文學分類文章 顯示方式:簡文 | 列表

December 20,2016

免錢ê禮物

你講欲佮我交換禮物
Lak袋仔貯磅子,袂做得禮物
你講禮物愛看誠心
上好ê禮物—免錢
免錢ê禮物,有當時仔上貴氣

十二月二四平安暝
公園闊莽莽ê草埔
你叫我著面向下跤
仆蹛塗跤
地球就是你欲予我ê禮物
我跤手開開,攬甲絚絚絚
這个禮物太近毋過太重
我抱伊袂贏
換我吩咐你面向頭頂
倒予坦笑
天就是我欲予你ê禮物
你愛目睭擘金,看予足真足真
這个禮物太遠又閣真輕
你手摸伊袂著

好佳哉咱ê禮物
佇天際線相交phuáh
上重佮上輕
上近佮上遠ê兩項禮物
咱ê手嘛佇天際線相交phuáh
咱攏有上好ê聖誕禮物

lausenghian 發表於 樂多16:18回應(0)引用(0) │標籤:聖誕節,禮物,

November 29,2016

問詩


寫詩若是無病咧假佯哼呻
幸福ê人kám假了會成
若毋是正經疼甲到角
詩句kám會hiah鑿--人

寫詩若是破病艱苦哀出聲
康健ê人kám掠會著hit款心情 (tsiânn)
Kám講著愛孤老敏感
詩句tsiah會kâng唌

人愛甲熱phut-phut
詩神就來做菁仔欉
就是愛揣人ê心碎鹽鹽
伊tiang時tsiah學會曉得定

假使寫詩著愛和詩神盤撋
詩ê內底
覕--ê到底是tsiâ

lausenghian 發表於 樂多20:35回應(0)引用(0)

November 22,2016

阿莉思佇怪奇地的冒險(第一章一部份)

阿莉思佇怪奇地的冒險
Lewis Carroll; John Tenniel 原著
第一章:跋落兔仔空
[紅字的部份是尾仔有參考足英台小組討論做修改的部份,錄音就無閣照咧重錄矣]

佇溪仔邊坐踮怹阿姊邊仔,阿莉思強強欲感覺siān矣,閣無代誌做:有一半擺仔伊去偷siam怹姊仔咧讀的冊,都無看著頂懸有圖抑是對話,「無敆圖抑是對話的冊是有啥路用?」阿莉思按呢想。

毋才伊家己佇心內考慮(熱天予伊愛睏閣戇神戇神,總是伊有儘量咧想)做雛菊(tshu-kiok)花環的快樂敢有值得伊peh起身去挽花,才咧想爾爾,無張持有一隻目睭粉紅仔色的白兔仔倚過來。
這嘛無算真特別的代誌,就準阿莉思聽著兔仔家己對家己講「阿娘喂!我咧欲袂赴矣!」的時,嘛無想講這有偌離經(後來伊想著,是有感覺彼陣愛真著驚才著,毋過當當彼時都也感覺蓋正常),是兔仔對伊䘥仔的橐袋仔撏一粒錶仔出來看,了後趕咧lōng,阿莉思才雄雄想講伊自來毋捌看兔仔穿掛橐袋仔的䘥仔,閣對內底撏錶仔,自按呢好玄甲欲害,徛起來,綴兔仔tshuànn過曠埔,拄拄好會赴看著伊跳落去籬仔下跤的一个大空兔仔空。

阿莉思嘛跳落去,攏無小考慮講伊是欲按怎有才調閣對彼內底出來。

兔仔空入去直挵挵有親像塗壙空(thôo-khòng-khang),了後規个削直落去,這个變化太雄狂,毋才阿莉思佇落落去袂輸無底深坑進前全無時間想講愛擋恬。毋知是這个深坑有影足深,抑是伊落著蓋慢,伊佇落落去這中間有真濟時間看四箍輾轉,想看紲落來會發生啥物代誌。頭起先,伊有向落去看覓,想欲知影落去有啥物,總是太烏佇咧攏看無物件,了後伊就看這深坑的四爿邊,注意著規个攏有鬥櫉仔佮冊架仔佇咧,一四界看會著地圖佮圖掛佇壁杙。伊經過一个架仔的時對頂懸提一罐物件落來,罐仔的貼紙寫講「柳丁醬」,結果內底空空予伊真失望。伊無愛共這个罐仔擲落去,驚會摃死下跤的啥人,只好共下入去伊經過的一个櫉仔。

「按呢honnh!」阿莉思家己佇心內想,「像按呢落落去一擺了後,我定著會感覺對樓梯輾落來根本無算啥!等我若轉去,怹毋就會感覺我有夠勇敢的勇敢!按怎講咧,就準我對厝尾頂跋落來(這是真有可能的),我嘛袂提來講予人聽!」

