書寫，無定著就ài大大典典the̍h hōo人讀，雖bóng kap人分享家己ê想法、故事是真心適ê代誌，總--是tī人生ê過程中，有1種「孤獨」ê需要，有tsi̍t-kuá就準是對親娘lé mā講bē出ê心內話，是家己to感覺見笑也好，是家己無hiah礙謔，m̄-koh suah ē觸惡人眾也罷，有tsi̍t-kuá話，kan-kan-á姑不將想欲bih起來寫。

講細漢 a 姑是阮第 2 ê a 母是實 tú 實--ê，阮做幼 gín-á ê 時，a 母食頭路無閒，iáu-buē 嫁 ê a 姑來台北顧--阮，io--阮、飼--阮、洗--阮，taⁿ 就 tsún 阮大 bú 人--a，kiàn-pái 轉打貓若見面，猶原感覺 ē 著 hit 款 tah 心 ê 感情。


Tú tsih 著消息，伊腦 ê 血筋生瘤破--去，taⁿ tī 嘉義長庚急救，tsi̍t-ē 知，我目屎 suî lìn--落-來。


A 母講 ài 阮替伊祈禱，替伊求 ē-tàng 脫險，我雄雄 suah m̄ 知 beh ǹg tsiâ 祈禱？ Tsiâ ē tī hia 斟酌聽？Tsiâ ē tsiaⁿ 實致意咱人 ê 心 tsiâⁿ？


Khah 輸 ǹg 望妹婿手術 ê 工夫 kám m̄ 是？


足久無 tsit 款為骨頭至親操心 peh 腹 ê 感覺--a，a 姑，你 iáu 少年，你 ài giám 硬，雖然我 m̄ 知 ē-tàng 為你做 siáⁿ-mi̍h，m̄-koh 若 beh 用我 ê 歲壽來補--你，我甘願。

行過絕風嶺，深深知影，深深知影，手蹄 khah 闊 mā bē 遮得雄雨，跤步 khah 健 mā hāⁿ bē 過大湧，天地行災 ê 時，我不過是 1 隻蟲 thuā，萬千人眾喊 huah 我敢 tú 敵，mā 無代表駛硬片就 ē 贏。


M̄-tsiah 身外崩天 hia̍p 地，心內無風無搖，ē 驚 ē tshuah mā 無 khah-tsua̍h，khiā-tsāi-tsāi sīm tī hia，ná-tshan 像 tshìng 割 thìng hâ，獨獨是認份，tsāi-tsuí 無認命。


若 koh 有命，就準食土食 kah kéⁿ-kui，mā beh khàng 起.....


Huê 手！


Tshiàng 聲！

Ing 暗轉去 a-pah a 母 hia 食飯，1 碗飯 bē-tsîng 食 suah 症頭 koh leh giâ，明明足想 beh koh ngeh 菜來食，suah 吞 bē 落--去，koh 直直起 ài 吐，sió tùn-teⁿ--tsi̍t-ē，心理 kap 身體 sio-ián，尾--a 無 i 法，只好拚勢 kā tshun ê 白飯 pê 了準 suah。

Tī a-pah a 母面頭前，tī 同學、老師、朋友 ê 面頭前，我足慣勢維持看--來好好 ê 款式，m̄ 是驚 in 煩惱，是足貧惰解 sueh，mā 無想 beh 聽「約伯 ê 朋友」hit 款 ê 安慰 kap 苦勸。

M̄-bat kap i tú 手 kah tsiah-ni̍h-á 出力--過，huān-sè 是 tse 病無足傷重，所以我 tsiah 有才調 ke-ke 減減 tú 敵，mā 1 部份原因是經過 thài 濟擺--a，開始 teh bân 皮--a。

足無想 beh 解 sueh hiah 濟，是 tī tsit-ê 帶成見 ê 社會--ni̍h，猶原 tio̍h 不時 tú 著 tsit 款應答，連法語課--ni̍h 就 bē 免得 the̍h tsit 號問題 leh 練習：quelle est votre situation de famille?


