<< 【新聞稿】台南縣市、嘉義縣市政府聯合主辦台語研習佮檢定 | 回blog首頁 | 感想 >>

May 22,2009

咱ê話語毋是島嶼ê監囚


【請參考教育部台灣閩南語常用詞辭典】

下跤是一寡佮阿天兄關係Hō-ló話ê討論，阿天兄ê意見集中佇回應，若我ê部份有閣修削過。


「漢字ê使用」佮「海外ê tshui廣」這兩點因為牽涉著國族認同ê運動手路佮範圍界限，所以我一直無ka講kah足明--ê。


台灣ê現況就是：一般人看著羅馬字，就親像看著英文仝款驚kah欲滲屎，叫in 學是艱苦罪過，若漢字--leh，學理上伊是比羅馬字較困難無毋著，毋過人煞興tshuh-tshuh袂去排斥，這个社會現實真無理路，毋過煞是實拄實ê社會現實，若欲kā台語文捒入去社會大眾ê中間（包括透過有市場ê產品），漢字是無必要嘛無應該走閃--ê。欲tshui捒羅馬字，著待時機，毋通為著欲滅漢字，自按呢kā台語文發湠ê火種攏紲拍化--去。


海外市場，在我來看，只要是講咱ê話，也彼个方言差無大甲變做兩个語言ê地區、人民，攏值得佇語言、文化佮價值觀ê層次去爭取，到時台灣若kā中華民國結果擲捒，我甚至感覺無排除予任何有意願ê tsiah-ê講仝話ê地區、人民做伙來起國。


除tse以外，佮近代ê民族國家「1語1國」ê型模無仝，現代國家是國籍做認定ê多元組合，台語是台灣主要--ê、自然ê共通語，但是台灣ê成份毋但這个，這點是咱另外愛不時囥佇心--ni̍h--ê。


＊　　＊　　＊　　＊　　＊　　＊　　＊


語言除了人腦內底深層 formal ê結構運作以外，會使講就是1个「社會」（人佮人ê tsih-tsiap、組合）產品，tsit款項mi̍h佮自然科學ê「理路」無siâng，毋̄是彼个單純ê「邏輯計算」，嘛毋是「合理」、「無合理」就有才調通解說--ê。


我想咱ê話著tsiâⁿ做有跨國影響力ê話，咱ê文化著有法度做輸出，人韓國都有這个野心--a，in韓國話佇世界上閣無親像咱有tsiah闊ê分佈、tsiah濟ê人口--leh，咱若行銷佮包裝做了讚，應該袂輸--人。


咱著愛有這个遠景，毋通干焦kā咱ê母語當做「台灣國族運動」ê旗軍仔爾爾，無--tsiá，咱ê話緊tsua̍h慢會親像Éire語（Irish）仝款，國族雖罔獨立建國成功，母語煞綴leh hōo人橋過拐抽，結果就是母語仝款袂興，永永無才調釘根大欉！


真期待有tsit款有眼光、有錢水閣有才調ê生理人！

Posted by lausenghian at 樂多Roodo! │23:51 │回應(2) │引用(0) │語言
樂多分類：文字創作 工具：編輯本文
Ads by Roodo! 

引用URL

http://cgi.blog.roodo.com/trackback/9046043
回應文章

講着「字」 chit 点，我感覚通世界 ê 社會 lóng 無 saⁿh 理路，kanna「情路」niā'ā。Lán 中間 kám 有人主張用漢字（全漢）去寫 hōló 話，m̄ koh 主張 Tâi'oân kah 中国一 pêng 一国 ê？Kám 有人主張全 lô，m̄ koh 無信 táu 紅毛文化 phēng 唐人、Ìntō͘ 人 ê 文化 khah chán ê？

Honggiân chha

我 ê 經驗 sī，海外 teh 講 hōló 話 ê 人 lóng 真尊敬 Tâi'oân kap 下門 chit 两 ê 所在 ê 話，無論 teh 唱 KTV ahsī teh 看連續劇，in 真接受 Tâi'oân kap 下門 ê hōló 話。

Siōng 要緊 ê 種差 sī 外來話，逐所在 ê 外來話差真 chē。

Lán nā beh 起一 ê 国際 ê hōló 話媒体，lán 会 sái ùi 两 khám 站來過：

第一站，盡量使用傳統 ê hōló 話，mài chham 華語、日本話、eng 語等等，因為 kanna he 傳統、正統 ê hōló 話 siōng 会通！

