍,總--是,若斟酌kā想,其實真恐怖。
...繼續閱讀

lausenghian 發表於 樂多10:12回應(0)引用(0)

September 18,2013

你就無「賣肉」?!



今仔日新聞報講警察查著一个賣姦(māi-kan)集團,內底有一个「看肉師」,負責鑑定賣肉ê查某囡仔ê好bái了thang定價siàu,記者寫kioh:「不動產、古董攏有專業鑑定師,想袂到,人肉市場煞嘛有鑑定師!這種將女性當做「肉品」ê行做,有影真毋是款!」

前拙者就捌討論相關ê議題(啥物號做物化賺食ê法度),像記者先生hām社會上真濟人,掠準講kan-tann「趁食查某」等等特殊ê行業,才算做是「出賣家己」、「將人物化」,實在是想了無真,一種「蜜婆是鳥,徛鵝毋是鳥」ê淺薄想法。

Kám講,咱去允頭路ê時,寫履歷,hông面試,就毋是咧受「鑑定」?未tsîng做,學歷、才情、心理狀況等等會hông比長論短,入去了後,逐冬hông拍考績,主管hông評鑑,教師hông鑑定,教授受趕升等,tsia-ê過程kám就較「高尚」?敢應講「有較高尚」ê人,咱且借問,kám講:「咱一个人ê價值,會當用頭前tsia-ê項mi̍h來評判--sìm?」頭前tsia-ê抾起,足濟公司會要求允頭路ê人先健康檢查交報告,閣有一寡工課,是進一步會對咱ê肉體秤斤秤兩--leh,拙者無烏白講,無,恁kám掠準講he手機仔店ê店員無用生張佮枝骨來過揀?閣有,幾若擺,台電招員工、清潔隊招隊員,毋是攏比鬥走、扛沙袋仔,一陣人為著欲搶hit幾个khueh,並kah大粒汗、細粒汗、舞甲強強欲歪腰--去,甚至傷--著to有,tse,kám毋是人咧kā咱「看肉」?若有tsing差,是tsing差佇看「啥mih所在」無仝niā-tiānn,啥人講毋是!

拙者ê意思毋是欲剾洗任何人,拙者獨獨是欲提醒:「毋通凊彩欲鄙相人ê頭路,因為咱揣頭路、做工課ê規个過程,嘛是咧賣肉,是法度無sio-siâng niā-niā。」

lausenghian 發表於 樂多12:03回應(0)引用(0)

August 19,2013

無hiah在水(tsāi-tsuí)-2



Helen E. Fisher佇伊ê冊--裡講著講離婚率ê懸低,窮實和女性地位佮經濟權力ê分摒是正比例!

對無仝社會、族群ê研究,顯示,母系社會和女性掌握經濟大權ê社會、或者是上無女性ê經濟權力佮男性平坐徛ê社會,離婚率攏較懸,再婚嘛嶄然仔四常;相對的(tik),見若社會ê家庭經濟結構是翁某相倚傍,有一方缺欠經濟ê獨立性,按呢,離婚率就會真低。

換話來講,一般hit款臭濁ê講法,比論:「離婚ê人愈來愈濟,代表世風日下,人心不古」,凡勢拄好佮事實是顛倒頭píng,正經欲講,以早無仝社會離婚率ê tsing差,反映--ê,拄拄是無仝社會中女性地位ê差別參經濟分工ê相縒。啊一寡傳統上離婚率較低ê社會,目今離婚率peh懸,後壁ê因素煞是女性社經地位ê提升、經濟權力平棒ê「進步」象徵!

