雙倒水別莊

雖然猶太人是通世界罕得有，亡國二千年了後 koh 復振母語 ê 民族，m̄-koh 大多數 ê 猶太人 kan-taⁿ 承認舊約 39 卷冊，並無承認新約 27 卷是上帝 ê 啟示。

文藝復興 ê 時，上 kài 反對母語書寫，支持獨尊拉丁語--ê，mā 有 1 陣真支持《聖經》，認同《聖經》 ê 教會人士。

我 án-ne 講（包括 tsìn 前所分享--ê），並 m̄ 是 beh 侮辱《聖經》，或者是懷疑《聖經》ê 真實性（tse 完全是另外 1 ê 題目）。　我所強調--ê，kan-taⁿ 是「平平是使用、解讀聖經 ê 人」，suah ē-tàng tī 無仝時期，利用聖經對 kāng 1 件代誌，發表完全無仝 ê 價值觀 kap 論點，tsit-ê 中間，一定是「利用聖經 ê 人」有問題，而且 tsit-ê 問題真大，siōng-kài 致重《聖經》ê 教會無應該無重視！！！應該翻頭來想，按怎看待《聖經》，按怎解讀《聖經》。

真歹勢，家己tsông--入來……
看著你這三篇＜多語言ê神學討論＞予我雄雄對家己最近常在咧想的問題感覺真著驚，趕緊tshūe一kúa資料來舞清楚家己的想法。《聖經》原本就是一本隨在人解說的冊，歷史上利用《聖經》文字來舞弄的人不計其數，問題是若牽涉著「信仰」，應該就毋是kan-taⁿ是《聖經》解說的問題爾爾。是牧師的王貞文有一段文字按呢寫『聖靈幫助教會以不同的道路去接近需要福音的人，使教會不停留在單一的、刻板的宣教策略中，而是不斷地激動我們，接受新的挑戰，勇於改變自己，在不斷的對談中，活潑的生長。因為這樣，我們才可能脫開「巴別」的詛咒。』（王貞文《櫸樹裡的基督》，p.23）我想，貞文牧師佇文章內底並無將《聖經》內底「巴別塔起造」的這段文字做sioⁿ過濟的詮釋，伊將重點khǹg佇「聖靈」。『聖靈降臨的祝福，是讓我們由單一、制式，卻分裂的狀況，進入多元，多彩，卻合一的生命。』
Nā是欲ùi《聖經》內底去tshiau-tshūe tse濟濟的語言kám是上帝的旨意？kám是上帝對人直接的恩典？我想，我會ùi基督教宣教的歷史落手，去觀看tsia濟濟的傳教士去到別的國家為家己的信仰所付出的辛勞。

A-Hun,

多謝--你。

我寫 tsit 3 篇 ê 本意，是 kan-taⁿ beh 討論「獨獨 uì 聖經 kám ē-tàng 看出多語文化 ê 價值」，所以 tsiah ē 無去牽涉著其他 ê 看法 kap 資料。

關係「信仰」kap「聖經 ê 闡釋」，若 beh 利用教會 ê 歷史 kap 傳統，咱著先想看 beh 用 kah siáⁿ-mih 款程度。

我 ē 按呢講，是因為新教 kap 天主教之間，對信仰 ê 看法之所以有 tsing 差，就是因為對「教會傳統」kap「聖經」之間角色 kap 輕重 ê 理解、採取無仝所致。

以上請參考。

認真講起來，tī你第二篇「聖經內底 kám 有教示咱寶惜母語，尊存、tshui 展多語文化？」這個問題hām「獨獨 uì 聖經 kám ē-tàng 看出多語文化 ê 價值」，其實是加問的，因為不管是有亦是無，攏是隨在人去解釋；顛倒是「咱 kám 有法度 uì 聖經 ê 內容，去發展、發湠，講出 1 套寶惜母語，尊存、tshui 展多語文化 ê 價值觀」這個問題我感覺khah趣味。
因為我佇台灣的長老教會有看著這個部分的拍拚。
希望你bē感覺hām我對話親像『雞同鴨講』

Bē--lah，真歡迎做伙討論。

我是 teh 想，咱若 beh uì 聖經來發展出 1 套論述，按呢，伊 ê 正當性 tī toh？

就親像你講--ê，聖經自古早就有人 the̍h 來做材料發展、支持 ta̍k 款 ê 學說、思想，結果，聖經 suah 替濟濟好代（以咱現今 ê 眼光來看）以外，mā 替濟濟惡質代（以咱現今 ê 眼光來看） 來背書。

咱 beh 利用聖經 tsìn 前，kám 免先考慮--tsi̍t-ē，是聖經 teh 講話，或者是咱 teh 講話，咱，是尊重聖經，或者是 kā 聖經當做 ke-si？