雙倒水別莊

頂禮拜六中晝食飽，無心tsiâⁿ隨閣去關踮圖書館，自按呢據在伊ka踢去茉莉舊冊店，攏毋知煞會因為按呢去抾著寶。

蹛ê所知傷阨揳，閣買冊是足鎮地--ê，若欲買，我攏會真躊躇，姑不將著買，嘛會仝時想看有啥物冊通賣--出-去，共空間閬--出-來，究真咱毋是teh開圖書館，一寡圖書館有收ê冊，用--著ê時才去借就好，較免hē無路來無--打-緊，徙岫ê時閣搬甲歪腰--去。

總--是我一下看著這本冊ê時，無加想就ka捎--轉-來-矣，伊是1本我較早捌佇遮提起ê冊：Antonio Gramsci ê Prison Notebooks，當然這毋是我讀無法ê Italia原文，嘛毋是英文譯本，是谷風出版社佇1988年出版ê繁體中文譯本，雖罔翻譯者不明，毋過uì伊ê註解佮文句來看，毋是彼款濫糝翻ê低路貨。

英文版價數驚死人懸，我負擔袂起，一直teh等圖書館買--來才欲去借來讀，若進前我攏無注意著台灣有這个1988年ê譯本。

較早我討論著這本冊ê時，有捌質疑伊ê經典地位是按怎來--ê，毋過這擺閣掀，讀著譯者佇上頭前ê話頭，有致覺著Gramsci不止仔出腳ê才情，伊佇監牢--裡，無齊全ê參考冊佮資料，閣受著嚴格ê監視，煞有法度寫出遮爾仔內容豐沛，引用濟濟，分析利劍劍ê文集，內底ê思想，閣會對後--來ê學者產生啟蒙，這有影不可思議。

若換做是我hőng hiat佇監--裡，參考資料乏乏，我是有才調寫出啥貨？我tsiaⁿ憢疑。