雙倒水別莊

Hit-kang kap 1-ê tông-sū tī pān-kong-sek goā-kháu chē leh thó-lūn tāi-chì, tú-hó lēng-goā 1-ê tông-sū kiâⁿ--koè, choaⁿ-á káng--khí-lâi. Āu--lâi chiah lâi ê tông-sū kóng-ti̍oh chit-má cha̍p-chì ti̍oh chò sím-mi̍h kò·-sū chiah ē toā-bē, i kóng "chhut-lō·" sī sīong ū-siau ê chú-tê, in-uī hiān-chhú-sî ê Tâi-oân-lâng lóng teh hoân-ló ka-tī ê gín-á, bô-hoat-tō· khak-tēng in sī m̄-sī ē-tàng koè-ti̍oh pí ka-tī koh khah hó, kám ín ū thâu-lō·, chit-ê kok-ka kám iáu ū bī-lâi téng-téng.

彼工佮一兮同事佇辦公室外口坐哩討論代誌，拄好另外一兮同事行--過，choaⁿ-á 講--起-來。後來才來兮同事講著即馬雜誌著做甚物故事才會大賣，伊講「出路」是上有銷兮主題，因為現此時兮台灣人攏塊煩惱家己兮囡仔，無法度確定怹是毋是會當過著比家己閣卡好，咁允有頭路，即兮國家咁猶有未來等等。

伊講著真頂真，若親像這已經毋是商業兮問題，赫兮話，根底就是伊兮心內話，因為按呢，煞予我袂克根去想著咱台灣兮報紙佮電子媒體兮漚手路。

"Tâi-oân gín-á ê Eng-bûn têng-tō· tiàu-chhia-boé", "Tâi-oân ê keng-chè teh kiâⁿ- lo̍h-kiā", "Tâi-oân sán-gia̍p ê ki-su̍t teh beh su--lâng-ah", chiah-ê tê-bo̍k sī m̄-sī chin bīn-se̍k, bô m̄-ti̍oh, che tō-sī lán ê pò-choá kap tiān-sī chia̍p-chia̍p teh pò ê siau-si̍p. In-uī it-poaⁿ lâng lóng chiâⁿ bô-gī-nīu, khoàⁿ kā lâng heh-kiaⁿ ê mi̍h piàn kah chin sî-kiâⁿ, bē-su hioh-khùn-ji̍t khì Lio̍k-hok-chhoan ia̍h-sī Disney Land chē hui-thian-chhia, kiaⁿ kah thìong kah, boé--ah, soah kā chiah-ê mi̍h-kiāⁿ tòng-chò sū-si̍t teh kāu-chhau-hoân.

「台灣囝仔兮英文程度吊車尾」、「台灣兮經濟塊行落崎」、「台灣產業兮技術塊欲輸--人-阿」，即兮題目是毋是真面熟，無毋著，這就是咱兮報紙佮電視習習塊報兮消息。因為一般人攏誠無藝量，看共人嚇驚兮物變佫真時行，袂輸歇睏日去六福村抑是 Disney land 坐飛天車，驚佫暢佫，尾--阿，煞共即兮物件當做事實塊厚操煩。

Kū-nî Bí-kok ū 1-phì kì-lio̍k-phìⁿ hō-chò "Bowling For Columbine", tiān-iáⁿ kàm-tok Michael Moore ēng chit-ê iáⁿ-phìⁿ kā Bí-kok chin-chē khiàm-tiám kap būn-tê chò-chi̍t-ē thé-thak, hō· lâng khoàⁿ-ti̍oh hoah- hó. Hit-phìⁿ tiān-iáⁿ lāi-té, ū 1-toāⁿ góa ìn-sīong chiâⁿ chhim, sī Michael khì hóng-būn Marilyn Manson, in-uī chin chē lâng kóng Marilyn chhìuⁿ ê koa kài po̍k-le̍k, chiah ē hō· siàu-liân-ke kha̍p-bē-ti̍oh tō gia̍h chhèng toāⁿ sí lâng.

舊年米國有一片記錄片號做「Bowling For Columbine」，電影監督 Michael Moore 用即兮影片共米國真儕欠點佮問題做一下體剔，予人看著喝好。彼片電影內底，有一段我印象誠深，是 Michael 去訪問 Marilyn Manson，因為真儕人講 Marilyn 唱兮歌蓋暴力，才會予少年家磕袂著就舉銃彈死人。

Marilyn èng ti̍oh chin chhù-bī, i kóng: "lán ê chóng-thóng kā chà-toâⁿ khian tī pa̍t-kok peh-sìⁿ- lâng ê khiā-ke-chhù, m̄-chia̍h-jīn koh tián-hong-sîn, lán ê seng-lí-lâng khò heh-kiaⁿ teh thàn-chîⁿ, kā lâng kóng lí nā bô ēng chit-ê pó-íong-phín, lí tō ē in-uī bô-kàu súi khì hō· lâng pàng-sak, kiat-kó taⁿ ta̍k-ke kan-taⁿ koài goá chhiùⁿ ê koa?"

Marilyn 應著真趣味，伊講：「咱兮總統共炸彈掔佇別國百姓人兮徛家厝，毋食認閣展風神，咱兮生理人靠嚇驚塊趁錢，共人講你若無用即兮保養品，你就會因為無夠媠去予人放拺，結果今逐家干凋怪我唱兮歌？」

Michael Moore hoan-thâu lâi khoàⁿ Bí-kok ê muî-thé, soah hoat-kiàn in mā teh kā lâng háng-heh, sím-mi̍h Lâm-bí-chiu ê sat-jîn-phang--lah, phōng-kó lāi-té ū chhàng to-mî--lah, Halloween chhut-hiān ū-to̍k ê thn̂g-á--lah, kiàn-pái lóng kóng kah ū 1-ki pèⁿ, bē-su thiⁿ-tē-boé--ah, lóng bô n̍g-bāng--ah, kiat-kó--leh, kha̍p-ti̍oh chīu sai-kong má-î, kāng-khoán chi̍t-tīn lâng sìn-tauh-tauh, ū-koan-hē ê mi̍h-kiāⁿ bē kah chhiāng-chiāng-kún, seng-lí-lâng sī chhìo- hai-hai. Tán koè-liáu-sî soah-liáu-tāi, chiah koh pian lēng-goā 1-ê kò·-sū lâi láu kāng chit-tīn gōng-toā-tai.

Michael Moore 翻頭來看米國兮媒體，煞發見怹嘛塊共人哄嚇，甚物南美洲兮殺人蜂--啦，蓬果內底有藏刀鋩--啦，Halloween 出現有毒兮糖仔--啦，見擺攏講佫有一支柄，袂輸天地尾--阿，攏無向望--阿，結果--哩，磕著就司公媽姨，共款一陣人信篤篤，有關係兮物件賣佫沖沖滾，生理人是笑咳咳。等過了時煞了代才閣編另外一兮故事來咾共即陣戇大呆。