雙倒水別莊

講 i ê 目 tsiu--ni̍h 有海，tse huān-sè tio̍h，m̄-koh 躇秋知影 hit phiàn 闊 bóng-bóng、無定著 ê 海，源頭是 i ê 個性，i ê 心 thài 軟，穿 1 su 「人情世事」ê 彩衣 am-khàm，若 i 兩 ê 小妹 ê 性無 kāng 款，是燒 kah 反紅 ê 石，bē-tsîng 化做岩漿進前，猶原 tīng-tuah，koh 光 hiânn 光 iann，無躇秋 tùn-tenn ê 款式。

Tse 若 kí in 姊妹 á iáu 讀中學 ê 時 ê hit 件 tāi-tsì，kiám-tshái thang 做真好 ê 例，hit kang 拜六 e-poo，kan-tann in 4 ê 姊妹 á tī 厝，a-pah、a 母出去買 beh 拜拜 ê mi̍h-kiānn iáu-bē tńg--來，a 舅 suah 行 kha 到，大姊 thîn 茶 hōo a 舅 lim，請 i 先坐，躇秋 kap 2 ê 小妹坐 tī 桌 á 邊 leh 畫圖。

「你是倒手 kuái-á--oh！？」

A 舅無 o-ló 躇秋畫 ê 圖，suah 雄雄 án-ne 講，khùi-kháu 帶淡薄 á 怨嘆 kap phì-siùnn。躇秋歹勢歹勢，連頭就無 gia̍h--起-來看 a 舅，顛倒是大漢小妹雄雄 ìn 1 句：「倒手 kuái-á 有 siánn-mih m̄ 好？」

A 舅無 lia̍h 讀國中三年 ê 外甥 á ē án-ne tú-tshùi，想 tsi̍t-khùn tsiah 講：「to kap 人無 kāng 款‧‧‧‧‧有 khah hit-lō‧‧‧‧‧」

「是 án-tsuánn tio̍h-ài kap 人 kāng 款？」

A 舅看 tsit-ê 外甥 á 話有 tshuann，是不服 m̄ 是 beh 請教，tsuann-á tuè leh 踏硬。

「你 iáu 細漢--lah！M̄ 知 lán 人 tī tsit-ê 社會，總是無愛 siunn 過 koh 樣，hōo 人生話。」

「A 舅，所以咱 lóng tio̍h 照社會款來行--sìm？」小妹 sûi kā 話接--起-來，躇秋頭 siāng 款 lê-lê，m̄ 知 beh án-tsuánn tsiah 好，若坐 tī 上邊 á ê 大姊--leh，phah 算是 beh khiā kuân 山看馬 á 相踢，kun-tu 厝--ni̍h 無大人，thang 看舅甥 á tak-tshùi-kóo 做藝 niū。

「Tse‧‧‧to 已經 ta̍k-ê 有 khah kāng 心 tio̍h thàn 理路 ê hē-hāng，當然無必要去‧‧‧‧‧」

「A 舅，kah 若是 án-ne，你是 án-tsuánn 進前 kap a-kīm uan kah 烏天暗地，tī 外口另外 kap 人 tuà，你是 án-tsuánn 無 beh 照社會款，轉去原底 hit 間厝，作 1 ê 『美滿』家庭 ê 框殼--出-來-leh？」

A 舅想 bē 到外甥 á 敢 iah i ê khang-tshùi，tshùi-á 開開看--i，pōng-tu̍t se̍h 頭去看壁頂 ê 時鐘，「Ah！Suah bē 記得 kap 人約 beh 講 tāi-tsì，A 枝！」I hiàm 大姊，「kā lín a-pah a 母講我 khah 晚 tsiah 來 kiáu 擾，我先來--去。」

細漢小妹看 a 舅趕緊緊行出門 tshùi，門 tsiah tú 關，sûi 大聲講：「真討厭 tsiah-ê 老社會人！無法度為 ka-tī 活，koh mā 無才調 tsiâu thàn 社會款，suah 甘願 tsiânn-tsò tsit-ê gōng 社會 ê 工具，替 tsi̍t-kuá 講無理路 ê 社會 phiah 傳鑼 sueh 聲！」

現代 ê gín-á tsih-tsiap ê 資訊 ê 量 m̄ 是 lán hit-ê 時代 thang 比 phīng--ê，mài 看 in 10 外歲 á，量講 in siánn-mih 攏 m̄ 知。

兩 ê 小妹 m̄-nā 敢 ke̍h a 舅，後--來若 m̄ 是 in tàu sio thánn，躇秋 tī 家庭革命 ê 中間，huān-sè 無辦法行 kah 出尾。