第二站，暫暫開始 mài 想 hiah chē，電視台 ê 員工照平常來講話。

第三站，閩南 kah Málai'iá hit pêng ê 人 mā 学会曉 chai'iáⁿ「asálih」、「khongkuli̍h」kah「iûkio̍k」，lán Tâi'oân 人 mā 学会曉「balú」、「máná」、「sukah」... （其実，siōng 尾項 tī Tâi 華詞典內底已經有 ah。）


政治方面


但是台灣ê成份m̄-nā tsit-ê，tsit點是咱另外ài不時khǹg tī心--ni̍h--ê。


Tio̍h！Lán 美麗島 m̄ niâ 有 Tâi'oân 話，「Tâi'oân 話」mā m̄ niâ 有 Tâi'oân。

Hōló 話 ê 地盤包括两 ê 全世界 siōng 要緊 ê 海峽：Mala̍kkah 海峽 kah Tâi'oân 海峽。除了 eng 語，hōló 話 iáu sī Asiā 東南部 siōng 会通 ê 語言！尤其 hōló 話 + 潮州話。M̄ koh 两種語言差無 joā chē。

Hōló 文化 sī 海 ê 文化，taⁿ i sī 島 kah 海港 kah 海口所在 ê 文化，i sī senglí 人 kah 拜 Má 祖 ê 人 ê 文化，i ê 政治 kah 現代民族国家 ê「種田飼兵 á」ê 政治定着差 kài chē。

Sengkapo͘ 舊年出一本冊叫 "Towkay ho seh bo?"（Thâuke hósè bô），bînnáchài 有閒 chiahkoh 轉來 chia tah 一寡資料。

天
Posted by Taokara轉貼 at May 22,2009 23:53

逐工 teh 無閒，無 thang 回批。
我想，ùi senglí 來思考 lán ê 運動，he sī kài 正確 ê。

聴講香港 ê 廣東文 m̄ sī 三暝三日 ánne chhèng 起來 ê。
第先 kanna 幾 lō 字 chhàng tī 華語文章內 niā'ā。
Koh 來開始 kui 句 kui 句 ánne iā 落去 ê。
Kui 篇文 lóng 用廣東文寫 ê，he sī 無幾 lō 冬前 khah 開始有 ê，kàu taⁿ 還（oân）ná 無 chē。

重点：廣東文 sī 漸漸來 teh 勇 ê。Chitmá tī Tâi'oân，華語文章內底 chhàng hōló 字 ahsī hōló 話句 ê 情形 kám 有 jú 來 jú chē？我感覚有。

Koh 有一 ê 重点：Tī chit khám 站，tī Tâi'oân，nā beh chhuisak hōló lômá 字，senglí 定着 pháiⁿ 做。Ài 先盡量使用漢字，包括華語及漢文內面無 teh 使用 ê 漢字（chhan 像「厝」）。M̄ koh lômá 字 tī 南 pêng（Sengkapo͘ 及 Málai'iá）hoānsè sak 会 tín 動。

Lán nā 有得着一寸，lán 着 koh 來搶 he kui 尺。

M̄ koh kāng chit ê 時間 lán mā 会 sái tī 别位 thâi kui 尺。

Lán ài 相着海外 ê hōló 話 ê 市場：Sengkapo͘、Málai'iá、婆羅洲、Huili̍ppin、閩南，市場 jú 闊 m̄ chiah jú 好。

Tâi'oân 人及 Tâi'oân 文化 tī hiah'ê 所在，名聲実在 bēbái！

＊＊＊

Lán ài 相着 25 - 45 歲 tapo͘ 人 ê 市場。
因為 tapo͘ ê 対 hōló 話 khah 有好感，kā i 看 khah koân，tī Tâi'oân sī ánne，tī Sengkapo͘ mā sī...
Lán kám 有才調設一 ê 運動新聞兼看「chhio 母」（súi 西施）ê 電台，行銷 Tâi'oân、閩南、星及馬等等...
着 lah，想着重点：
SEX SELLS.

Pinnn̂g 西施賣 pinnn̂g 賣真 chē。
Hōló 話 mā ài 有西施來 tàu sak--neh。

天
Posted by Taokara轉貼 at May 22,2009 23:55
  


回最上方