August 1,2015 13:29

若是按怎拄按怎,啥人會想欲...



自來若講著娼妓ê問題,抑是性產業合法化,就會聽著一款講法,號做:「咱呔會無愛予怹有另外ê頭路thang做?若是怹有選擇,啥人會想欲賣肉--leh?」Tsia-ê話,佇無偌久進前,閣佇一齣電視連續劇ê廣告內底聽--著。

就是今仔日無張持去想著tsia-ê話其實怪怪,毋才會來寫tsit篇。毋過,欲講我感覺tse話佗位怪進前,希望逐家愛先有寡背景智識,關係「性產業合法化」佮「性工作者ê工作權佮保障」,tse是真有學問佇--leh-ê,若無經過較深ê討論佮思考,獨獨用直覺咧huâ算,較ke嘛是tsia一空、hia一空,問題了了,也tsit篇無拍算欲餾tsia-ê舊議題,有興趣ê人會用得家己揣資料來消化。

話講倒轉--來,咱聽著講「若是怹有選擇,啥人會想欲賣肉--leh?」tsit句話ê時,頭一个反應較濟是扁喙--去,袂輸tsit號話是天地理路,無thang分會(hun-huē)--ê,窮實咱斟酌kā想,咱會歹應,根本毋是出在有理無理,是因為有一个傳統、既定ê道德觀,咧看性工作者無佇目地,tsit个部份,拙者捌寫一篇〈你就無「賣肉」?!〉,有興趣ê朋友tsiah看覓。

啊若將頂懸tsit个傳統、既定ê道德觀ê kha̋n-páng卸--落-來,怹講ê hia-ê話,就消風--去-ah!咁有影?拙者下跤就隨來比一寡例予逐家鼻芳--一-下。

阿榮ê朋友:「阿榮--à,你逐工加班加甲無瞑無日,一月日嘛才領人三萬,咁無欲另外揣頭路?」
阿榮:「哭枵!若是我有選擇,啥人會想欲做公司ê奴才,加班加甲身體拍歹了了,連女朋友都無khuà交,換頭家?!講較快(kuē)啦!」

頭前tsit个例,咁講毋是咱大部份人ê心聲?啥人是有影「足心甘情願」咧食tsit-má ê頭路--ê?有--lah!Hia-ê咧做家己大事業頭面頂百--ê,相信有人是真正甘願--ê,嘛閣有人,是工作佮興趣/理想相結連,加上無財務上ê負擔,所致做著歡頭喜面,總--是,友--à,tse攏是少數,著--無?

閣一个例,是tsit條新聞:『考驗人性!荷蘭政府將向市民發放「月薪」』,咱感覺趣味--ê,就是tsit个實驗ê目的:「人若是有thang食免討趁,咁猶會想欲作穡、對社會有貢獻?」毋免等實驗結果,咱趁好(thìn-hó)家己摸心肝,或者是對身軀邊ê人做一个簡單ê調查,按呢,知--ah袂?啥mih款人是「多數」,有明--無?

舊年台北市長選舉,一个候選人ê電視廣告內底,毋是有一陣少年人講怹若好額,就欲「一直耍、一直耍、一直耍...」,耍無討--ê.....人honnh,計是愛「食好做輕可」,啊若有thang揀,當然上好是「輕可--ê嘛kā省--起-來」,tse是人性,是生成--ê。

啊當今社會上tsiah濟違背「人性」ê薪勞仔是咧按怎?當然就是因為咱隨人攏著生活,閣受著主觀、客觀ê環境參條件限制,無做無thang食,無做就袂活,毋才會有犁就去拖。是講拖--啊拖,若是有別位仔,he犁無hiah重、錢銀仝款、抑是犁平重,總--是月給較ke,啥人嘛攏會想欲換頭家;設使若好運拄著hit號又閣輕可、又閣橐袋仔洘洘洘--ê,免講嘛頭削尖尖欲nǹg,tann重點來--ah:「欲換頭家,歹勢honnh,你欲換,人就欲倩--sìm?」

按呢聽有honnh?Tse一來二去,究真是仝一个問題,是性工作者也好,毋是也好,佇tsit个特定ê時空背景下跤,攏受著本身條件(包括個人巧戇、專長;過去ê生長背景等等)佮社會客觀環境(經濟好bái、產業結構等等)ê限制,毋是「家己想欲做啥,就有thang做」--ê,若有穡頭,隨人較濟是咧做「目今揣會著上好ê頭路」--啦,佇tsit款情形下,去講:「若是怹有選擇,啥人想欲...」根本是ke講--ê,稽考--起-來是無彩喙瀾ê無路用話。

啊講來去倒,tse嘛是「性產業合法化」佮「性工作者ê工作權佮保障」ê深度討論--裡,一項蓋基本ê前提。

後--日,若閣聽著tsit款話,咱就知tse話ê後壁,是啥物咧主張--ah。

  • 您可能有興趣:

    Kā「意向」呵咾 kah 到崁
    lausenghian 發表於樂多回應(0)引用(0)哲學編輯本文
    樂多分類:文字創作切換閱讀版型 │昨日人次:0 │累計人次:622
    贊助商廣告
     

    引用URL

    http://cgi.blog.roodo.com/trackback/45862477