毋過傳統保守老糟思想ê擁護者內底,得著tháu放ê女性煞佔大多數?!

lausenghian 發表於 樂多12:02回應(0)引用(0)

August 18,2013

無hiah在水(tsāi-tsuí)-1



Tī基督教(西國,猶太文化做源頭)内底,「跪」是拜神ê動作,毋過tī東方傳統内底,對序大人、先生,就用跪做禮數--ah。

一般咱攑手、手蹄向前,是咧kā人相借問,毋過這个手勢tī希臘,是咧kā人蹧躂。

仝款ê姿勢,無仝文化意涵,是欲按怎輸赢?

lausenghian 發表於 樂多22:37回應(0)引用(0)

August 12,2012

Alid ê詞源



林昌華佇一篇論文內底(《台灣風物》53卷2期,2003年6--月;p.15-62),講著講「阿立祖」tsit个詞,凡勢毋是Siraya自底有ê詞彙。

Tsit个tshui論,會當對Siraya ê方言比較來得著支持,佇另外一个方言ê詞彙表(Utrecht Manuscript)內底,咱揣無新港方言ê Alid tsit个詞!!!Alid 就是一般目今咧講ê「阿立祖」,佇Siraya新港方言ê馬太福音--裡,Alid tsit个字hông用來翻譯「上帝/神」。總--是,咱袂khat-kin欲問講:是按怎佇另外一个Siraya方言--裡(Utrecht Manuscript),留甲現此時ê詞彙表內底煞無收Alid tsit个詞,顛倒是有另外一个詞「Deus」咧指稱「上帝」!(當然咱知「Deus」是一个西方語言ê借詞)。 

既若(kah-nā)tsia-ê詞彙是荷蘭傳教士所收集--ê,in欲落勾「上帝」tsit个詞ê可能性真低,所擺,咱thang合理tshui測,「Alid」tsit个詞,毋是Siraya跨方言ê詞彙,按呢講都也有影,因為對上帝ê一神信仰,並毋是Siraya從古早就有ê傳統,而且,咱對hit-tang-tsūn記錄Siraya宗教信仰ê文獻,都也無看著有「阿立祖崇拜」,自按呢,林昌華佇論文內底ê tshui論:「Alid是新港方言ê聖經翻譯者對馬來語Alito借來轉譯ê新詞」,就順理順路--ah!!! 

是講,佇tsit-má ê文化氣氛--裡,欲講「阿立祖」毋是Siraya傳統ê信仰,有影是掠虱頭上(tsiūnn)爬.....也莫怪林昌華ê講法罕有人綴喙。

lausenghian 發表於 樂多13:07回應(1)引用(0)

February 3,2012

流行


敢無人捌問講是啥人咧tshuā頭?就準毋是一个人,上無,嘛kánn有一陣人咧參詳,in「開會」了後,「決定」一个趨勢,in ê決議發消息湠--出-去,逐所在就開始綴in ê喙尾。

若無,是按怎見若講著後一季ê穿插流行啥,或者是這馬按怎裝上時行,tsia-ê專家煞袂十喙九尻川,顛倒是不止仔會齊,對平面雜誌到電子媒體,毋管是西國、日本、東南亞、南美洲,攏看著仝一个「潮流」,全世界出名ê時裝設計師,看法齊(tsiâu)kīng相倚,這,thài有可能?

流行,事實上是資本主義商業運作內底ê一部份,咱知一寡產業技術ê tsáng頭,根本是掌握佇少數彼幾間大公司ê手頭,電子零件佮特殊材料且無講,咱取製藥這項來比論,全世界有一半以上ê新藥,是佇美國申請上市--ê,連德國這个佇歐洲做頭ê工業國家,分--著-ê,嘛干焦是製業產業ê餅幼仔爾爾(較無十份一),若照按呢kā想,流行這號物,後壁牽涉--ê,是啥款ê利益結構佮「決策」機制,恐驚仔就真明--ah。

毋kú,咧做這塊餅分這塊餅ê人(團體),檢采是佇歐洲?

猶會記得,以早,若講一个人穿插真流行,加加減減是講伊真敢穿,無像普通人遐一般,毋過,彼个hippie ê時代已經過;現此時,「流行」煞變做一款「一般」ê現象,時行仝一款款式,時行仝彼幾个色水.....大多數人綴「時行」咧變換穿插,「流行」ê意思嘛無仝--去-ah,在我來看,以早ê「流行」假若(ká-ná)加較有個性。

lausenghian 發表於 樂多21:19回應(0)引用(0)