直直落落去,直直落落去,直直落落去。這款落法敢攏無出尾的時?「到這陣我毋知跋落幾英哩深矣?」伊大聲講。「我定著是來佇真倚地球中心的所在矣。我看覓一下:按呢就是四千英哩落來,我想是按呢--」(咱看會出來阿莉思佇教室上課有學一寡仔這款的物件,雖罔無人咧聽,所以講這陣都毋是展伊的智識的流擺,總是講出來餾一下嘛是袂䆀)「--著,彼个距離是有正確佇咧--毋過我嘛是會想欲知影我這陣是到啥物經度抑緯度矣?」(阿莉思對經度抑是緯度無啥概念,總是共掠做排祉的字詞咧講。)

無偌久伊閣講:「毋知我會跋迵過規粒地球袂!設使我對頭向下面咧行路的人陣中央飛出來,彼會偌仔爾仔心適啊!我想講這號做「礙逆」--「(伊嶄然仔歡喜這陣無人咧聽,因為這字聽起來都無啥對同)」--毋過我應該愛問怹彼个國家的名是啥honnh。阿姆,歹勢,遮是Niu-jí-lán抑是澳洲?(伊那講那想辦法行禮--佇半簾懸咧跋落去閣想欲跍跤行禮!你想敢做會到?)「伊會共我看做一个偌仔爾仔毋捌代誌的查某囡仔啊!袂用得,用問的無效,無的確我會看著佗位有寫咧。」

直直落落去,直直落落去,直直落落去。無別項代誌通好做矣,毋才阿莉思無偌久閣開始講:「娜下昏暗會足心悶我,我應該想著這點的!」(娜是貓仔)「我希望怹佇伊三點茶的時會記得伊的牛奶碟仔。娜,心愛的,我希望你有綴我落來遮!恐驚仔半空中是無鳥鼠仔,毋過你凡勢會掠著密婆啊,密婆真成鳥鼠仔honnh。是講毋知貓仔敢有咧食密婆?」到遮來阿莉思開始變甲足愛睏,伊閣對家己講落去,親像咧陷眠:「貓仔敢有咧食密婆?貓仔敢有咧食密婆?」有時仔講做:「密婆敢有咧食貓仔?」就是因為不管佗一个問題伊攏無法度回答,伊欲按怎問就無遐要緊矣。伊感覺伊咧啄龜,嘛拄開始咧眠夢,夢見伊佮娜手牽手咧行,閣足慎重對娜講:「Tann,娜,講正經的:你捌食密婆無?」無張持,Phóng!Phóng!伊落佇一堆樹椏佮焦葉仔頂,無閣跋落去矣。

lausenghian 發表於 樂多10:44回應(1)引用(0) │標籤:台語,翻譯,愛莉絲夢遊仙境

October 10,2015

《Tshi-bá-gōo醫生》(『齊瓦哥醫生』)第一節試譯


(對 藍英年、谷羽翻譯的中文版第一節 翻做台文)

送上山頭的人陣規路那唱《安魂曲》那行。就準人陣擋恬,怹的跤步、馬蹄佮風聲嘛袂輸猶原咧唱《安魂曲》。

路裡的人讓路予送山的人,嘛數(siàu)算怹的花箍,並且佇邊仔拍十字。好玄的人kheh入去人陣裡,問講:「是啥人欲落土?」怹得著的回答是:「Zhivago。」「就是按呢喔。按呢阮知。」「毋是老爺,是夫人。」「攏相仝啦。希望伊較緊升入去天堂。這喪禮有影有夠排祉的啦。」

送出山的人陣上尾仔干焦影一下,就去到頭前看袂著去矣。獨獨聽見「主的土地、宇宙和宇宙中的所有生靈」的歌聲。神父那拍十字那向Maria Nikolaevnah的身軀頂掖塗。逐家開始唱〈虔誠的靈魂〉。

紲落來就不止仔無閒矣。棺材蓋崁起去,用釘仔釘予牢,下入去墓壙。四枝塗鍘(thôo-tshiah)緊猛向墓壙掖黃塗沙,塗落落去的聲就若親像疏閬疏閬的雨落佇地上。目一下nih一門新墓膨起來矣。一个十歲的查埔囡仔peh上墓龜。

送山的人陣沓沓仔四散,人定定會有一種麻痺的感覺,這个時陣peh上老母墓龜的查埔囡仔有話欲講。

伊頭擔起來,目睭看著茫茫渺渺,對墓龜向曠闊的秋天空埔佮修道院的圓拱頂nih-nih看。掛一支啄鼻仔的面變形矣。頷頸伸長矣。若是野狼親像伊按呢,就是即時欲喉叫矣。查埔囡仔雙手共面掩咧,開聲吼。對面飛來的雲將冷吱吱的雨點掖踮伊的手佮面。一个穿拍襉束䘼烏教袍(phàu)的人行來墓前。這个人是死者的兄弟,是這个哭甲足悽慘的查埔囡仔的阿舅──還俗的神父Nikolay Nikolayevich Vedenyapin。伊行去查埔囡仔的頭前,共伊tshuā走。

lausenghian 發表於 樂多11:41回應(0)引用(0) │標籤:齊瓦哥醫生,zhivago

February 3,2015

敢袂足奇怪-?

