September 22,2007 21:47
認知症、主客體轉換
Tsā-hng bē 記得是 tī toh 位看著認知症（dementia）ê 資訊（huān-sè phí-jîn 就是痴 gâi iā 未可知），心內浮出 1 ê 想法（親像 ke-kui-á pûn-hong liòng 出水面，koh 海 ang？tsiâm 水艇？）：「kám ē-tàng 透過認知症 ê 角度，來寫 1 篇記 tî tuè 時間 ná 來 ná 少 ê 故事？」
一般現實人生 ia̍h 故事發展，sûi 人 ê 記 tî lóng 是 jú 來 jú 成長--ê，bat ê 人 kap tāi-tsì 直直增加，親像 gia̍h 筆 tī 畫布頂 kuân ná tsō ná 描，色水 kap 線條 ná 來 ná 豐盛。
總--是咱若 the̍h 1 tè hú-á kā 筆替換，用滿滿是色水 kap 線條 ê 畫布來替空白 ê 畫布，ná hú ná tshit，記 tî tiau-kang kap 時間行顛倒 píng，原底熟 sāi ê 人（甚至親人）、了解 ê 代誌，1 項 1 項 hōo tshit--bū-去、tshat siau--去，kah 出尾 kiōng-beh 是 1 張清清氣氣 ê 白紙，he 是 siánn-mi̍h 款情況 leh？
＊ ＊ ＊
Kiám-tshái 有人 mā bat 夢著 tsit 款夢：tī kāng hit-ê 夢內底，kāng hit-ê 主角，有時是「咱 ka-tī」，有時 koh m̄ 是，是 ê 時 bē-su lán ê 靈魂 tuà 入去 hit 內底，m̄ 是 ê 時，親像靈魂走脫，khiā tī 邊 á 看，或者是變做坐 tī 戲棚 kha ê 觀眾，台頂台跤是兩 ê 世界，無 sio 干礙。
普通 1 ê 故事 ni̍h khah 罕得 tī kāng 1 ê 角色頂 kuân 做主、客體 ê 切換（有 mā bē 親像一刀兩斷 hiah 明 hiah 斬 tsue̍h），m̄ 知按呢寫--出-來 ê mi̍h-kiānn，ē 是 siánn 款式。試想夢 ê 世界有 tsit-ê 現象，夢 kap 故事之間，toh-tsi̍t-hāng khah 真實 leh？若 tsún oh 判斷來講，tsit 款 ê 寫法，kám bē-thang--得？
Kāng-tsit-ê logic，故事是按怎 tio̍h-ài 有 logic、ài 合理 leh？Tse 是 tsit-tsām-á 另外 1 tsân teh 想 beh 做 ê 試驗。