心內感覺怪奇，tse tī 阮 tsit-ê 年歲 ê 人來看，有影是 1 ê 足 lū-kū ê 問題。Aih！Lín 是 tsiah-ni̍h-á ài 問，我 beh 表達 ê 意思 suah 無 tī pro 有教--過 ê 詞句內底。只好 ka-tī 去查--a。

Taⁿ 了後，無 koh kā 酒當做工具，mā 無 ài koh lim 艱苦酒，m̄-nā 歹 lim，精神了後 koh tio̍h hîn 掛吐，bē hô，真正 bē hô。


對人生，我 tio̍h 按怎想 khah 好，beh 取 siáⁿ-mih 款立場？我若已經 m̄ 是 2 冬 iah 1 冬前 ê 我，按呢 tsit-má tsit-ê 我是 siáⁿ-mih 款款式？Kám 有 khah 好，想法 kám 有 khah tsām-gâm？


Tsit-ê 好，m̄ 是指符合別人 ê 期待、mā m̄ 是 beh 去遵 thàn 社會 àu-tah ê 規範，是想來去倒了後，我 ka-tī ê 價值觀，我對做 1 ê「人」 ê 要求，甘願著磨 mā 無 beh 放棄--ê，老老實實 teh「活」ê 要求。


「人」，m̄ 是「社會的 ê 動物」ē-tàng 說透流--ê，人，m̄ 是 kàu-hiā siū--ni̍h 1 隻 1 隻 ê káu-hiā，受債、合作、phah-piàⁿ kah 死。


歯車のひとつにならなくてはなぁ


我，是「我 ka-tī」。

自大學時代 kah taⁿ iáu 有連絡 ê 以早教會 ê 朋友，差不多是無--a，一直到 ná-tshan 像是兩月日前，tī 路--ni̍h tn̄g 著 1 ê，koh kā 我討手機 á 番 kap MSN，我有 hō͘--i-lah，人 huân 人，教會 huân 教會，無道理 suî kā 人起 khiàn 頭。


頂禮拜 i 總算 tī 網路頂第 2 擺 kap 我遇--著，to 我實在是 1 ê 真貧惰上線 ê 人，就 tsún 有上線，mā khah ài 掛離線展掩身法；i 開 tshuì 無 kah 第 3 句，就問我 kám ē tiàm 教會 kap i saⁿ tú，我 tsiah ka 講我 bē koh 去--a，理所當然 i 有問是按怎，tsiah 久 ê 代誌--a，實在足懶 si koh 解 sueh kui 大堆，kui 氣送 2 ê 連結麻煩 i ka-tī 看，是兩篇 tī 一倒水關係信仰 ê 文章，送--過了後，我有先 ka 會失禮，講：「寫了若有 khah 帶情緒，請諒情。」  I koh 緊 mé-mé kā 我講 i 絕對 bē，講 i tsiah 無 hiah gâu tio̍h 驚--leh 等等。


自 hit 工了後，無 koh 再連絡，i 人 mā 無 koh tsiūⁿ 線，電子批 mā 無，當然手機 á iā 無 khà--來，m̄ 知 kám 是真正 ka 驚--著。


我承認 tī in ê 印象內底，我 ê íng 過 kap tsit-má tiaⁿ-tio̍h 是 thang 比天差 leh 地，是講 heh 驚--in tsāi-tsuí m̄ 是我 ê 本意，我僅僅是 beh「是，就講是；m̄ 是，就講 m̄ 是。」（太 5:37）　信仰雖然 m̄ 是獨獨頭殼內 ê 項 mi̍h，總--是，若去相信想來去倒明明是 sio 踏 thut ê「道理」，kám iáu 有法度講是「老實 ê 信仰」？　He 是迷信 káⁿ m̄ 是？

Uí--a，我有允--你，雖 bóng 一般的講我足貧惰 kap 人食飯，我 mā 代先有 ioh 著你 beh tshuē 我講啥--a，總--是感覺 ē 出來你真 sàm-tām，加上約 tī 學校食晝，免 suá 位免 koh 另外 tshiâu 時間，我 suah 無拒絕 iah 無 làng-káng ê 理由。


真失禮自頭到尾我無法度用我 ka-tī ê 故事來做比論，我甚至無按算有 1 工 ē 對你拆白，kan-taⁿ 送你 1 句「對 ka-tī 老實」，向望 i 就親像你講--ê，對你足有幫贊。