【翻譯D. H. Lawrence ê詩〈Won't It Be Strange-?〉】

敢袂足奇怪?Tng-tong護士將拄出世ê紅嬰仔抱來
hō͘榮影ê老爸,hō͘伊看嬰仔he細細个仔、有網仔花草、青青ê跤
tse跤是beh出力kò尻脊後ê水--ê
a̍h是hō͘伊看hit蕊屬tī野鵝仔gîn-òⁿ-òⁿ、圓lìn-lìn、帶野性、活跳跳ê目睭
uì無盡尾ê天kap海看倒出--來
或者是tng-tong伊háu一聲殺膽ê細聲鳥仔聲
tse聲是屬tī徛起蹛冰山,一下叫會傳去kah Nile河hit爿岸--ê-

Tng-tong做老爸--ê講:Tse to毋是我ê!
某--à,你是tuì佗生tsit隻怪物仔--出-來-ê?-
仝時天頂敢會有撇翼ê風聲,掛一港冷風吹--來?
敢會he飛kah懸懸懸看攏袂著ê天鵝叫歌
鑿破伊ê耳鏡?
啊伊自按呢著直直聽hit个回答永世代無煞

lausenghian 發表於 樂多13:44回應(0)引用(0)

November 1,2014

翻點ê挐絮話(jû-sù-uē)

                          聽 錄 音 檔
翻點ê暝
暗靜仔盤過窗仔口
巷路ê燈
偷偷仔探頭siam--咱
你睏交睡--ah,心肝--ê
我對跤脊後攬--你
手siâm佇你ê頷頸
兩尾捅鬚袂定著ê蛇

熱--人ê暗暝
冷凊軁過心肝íⁿ仔
巷路ê電報柱
徛直thuh佇烏sìm-sìm ê天
是烏絨幼仔罩罞
我偌爾仔sannh心
燒氣激酒  落帶hiàn个雨
頭殼內有一塊冰角
Hah燒了後  水直直津

對你ê愛情
自頭殼碗斟入去血筋
沓沓仔注去到規身軀
毛管空湠澹
起交懍恂
倚--你
欲閣較倚--你
一直到咱ê距離
著用負數siàu算為止

我袂賭強硬愛欲共暝留--咧
橫直暗暝ê河溪是你目睭ê監囚
我會tshuànn過in去拜訪逐粒星
閣再講
你若精神伸圇  喙角tshìng懸
日頭是欲按怎袂予hiàu上天--咧

翻點ê暝
愛情幔雞母皮
毛管ê毛(mn̂g)
袂咬根探頭tsīnn--你
你睏交睡--ah,心肝--ê
你ê毛管含牢牢--ê
是袂定著ê蛇無siàu算
你敢是咧欲精神--ah
你精神ê時
天就會光
你精神ê時
日頭欲著急peh上圓車車ê山崙
你快精神--lah
心愛--ê

lausenghian 發表於 樂多18:36回應(0)引用(0) │標籤:,台語,poem,母語,台語詩,poetry,taiwanese

October 11,2014

補搭



「將活物創予死,心內會躊躇、會艱苦袂?有人連挼死一隻狗蟻都會毋甘,有人咧,逐工刣豬刣牛,煞攏無tsùn-būn著,啊若刣人,是天理不容个,抾起受訓練殺敵个兵仔,刣人刣著蔥脆閣紲手个,頭殼定著有問題。」希峇麗徛佇警衛隊總部任務中心上頭前,共伊个隊員按呢講。

希峇麗是警衛隊頭一个查某隊長,三十歲彼跤兜,伊差不多逐工咧刣人,毋過伊佮伊个警衛隊員有揀人刣,較簡省講,就是「加圇人」才是正港个人,怹袂去kāng伊,啊若是「破扑人」,彼是有人形爾爾,刣怹是親像清潔隊員清糞埽、執行任務、拄好爾爾;論真講,這个進步个時代,有破扑个人攏是遐个赤跤羅漢、流民十一哥,怹是「問題」,需要「結果擲拺」。

