December 9,2007
夢 (koh 是眠夢)
目 tsiu peh 金，感覺有淡薄 á 寒，tse 是 1 間足大間 ê 房間 ê 角 á，kui 間暗 bîn-bong，連 ka-tī ê 眠床 ê 款式、被單 ê 色水 to 看無，若講 sio-khuá 有光線，是因為 kui 排 ê 窗 á 無用 kha-tián jia-tsa̍h，看--出-去，是風雨綿綿 ê 半暝時，都市 ê 燈火 tài 暗淡，tshiō bē 光 tsit 間 bē 輸 tī 半天 kuân ê 厝間。
M̄ 知是按怎，總是感覺小弟 mā 睏 kāng 間，雖 bóng 開闊暗影 ê 房間看斷半項 mi̍h，suah 知小弟 ê 眠床 mā uá tī 有窗 ê 壁邊，kap 我--ê 排做 1 tsuā，koh 心內明明知影，i 無 leh 睏，無意中 kan-tann 想 beh 落去樓 kha 看 māi leh，耳 khang 邊，koh m̄ 知是 m̄ 是有樓 kha ê 人聲。
樓 kha 火有 khah 光，無行落去到位，khiā tī 樓梯頭看，就親像普通 ê 販 á 厝，1 樓有 2 戶，大門相對向，he tshiânn-kek kap 款式 kap tuà 10 外 tang ê 舊厝一樣，tsing-tsha 想無，我睏 ê 樓頂是按怎 tī 夢--ni̍h suah 變 kah hiah-ni̍h-á 大間 koh hiah-ni̍h-á 冷清。
無張持 a 弟 á ùi 倒手爿 hit 戶開門--出-來，面--ni̍h lóng 無睏神，門 tshùi siap--出-來 ê 光線，看 ē 出內底 ê 人 tsiâu iáu leh 活動，我 mā m̄ 知是按怎心內知影 a 弟 á kap 細 kīm-á leh 顧 in ê 細 kiánn（僅僅是夢--ni̍h ê tāi-tsì，kiánn iáu bē-tsîng 有 leh），若對面生成 kap 舊厝 kāng 款 kāng 款 ê hit 戶，門已經關 ân，a-pah、a 母 khah 早睏，10 點就關門 tshuànn 戶，自來就是按呢．．．．．a 弟 á 有 gia̍h 頭看--我，koh 看對面 hit 戶，i ná tshan-tshiūnn 有向我講 siánn，koh 我有問 i--siánn，tann lóng bē 記--得了了--a。
Kiám-tshái 是自本就聽 bē 著 koh mā 無想 beh 聽 ê tāi-tsì，kiám-tshái 是 hit-ê 光景像寒--人 tú phah-phú 光 ê png 時風，kā 凍透暝 ê 霜露 ká 起，人 kā 大 báng ê 衫 á 領 khiù hōo khiā，雙手 mooh 頭，無想 beh kha̍p 著酸苦 ê 記 tî。
樓 kha 火有 khah 光，無行落去到位，khiā tī 樓梯頭看，就親像普通 ê 販 á 厝，1 樓有 2 戶，大門相對向，he tshiânn-kek kap 款式 kap tuà 10 外 tang ê 舊厝一樣，tsing-tsha 想無，我睏 ê 樓頂是按怎 tī 夢--ni̍h suah 變 kah hiah-ni̍h-á 大間 koh hiah-ni̍h-á 冷清。
無張持 a 弟 á ùi 倒手爿 hit 戶開門--出-來，面--ni̍h lóng 無睏神，門 tshùi siap--出-來 ê 光線，看 ē 出內底 ê 人 tsiâu iáu leh 活動，我 mā m̄ 知是按怎心內知影 a 弟 á kap 細 kīm-á leh 顧 in ê 細 kiánn（僅僅是夢--ni̍h ê tāi-tsì，kiánn iáu bē-tsîng 有 leh），若對面生成 kap 舊厝 kāng 款 kāng 款 ê hit 戶，門已經關 ân，a-pah、a 母 khah 早睏，10 點就關門 tshuànn 戶，自來就是按呢．．．．．a 弟 á 有 gia̍h 頭看--我，koh 看對面 hit 戶，i ná tshan-tshiūnn 有向我講 siánn，koh 我有問 i--siánn，tann lóng bē 記--得了了--a。
Kiám-tshái 是自本就聽 bē 著 koh mā 無想 beh 聽 ê tāi-tsì，kiám-tshái 是 hit-ê 光景像寒--人 tú phah-phú 光 ê png 時風，kā 凍透暝 ê 霜露 ká 起，人 kā 大 báng ê 衫 á 領 khiù hōo khiā，雙手 mooh 頭，無想 beh kha̍p 著酸苦 ê 記 tî。
引用URL
http://cgi.blog.roodo.com/trackback/4598835
![[Syndicate this site]](http://cdn.rimg.tw/images/blog/rss.gif "Syndicate RSS feed"){kind=small}
![[Syndicate this site]](http://cdn.rimg.tw/images/blog/atom.gif "Syndicate ATOM feed"){kind=small}
