雙倒水別莊

He 是 1 ê 掛目鏡，koo-tsui koo-tsui ê tsa-bóo gín-á，因為怪病著磨，kui 身軀直直生瘤，醫生除去開刀，mā kan-tann 開刀 tsit-ê 治療方式，電視頂，i 講著病 giâ--起-來 ê 時，是 thiànn kah，尾--a bē-khat-kin 獨獨知影 huah：「我無 ài koh 活--a！我甘願死！我無 ài koh 活--a！」

今 á 日頭一工上著課，kap 同學 hām 學長有講 khah 濟話，tsi̍t-kuá 同學 leh 煩惱 ài 修外文課 kap 外文檢定合格 ê 畢業規定，煩惱幾冬 tsiah ē-tàng 卒業，koh 讀 ē 卒業--無。

Sancho 講，「‧‧‧hōo 人用柴 khit-á phah kah án-ne 有算侮辱--無，在我是無要緊--la，我致意--ê 是 hông phah kah kui 身軀 thiànn kah，tse 是我一世人 mā 無法度放 hōo bē 記--得-ê。」 

Tsi̍t-ē 精神，有鼻著 20 外冬前，hit-ê 熱天 ē-poo 日頭 ê 氣味，磨石 á ê thôo-kha 頂 kuân，冷氣 kōnn-kōnn 叫 ê 聲音，一家伙 á 睏 kah 十三殿去，無 koh tī-leh、失落 ê 天堂。

1 點鐘換 10 年，換目 tsiu 前 ê tshiah-ia̍h kap 空虛，身軀 ná 有百外支 báng-á 針 leh ui，肺管 pûn--出-來 ê 空氣，現現是透中晝 ê 紅毛土頂，tshia 倒 ê hit 盒 phōng 果牛奶發 kànn 酸臭 ê 稀微，頭 ua̍t--leh，kā 心內 ê 尪 á 頭 1 ê 1 ê iánn--過，suah 無 1 sian ē siânn--人，不過是暗頭 á ê 1 隻絕望 ê lāi-hio̍h，phah-khoo 飛 koh phah-khoo 飛，1 lìn 1 lìn，明明知 iánn，ta̍uh-ta̍uh-á uá 近，明明知 iánn，倒頭栽--落 ê hit 一位，輪迴 ē 驚--人，莫怪欣羨絕氣，永遠抽退，據在 i koh 來有幾 ê 熱--人，mài koh hiàm 我 peh 起。

1 lìn 1 lìn，1 lìn 1 lìn，ta̍uh-ta̍uh-á、liâu-liâu-á，tshik 近報頭 ê 大風陣，我 ê 翅股，是運命 ê 風信旗。Ta̍uh-ta̍uh-á、liâu-liâu-á‧‧‧

六十外億人 ē 按怎 sio-tú 頭，m̄ 是 1 ê 排列組合 ê 數學題，也為著 tsit-ê 起致，寂寞 ê 人走 tshuē，m̄-koh 普通人來講，koh 真 m̄ 願相遇無法度注文訂作，tiānn-tiānn 是想 beh kā tú 著 ê 人翻新，「甘草自來甜，n̂g-nî 依舊苦」，上帝  to 無 beh 頂真翻--a，人若 lia̍h-tsún ka-tī khah gâu 過上帝，註該 beh 敗。

任何一爿已經無意愛--a，he 當然是 bē 行--得，總--是，若相意愛，suah 學 bē-hiáu 接納對方 khuê-hâi 腹內生成 ê 款式，卻是提錢買奴才來做，sian m̄-thang！

伊講：「你 lia̍h-tsún 你愛 tio̍h 天使，窮實你是 teh 崇拜 1 隻猴 san-á。」

Said, "You think you love an angel; It's a monkey you adore."

（《El Ingenioso Hidalgo Don Quijote de la Mancha》；第 1 部第 11 章〈Antonio ê 情歌〉；V.T. Lâu 台譯 ；John Ormsby 英譯）

屬 tī tòo-sàng ê 日子到--a，我明明知 iánn i 並無欠--siánn，koh 我 mā m̄ 知 tio̍h 送--siánn tsiah bē 親像 the̍h 豆干孝媽祖，想來去倒，尾--a 猶原是買 1 ê 6 吋 ê 雞蛋糕 tńg--去（我 kap a-pah a-bú 3 ê 人食 iáu 嫌 siunn 大--leh）。

有 tsi̍t-kuá 病， 本身 ê 症頭 kap 拖磨 lia̍h 外，koh 帶臭名。親像精神病、心理病 kap 風痛，就是 tsit-lō 例。