雙倒水別莊

拆白講，tsit 20 萬字就是陳雷（吳景裕）ê 大河小說《鄉史補記》，講 in 撒（suah） tī 赤道（tshik-tō），是因為 tsit 20 萬字 1 字 1 字 koh 1 tsuā 1 tsuā lóng 燒滾滾熱 phut-phut，差不多 tshuē 無 làng-phāng thang hō͘ 讀者 hioh 喘，tse 咱講熱館了後就無 tshìn 場--lah，ta̍k 台 lóng 是籠底戲，無 beh kap 你 huē hit hō 好酒沉甕底 ê 臭酸步，i tsit 齣是 tsi̍t 起 khiàn 就盡出好酒一直到路尾--ê。


寫作 ê 人有時 tsūn ē 費心 tsiâⁿ beh hō͘ 戲文有起落、有寒暖，huān-sè 是陳雷好手勢，初初 1 間三進 ê 深落大厝 siâⁿ 人目 tsiu m̄ 甘 kheh，tú 過 1 ê uân-kong 門 niā-tiāⁿ，liam-mi 有金厝頭、銀厝角看 kah 人 tshuì 合 bē 倚--來，tsiah 想講 kiám-tshái 無 koh khah lè-táu--ê-a，ua̍t 轉身 suî 是五彩樓閣疊 kuân tshìng tsiūⁿ 天，to iáu buē 去 sîn nuā--leh，hit pîng 頭，出 1 棟雕花刻鳥生真活 lia̍h ê 大宅 liòng 來 tī 目 tsiu 前‧‧‧‧‧‧‧‧‧