雙倒水別莊

我 tiāⁿ-tiāⁿ lóng 想講破病是假--ê，是我 ka-tī teh 假佯做可憐 ê 款式。Koh 有當時 á，我 ē 親像 beh kap i sio 戰，lia̍h-tsún ka-tī 是 Beautiful Mind 內底 ê John Nash，病好 bē 原全，就 ta̍uh-ta̍uh-á 學 beh 按怎 kap i tàu 陣，按怎 kap i piⁿ-pui̍h。

我有影想 i 是假--ê，所以早起 khiā tī 賣銅鑼 ê 受付頭前，我 thiau-tî 違逆 ka-tī ê 感覺，明明無 siáⁿ 胃口，suah kāng 款點早頓 beh 食，我 kā ka-tī 講：「我 beh 食，我 beh kap i 對 tu，我 bē 輸！」


結果桶盤 phâng 去坐 tiāⁿ，lim 頭 tsi̍t tshuì ka-pi 就去 tsa̍k--著　。


我足拚勢「吞」mi̍h 件，有 kā hash brown tsiâu「吞」，koh 來 beh「吞」sausage mcmuffin，tsiah 食 tsi̍t 半，無張 tî 感覺胃--ni̍h 有 1 粒重 sìm-sìm ê 石頭，直直 leh hùn 大；Hngh！！！我 tsiah 無 teh 信 táu--leh！硬 beh koh 吞，無 pān-phue nâ 喉 suah 雄雄束--起-來，已經哺 kah 爛爛 ê 食物險險 á kui-ê 吐吐--出-來。


只好 ka phuì 掉，無法度 koh 食。


好 ka-tsài iáu 有才調 lim mi̍h 件，雖然「心--ni̍h」無想 beh lim，m̄-koh 我有 thiau 故意去 lim，khah 免 kui-ê 人直直衰 lám--lueh。


E-po͘ 四點外，血糖 siuⁿ 低，人起冷 koh 起愛睏神，只好轉厝，睏無 ka-tshuē，直直精神，點外鐘了後，腹肚有 1 種無足真實 ê iau 餓 ê 感覺，是 ná 有 iau koh ná 無 iau，我坐起身，kā ka-tī 講：「m̄ 管按怎，一定 ài 來去食 kuá 物件！」   Tú 下定決心，tsiah khiā--起-來 niā-tiāⁿ，1 種嘔吐感 suî tshìng 來 tī nâ 喉鐘 á hia，kan-taⁿ beh 擋就足 thiám--ê。


原來 i 是真--ê？　我猶原無啥 ài 信，m̄ 管按怎，我等--leh kāng 款 beh 來去食物件，beh 想辦法食 kuá 物件，食啥 lóng 好，有食就好。