December 30,2011

關係婚姻




J教授用心紹介covenant kap agreement無仝ê所在,講起自古早用血立約ê慣俗,參婚姻tī基督教內底是按怎bē用得拆分開ê因端,tse,hōo 我koh一擺去揣資料來看,思考婚姻ê源起頭是啥,婚姻tī人類社會--裡,tī無仝ê時代、文化,有啥無仝ê款式,因為我需要整理tsia-ê想法,khah知影家己愛按怎想khah好,啥mih款立場,tsiah是khah妥當--ê (對我個人ê理解出發)。

是--lah!用血立約、背約者死,確實是一寡文化內底ê現象,總--是,tsit个現象,是原始社會內底,tī the law of the jungle下跤,透過結盟求自保ê手段,tsit號手段,kám有超文化、超時代ê共通性或者是重要價值?Covenant hōo人用agreement/contract來替換,是退步ia̍h是進步?是必然ê發展或者是穢惡上帝?Beh回答tsia-ê問題,khah輸直接問講「咱kám有必要hiah "返祖"」(atavistic)?」 斟酌kā想,tse suah kap封建社會(封閉社會)行向文明社會(開放社會)ê脈絡,相連蒂帶(tuà)--neh。

若婚姻--leh,uì爸權發源,為著確認爸系ê後嗣來設立,兼考慮增加生產力kap經濟力(查某人tī古早是查埔人ê財產),若無,就是為著政治kap權力(透過結婚來結盟),現代ê婚姻,早就無古早ê內涵--ah,極ke是「借殼上市」ê新發明,beh tshiû根源講伊有神聖ê源頭,kám m̄是teh騙人騙家己?

咱koh舉一個例:西方文明內底,一夫一妻ê基本框殼,是Saint Augustine ê發明,聖經內底並無頭尾一致ê要求,咱kám知?

lausenghian 發表於 樂多15:56回應(0)引用(0)

December 15,2011

If you [pi~~] with anyone...


昨暗厝頭家來kā我換電視,換好勢開來試看覓,無張持看著某一个新聞台咧報邱毅參陳致中辯論ê新聞,in引某一个學者ê評論,講tsit場辯論用詞真粗魯,水準蓋低等等,內中,有剪一段陳致中咧批評邱毅ê私生活,來回應邱毅對伊私生活ê攻擊,電視台剪ê hit段,是陳致中講:「你較早開補習班,開甲去[消音]家己ê學生,了後佮某離婚...」,看著tsit款ê處理方式,拍算消音hit字檢采是「kàn」抑是「tshàu」,我想任何看著電視台做tsit款處理ê人,檢采攏會按呢理解。

無想著講,我烏白tsūn,tsūn去較後壁ê頻道,煞拄好看著有一台咧重播規个辯論過程,自按呢,我就那無閒工課,那聽看in兩个人到底是有講啥物,嘛因為按呢,我聽著陳致中hit段ê發言,窮實,伊只不過是講:「你較早開補習班,開甲去"睏“家己ê學生,了後佮某離婚.....」

當時仔,「睏」變做hiah垃圾,著予電視台消音啊???

對照下晡seminar ê時,阮做伙讀ê一篇關係不定詞佮自由選擇詞項(free choice item)ê論文,內底拄拄有一句例句,號做:「If you sleep with anyone, I'll kill you.」 若照hit台電視台ê logic,tsit篇句法論文內底例句太put-tóng,凡勢嘛愛kā「sleep」tsit字tsō烏或者是挖空,總--是,按呢敢無傷過khi-khiau?

關係政治人物ê私生活,或者是結婚、離緣,男女交往、用金錢做性交易,事實講,我根本無要意,感情ê代誌、欲佮啥人睏,he是咧行ê兩个人之間愛家己處理、liú-la̍k--ê,毋免別人去家婆關心。總是,佇「睏」tsit字kā人消音ê電視台(做tsit个決定ê人),實在有夠惡毒,在我來看,tse根本是刁工挖空予陳致中跳,人不過是講「睏」,你煞kā人消音,予觀眾誤會伊tshoh啥字眼出喙,若欲比in兩人辯論內容、用語按怎,tsit種媒體,才是正港ê糞埽,敢講毋是!?

lausenghian 發表於 樂多7:58回應(2)引用(0)
 [1]  [2]  [3]  [4]  [5]  [6]  [7]  [8]  [9]  [10]  [最終頁]