<< 欲死tōng-hàiⁿ | 回blog首頁 | 弱勢語言書寫tuaⁿ-tiah ê必要性 >>

June 14,2009

咱 / In 想像ê Ke-si


Tsîng-kah-taⁿ，對語言政策ê口角ē-sái講就是「文化功能論」kap「溝通工具論」ê戰爭，tī tsit-ê tshia-puâⁿ ê中間，「文化功能論」內底koh有2派teh拚館，也就是tsit-ê「功能」kám有包括「國家認同」kap「主體建構」，換話來講，就是teh諍「國家認同」kám 定著kap「某物款語言ê選擇」有tī-tāi？


就親像拙者tī較早ê文章捌講--著--ê，Anderson伊ê答案是：「無tī-tāi。」對歷史事實來看，咱ná像猶無法度ka駁喙，雖罔有越南、韓國tsit款支持「語言kap認同結構相黏蒂帶」ê例，總--是uì社會科學ê角度來看，少數ê反例的實無才調tsiâⁿ做證據。


Tsit站仔馬英九「識正書簡」ê提議所lā起社會濟濟ê反應拄拄thang做1个觀察點，台灣主體民意對繁體中文ê支持kap感情，證明「語言ê選擇」明明是「非理性」ê行做，koh較是kap「國族認同」saⁿ分拆--ê (根據官方ê調查，已經有超過65% ê台灣住民認為家己是台灣人，m̄是中國人)，專業ê學術研究者kap了解歷史ê人犯勢對tsit-ê情況ē感覺也好笑也受氣，m̄-koh「理性」ê倒彈對「非理性」ê「事實」是狗吠火車，無khah-tsua̍h--lah！


台灣ê國族運動者，ài緊kap通世界新世代「功利化」ê思考模式saⁿ tsih-tsiap，毋通kan-taⁿ直歕hit支罕有人信táu ê「道義、真理」老鼓吹--ah！


台灣ê母語運動者，mā tio̍h思考家己ê動機kap策略，目睭juê-juê--leh，kā現此時台灣國族想像ê ke-si已經是「台灣華語」ê現實看hōo清，kā咱「為何beh戰」、「按怎爭取」想hōo真，tsiah袂直直uì社會hâm趨勢脫線，變做無人beh hiù、永遠無才調kā邊墘捒去中央ê落衰運動家。

Posted by lausenghian at 樂多Roodo! │15:13 │回應(12) │引用(0) │語言
樂多分類：文字創作 工具：編輯本文
Ads by Roodo! 

引用URL

http://cgi.blog.roodo.com/trackback/9222889
回應文章

Nā bú Tâi-uân jio̍k-sè gí-giân ê ūn-tōng-tsiá lóng ū lí tsit-khuán kak-gō͘ m̄-tsai ū juā-hó.

Sī kóng thiàu-thuat kok-tsok(Nationism) kap gí-giân ê khian-liân liáu-āu, jio̍k-sè gí-giân ê tshik-lio̍k sī siàⁿ, guá iáu siūⁿ-bô.

I̍t hong-bīn guá ǹg-bāng ē-sái kap tsē-tsē tíng-po͘ kè-ta̍t ūn-tōng koh-tsài kiâⁿ sio-uá, bô-lūn sī jîn-khuân, khuân-pó, tso̍k-kûn tíng. Koh tsi̍t hong-bīn khuàⁿ lán ê gí-giân ē-sái koh-tsài-seⁿ, tsiâⁿ-tsò uân-tsíng ê gí-giân.

Tsóng-sī nā kóng tsit-khuán uē ê lâng, ē-sái tī Tâi-uân hó-hó-á khiā-khí, thuân tsit-ē tso̍k-kûn ê gí-giân kap bûn-huà hō͘ āu sè-tāi, m̄-tsai ū luā-hó.
Posted by pektiong at June 14,2009 23:31

pektiong:

Tsioh-mng li e "tíng-po͘" kam-si phah liau u ting-tann?
Posted by Amo at June 15,2009 08:05

Pek-tiong兄：

你所舉「人權」、「環保」kap「族群」等等，我感覺就是真好ê切入點。

若母語kap台灣國族想像已經分拆，咱著ài換1種taⁿ台灣人聽有、mā贊成ê論述，比論：「人權」、「生態」、「環保」猶原是這个世代ê共同理想，咱確實ài想辦法kap tsiah-ê運動結合。

咱ài強調--ê，是母語成做國家、社會ê重要資產，特別ài大大宣傳母語對咱kap咱ê囝孫ê「實際」利益，甚至kap市場ê利純來結合，ka商品化，做趁外匯ê生理。

咱看國外ê例，歷史上Èire(愛爾蘭)ê Gaelic League，一起khiàn mā毋是用「國族」做號召--ê，in透過文化、生活ê層面，吸收「統派」(Unionists)人士加入聯盟。