可惜有 tsi̍t-kuá 代誌我無法度用話句教--你，關係 人 kap 艱苦 beh 按怎 tàu-tīn，有時 tsūn 是「結 lan」kap「看法」ê 問題，我 ê 心生 1 iân 硬皮，是顛倒 tio̍h 煩惱，忍痛 beh kā li̍h--開，甘願流血，hō͘ 靈魂有 khang 縫 thang tháu-khuì ê 程度；看法--leh，1 粒慣 sì 拖磨 kap phah-nuá ê 心，早就發翅--a，艱苦 ê 網 tsiah kā 我 hò͘ tsiūⁿ 肉砧，目 nih 久，心已經 uì 運命 khiā kui 排利劍劍 ê 尖牙中間 bùn 走，koh-khah 血 sai-sai，mā 有才調 hioh tī kuân-kuân ê 樹 ue 頂，唱調 m̄-tsiâⁿ 調 ê 歌詩。


不思議か？少し変態ぞ！我希望你永遠 lóng m̄ 免學 ē bat。

Tsit 篇 kap 公領域猶原無關係，所講：「書寫 - 上尾 ê 步數」kap 世界、人類、國家、社會 lóng 無 tī-tāi，是記 1 ê 朋友 ê 經驗，hō͘ ka-tī，mā hō͘ 無 tú 過 ê 人 bóng 參考 bóng 聽。

I 無 koh tsing-tsông--a，是 ta-sò hō͘ i 輕 iô-iô、bē tiāⁿ-tio̍h，不時 tuè 風 liam-mi beh 往東、liam-mi beh 落南，i 是 1 粒沙塵，1 粒 tiàm 沙塵頂 kuân 細細粒 á ê m̄-tsiâⁿ 沙塵。


沙塵 lóng 是 tsa̍t 腹--ê，m̄-koh 無心，tsiah 看 i 緊緊 beh 趕 uì toh-tsi̍t 向，i kiám-tshái suah 即時 huan 頭，kah 若無心就無所謂信用 kap giâu 疑，等風 tòng-tiām ê 時，i 就 sīm--leh 無動無 tâⁿ，tī 半天頂也好，tī thô͘-kha-tau 也好。


只不過是 ta-sò，hō͘ i 輕 iô-iô，i gōng 想有 1 位出 tshî 潤 thang khîⁿ-uá--過，半冬、1 冬、5 冬、10 冬、或者是永遠？！若 tsit 粒沙塵，i tī 空間 kap 時間 ê 篙尺前前後後 hō͘ 風吹 suá，i 問 ka-tī 是 tio̍h iah m̄-tio̍h，總講是無 tiāⁿ-tio̍h。

就 tsún 報告 koh-khah 按怎寫 bē 出--來，學期尾同學 beh 約出去 hong-so--tsi̍t-ē，我 mā 是 ē phe 命去參加，因為，自幼稚園讀 kah 大學出業，我 lóng 一直足疏忽 kap 同學 ê 關係，tann koh 轉來讀冊，雖 bóng 我猶原 m̄ 是 hit 款好面前 khiā ê kioh-siàu，m̄-koh 有 1 種足想 beh kap 同學 khah 親 tshiang ê 意向，算是補償 ê 心理。


坐 tī Winnie Bear 邊--a，i 提醒我足濟代誌，有影真有參考價值，m̄-koh 我仝款想無實際 ê 步數去 liú-la̍k，kah 尾--a，mā 是 tio̍h 做上 bái ê phah 算，kā ka-tī 講「千算萬算，m̄ 值得天一劃！」天 beh 按怎劃，beh 劃好劃 bái，看破自然的 khah bē 心 gîng。


人生短短--a，m̄ 免想萬項事 beh 足心願，僅僅求過了有意義，有 phah-piànn--過就好。

做人 thiám ê 所在真 tsē，tsit 內底有 1 項就是：明明無可能 ka-tī 孤 1 人 teh 活，suah 直直想 beh 孤身 bih tī 巢窟--ni̍h，有形體 ê 巢窟、心--ni̍h 無形體 ê 巢窟‧‧‧‧‧想看 māi，走閃費氣費 tak ê khan-kha̍p、是 beh án-tsuánn kāng 時走閃 sio-liâm-tì-tuà ê 寂寞？


做人 thiám ê 所在 koh 1 項：親像夸父 jiok 日頭，永永 bē 到位，mā 永永無滿足，透早 kā hit au iáu-buē  lim--著 ê Starbucks 設想做 lā 金粉 ê 王母蟠桃汁，等 lim 落喉，無滋無味無 tánn 緊，koh ē ik 酸；Kán！Tse 無字無眼 ê 追 jip！！！