「破扑人毋是人,怹是咱人類个渣滓!咱刣怹,毋是咧刣人,是咧救世!」希峇麗講上尾這幾句話个時,目睭攏無轉睔,逐字攏出力帶重聲,親像撼仔摃釘仔撼著猛力閣對點。

日頭懸山,破扑人欲來矣,怹日時覕佇境界外、曠野裡暗糝个所在,等城市幔暗暝个烏衫,怹就會暗靜仔走入來覓食个,破扑人是世界逐所在共同个大問題,根據市政府个統計,怹對治安佮衛生攏造成真大个威脅,毋才政府會佇警察以外,另外成立警衛隊,專門負責暗暝巡邏,若看著破扑人,免躊躇,開銃就共彈死,了後通知清潔隊來處理身屍。

彼一暗,怹佇市中心發現一个烏影,叫伊擋括煞直直走,怹逐去甲一條無尾巷,逼來佇壁角,有影是一个破扑人,希峇麗銃攑咧相準,伊開銃个時目睭連nih一下都無,銃機仔拄tiau落去爾爾,破扑人雄雄喝一聲「希峇麗!」希峇麗掣一趒,自按呢愣去,毋過銃子隨貫過破扑人个頭額,另外一銃是伊个隊員開个,佇倒爿胸坎心臟遐一空對對,這个破扑人目睭無瞌,直直相希峇麗,了後蝹落塗跤,「伊汰會知影我个名?」希峇麗都猶咧睡神咧,伊个隊員已經咧連絡清潔隊通報位置矣。
...繼續閱讀

August 18,2014

做伴



咱揀這條較無人行ê路
暗靜仔行
當原初咱窮實心內驚驚
跤步ná伐

路kám有出尾ê時
牽著a̋n-ân ê手
kám會終其尾放--開
心kám袂gâu僥蟶
煦著燒hut-hut ê身軀
kám袂落尾手tshìng消

咱揀這條較無人行ê路
勻勻仔行
越頭已經看無起行ê位仔
頭前猶閣迵去kah天際線

用手牽做一个圓箍無盡尾
相攬迒過兩條身魂ê閬縫
咱揀這條較無人行ê路
寬寬仔行
咱猶原欲行
咱猶原咧行

August 1,2014

相戰

一透早
我已經佇重紅ê天露頂散步
苦楝公
伸死白ê手骨tīn-tōng-tīn-hiànn
猶原咧phah-phik
昨暗拆破耳空鬼仔ê銃聲
津津--落-來
Lak蹛遠兜
已經行割禮koh用火洗禮ê耳葉仔
聽袂著 聽袂著

攏tio̍h怪哆囉滿ê黃金溪
水泱閃爍印做lè-táu ê帖仔
若無--者
Thài會有一陣死對頭來咧赴會
慈悲ê減口王 殺膽ê lám跤siàu
死忠ê反背者 有撙節ê粗魯人
大道公hām媽祖婆相攬相唚
Pue̍h--出-來 tu̍h--入-去
喉叫 挽掣
銃子tsuānn對性命ê出尾

In獨獨無放帖予--我
就跳舞蹔破我ê眠床
壁堵袂輸章牌一排一排sak-sak--倒
自本按算目睭掩--咧
聽袂著 聽袂著
Kuàn-thài伊囡仔喘氣ê血臊hiàn
無疑悟介錯(kha̋i-siá-khuh)beh借我ê頭殼碗斟酒
只好破腹
破in開nā-nā ê腹肚
證明我無做奴ê勇敢

一透早
我已經佇重紅ê天露頂散步
上帝公
伸死白ê手骨tīn-tōng-tīn-hiànn
猶原咧phah-phik
昨暗拆破耳空鬼仔ê喉叫聲
津津--落-來
Lak蹛遠兜
已經行割禮koh用血洗禮ê良心仔
看袂著 看袂著

lausenghian 發表於 樂多21:30回應(0)引用(0) │標籤:,台語,母語,台語詩,台語文學,母語文學

June 4,2014

冤枉



啥人叫伊
Tsông入去殿堂
煞凊凊彩彩
無要無緊

赤身露體無愛妝thānn
也罷
上無學鳥仔叫歌
予人歡喜愛聽


柴捎咧直破
牛聲馬喉
無按算在內个後現代
Kánn是冤仇人欲來侵門踏戶

搜身軀都白話白汫
閣無紮音樂个味素
予人掠做是
分屍拆腿个毋成散文
結果 詩形銃決

lausenghian 發表於 樂多22:51回應(0)引用(0)
 [1]  [2]  [3]  [4]  [5]  [6]  [7]  [8]  [9]  [最終頁]