Koh再講，今仔日ê Èire ê主權地位已經無thang懷疑，m̄-koh，in ê主要語言猶原是英語，毋是in ê族群母語Gaelic，tse，kám無啥物啟示？

咱愛咱ê母語，若kan-taⁿ是因為beh用i來做kô͘-khīng台灣主權ê ke-si，按呢咱對母語ê愛是無夠--ê，而且，這種無夠額ê愛，mā註定運動策略ê khiap-sì kap未來ê失敗！
Posted by Taokara at June 15,2009 09:20

Guá 想tio̍o̍h-ê 是，ná 講 hō͘ 少年儂感覺用台羅是一款流行，àn-ne tio̍h 成一半 ah．

M̄--bián ta̍k-hāng lóng ài hia 嚴肅．

O̍h kiau sńg tau-tīn，guá 看 khah ū效．
Posted by 無諍金剛 at June 20,2009 01:24

無諍金剛：

你ê想法kap我有saⁿ-kâng，「hōo台羅變做少年á ê流行」就是「功利化」ê策略ê 1款，o̍h kiau sńg鬥陣，mā是仝款ê道理。

我所認為taⁿ無路用ê做法，是kan-taⁿ講「道義、歷史、理想」，因為taⁿ ê少年人無teh信táu tsiah-ê物件--lah！Tsiah-ê物件m̄是毋好，mā m̄是袂使講，毋過咱ê戰術、戰略ài有層次、做區分，án-ne tsiah有戰贏ê可能。
Posted by Taokara at June 20,2009 10:58

plurk tíng-kuân ū buē-tsió lâng teh siá/tha̍k/o̍h lô-má-jī á-sī o̍h tâi-gí. (pí twitter/Buboo khah-tsē) plurk put-tsí-á "interactive", huān-sè sī thui-sak tâi-gí/lô-má-jī ê hó thong-lō͘.
Posted by pektiong at June 20,2009 17:45

Pektiong hiaⁿ:

Guá tsàn-sîng lí ê khuáⁿ-huat. M̄-koh sńg Plurk ài khai put-tsí-á tsē ê sî-kan, guá si̍tt-tsāi bô-tsâi-tiāu...Orz
Posted by Taokara at June 20,2009 17:52
si̍t-tsāi su-iàu "gí-bûn-huat", writing style guide, kù-huat pang-bô͘, khah tsiâu-tsn̂g koh bô pak-á bī ê sī-huān-sìn(示範性) gí-liāu-khò͘.
Posted by pektiong at June 20,2009 17:54

Pektiong hiaⁿ,

Lí kóng-liáu ū-iáⁿ tsìng-khak kah...

Guá tiāⁿ-tiâⁿ ē siūⁿ-kóng: lán ê lâng tī ha̍k-su̍t-kài bô kàu phah-piàⁿ, tsiah ē kàu taⁿ iáu bô 1 phō ū kè-ta̍t ê gí-huat-tsheh. Koh khah bián kóng tī kù-huat-ha̍k ê líng-hi̍k, lán tsha-put-to mā tshuē bô 1 ê khah ū íng-hióng-li̍k ê lâng tī hin.
Posted by Taokara at June 20,2009 18:01
Sǹg plurk, sǹg sī kap "tuì tâi-gí iû-guân ū hìng ê lâng" puâⁿ-nuá, khuàⁿ kám ū tsâi-tiāu liú khah tsē lâng lâi "使用" Tâi-gí. Huâiⁿ-ti̍t pún-tsiâⁿ tio̍h ū leh sǹg tsiah-ê ū ê bô ê.

Mā siūⁿ-beh siá plurk robot lâi hòng-sàng tâi-gí. (tsi̍t tiám-tsing tsi̍t-kù tâi-gí....)
Posted by pektiong at June 20,2009 18:02
Ji̍t-pún sî-tāi ji̍t-pún-lâng siá ê tâi-gí gí-huat ê tsheh si̍t-tsāi tsin tsán. Huan-siá tsuè tâi-gí m̄-tsai ū juā-hó.
Posted by pektiong at June 20,2009 18:05

Pektiong hiaⁿ,

Guá tshiú--ni̍h ū李獻璋kap陳輝龍siá ê 2 pún gí-huat tsheh.

Guá nā ū-huat-tō͘ tha̍k khah kuân, hi-bāng ē-tàng tâu-ji̍p gí-huat ê gián-kiù, mā kā sio̍k-tī lán tsit-ê sî-tāi ê gí-huat tsheh ka siá--tshut-lâi.

It-ti̍t teh tsíng-lí Tâi-gí kap Huâ-gí bô-kâng ê gí-huat hiān-siōng, nā ē-tàng tsíng-lí hō͘ tsiâu-tsn̂g, ē tuì taⁿ ê ha̍k-si̍p-tsiá thê-kiong tsin hó ê tsham-khó, in-uī taⁿ Huâ-gí si̍t-tsāi thài tshìng--a.
Posted by Taokara at June 20,2009 18:13
  


回最上方