November 12,2007
眠夢
王 kā i ê tsa-bóo-kiánn khiú 走，i 艱苦 kah 大聲 háu。
「王--a，我 kan-tann tsit-ê tsa-bóo-kiánn！」
王翻頭看--i，目神親像一--月 tú phah-pú 光時 tsūn ê 霜風，無講無 tânn pui̍h 劍，雄雄 kā tsa-bóo-gín-á ê 倒手骨 kui 支 phut--lo̍h-lâi。
「I 已經 m̄ 是你 ê tsa-bóo-kiánn--a，tann 無 kāng 款--a。」
Tsa-bóo-gín-á âu 叫 ê 聲，親像是 uì 倒 pîng 肩 kah 頭 hit-ê leh tsuānn 血 ê khang-tsuì bū--出-來-ê。
「王--oo！求你憐憫我 ê tsa-bóo-kiánn oh！」
劍 pué ê 速度 thài 緊，親像 bē 赴 tân 雷 ê sih-nah sut--過，tsa-bóo-gín-á ê 正 kha 腿已經浸 tī liâu-liâu-á leh hùn-thuànn ê 血潭--ni̍h-a，「i kám iáu 是你 ê tsa-bóo-kiánn？你 kám iáu愛--i？」做老pē--ê 雖然目屎 sì-lâm-suî，tsit-pái 目 sik suah 真利，無等王 koh pué 劍，suî hiàm 講：「M̄是！M̄是，緊 kā tshuā--去！」全無想著劍 mê ê 金頭sih--過，kā i ê 話柄 phah tsi̍h，tann tsa-bóo-gín-á ê 兩支手骨 lóng ùn thôo--a。
「為siánn-mi̍h！」Tsa-poo-lâng khiàn 頭大聲huah-hiàm，像 tú pua̍h落thôo-hām tio̍h 傷 ê 獅公。
「He 是為你 tsit-má ê 問題kap âu 叫 tāi-sing 準備 ê 答案。」王冷冷 kā ìn，「講你恨--i，beh 棄 sak--i，講！」上尾字 ê 聲 tìm-táu koh 斷半點感情，像 1 粒山青碰白碰 uì 天 siak 來坐 tiàm 面頭前。
「我恨--你！Sái lín 娘！我恨--你！你 kā 我走！走 kah 遠遠遠，我無你 tsit-ê tsa-bóo-kiánn！你死好！！！」Tsa-poo-lâng 用 kui 身軀 ê 氣力 huah kah 盡磅。
王 ê 面 ná 有笑 ná 無笑，kan-tann ûn-ûn-á 一句講：「真好，án-ne m̄-tsiah 是忠心 koh 順 thàn ê 子民，ah！我所疼 ê kiánn--oo！真好！真好！」索 á uì tsa-bóo-gín-á ê ām-kún in leh，拖 leh 做 i 行，破相 ê őo-nín-gioh 目 tsiu lóng 無 nih，1 tsuā 目屎滴落血潭 beh kah 味。
* * *
王 hiàm 人 kā sa--落-來，phiann 入去城堡 ē-kha ê 地牢。
「王 oh，憫憐--我！」因為 gông-gia̍h 歪 tshua̍h ê 面寫做 1 ê 疑問號。
「你是按怎問你無應該問 ê 問題！」
「我？我無--a！」
「Koh 講無？你 tsit-má ìn--我 ê 話，tō 是你 ê 罪證！」
「王--a，我 lóng 無問--a！！！」
「Suî-ê 答案有 suî-ê 問題，你 tú-tsiah ìn--我-ê，後壁 tō 是你 ê 問題！」
「按呢無平正！王--a‧‧‧」I iáu piànn-sè 想 beh 分會。
「我所疼 ê 囝--a，我 tō 是獨一 ê 標準，我 tō 是 tio̍h--ê，我 tō 是平正！按呢，tī 我以外無有平正，」王 gîn 目看--i，1 字 1 字講：「tann 是 toh 位無平正？」
引用URL
http://cgi.blog.roodo.com/trackback/4470109
![[Syndicate this site]](http://cdn.rimg.tw/images/blog/rss.gif "Syndicate RSS feed"){kind=small}
![[Syndicate this site]](http://cdn.rimg.tw/images/blog/atom.gif "Syndicate ATOM feed"){kind=small}
