雙倒水別莊

頂月日中 ê 1 ê 三更暝半，mài 問我幾點，因為作者無叫我學看時鐘，橫直就是豬當好睏 ê 時陣，動物室主任，hit-ê 頭 mn̂g 一段時間了後 ē 半烏白，隔轉工 liam-mi koh 烏烏烏 ê tsa-poo-lâng，無張 tî kap 1 ê tsa-bóo 醫生行入來阮豬、niau 鼠 á、牛、狗 kap 兔 á ê khiā-ke。

「Tsia bē 有人來--lah！」主任面 á tsu-bui tsu-bui，se-lang ê 目眉 tiò--tsi̍t-ē tiò--tsi̍t-ē，雄雄出手對 tsa-bóo 醫生束束 ná thôo-khòng 蜂 ê nah 腰攬--leh，醫生「Ah！」一聲，頭殼 phīng tī 主任 ê 胸 khám，mn̂g-ku 夾 á lāng--去 lak tùi 塗 kha，烏 sìm-sìm koh 長 ló-ló ê 頭 tsang，像淡水河崩 khàm 出水 tshiâng，kui-ê 散--開，「你 ê 頭 moo 足芳--ê，」主任 kā 鼻 á khînn tī 醫生 ê 頭殼碗，khuann-khuann-á suá--lueh，「koh 有耳 á，kap 耳 á ê 後壁 mā 是‧‧‧」

Tsit-lō 時間確實罕有人 ē 來 kā 阮 kiáu 吵，雖然棕銀病院除去控制成本、拚勢趁錢，有不止 á 注重醫生 ê 學術研究，m̄-koh 聽獸醫 leh 講，醫生 ka-tī kài 無閒--leh，差不多 ta̍k 工早起 6 點 tio̍h 開會開 kah 7 點外 á 外，了後緊準備巡病房，thang 趕 9 點赴早起 ê 門診，若有順 sī，中晝 tsiah 包便當來動物室 tseh-thuah--阮好寫 paper，不時 mā 趕 phēnn-phēnn，飯菜 pe--leh pe--leh，suah tsîn 目 lia̍h 阮直直相，bē 輸 beh kā 阮拆食落腹，khah 無兩點鐘，白長衫 hiannh--leh，就 koh tsông--出-去-a，e-poo 兩點門診起鼓，病人已經 tī 2 樓 thìng 候，in tio̍h kah 暗頭 á tsiah ē siān-lak-lak koh 入來苦毒--阮，好佳 tsài 鐵 phah ê 身軀 mā bē 堪得日也操暝也操，若 m̄ 是有特別 ê 因端，10 點半了後 tsia 就斷半人--a，人客倌，就阮 tsia kan-tann 1 ê 獸醫，i tsit-tsām-á khí-moo bē-giang，tsia̍p 5 點準時下班（i ē 入來 kā 阮看看--leh，huah 1 句：「Kán！今 á 日 koh 去 hōo hit 隻老猴 hat sńg--ê，5 點--a，我 beh sûi 來走！」自按呢我知時間），醫生半暝 beh tshuē 人 tàu kha 手真 oh，koh 再講，阮若無正常食睏，he 實驗 ê 結果 kám ē tsún 算，m̄-tsiah tsit-ê 時間，主任 kap hit-ê 醫生 ē 來真意外。

Tann 講到 tsia，讀者大人就知影我是按怎敢石裡斬字講 lín m̄-tsiânn 猴--a，2 ê 人白長衫褪緊緊，主任 ê 水色 siá-tsuh、khóng 色長褲‧‧‧明明無風，he 壁頂接水 ê 水道頭看--起-來 suah 搖 leh tiô leh，醫生 khû--lo̍h，面 khînn uá--過，頭 ná tín 動，手 ná leh pak 衫，我知上尾 tsiah hiat tī 塗 kha hit 條三角褲 kap 原底縛 tī 胸前 kat-sio 連 ê 布碗是烏--ê，hânn，你問我別領--leh？歹勢，我豬--lah，無必要 hiah gâu 講人 á 話。

後--來 in 兩 ê suá--來，醫生手 huānn tī 我面頭前 ê 欄杆，kha-tshng khiàu-khiàu，兩 ki 長長長 koh 白 tshang-tshang ê kha 腿開開，hōo 主任 ùi 後 piah kā tōng，主任 ê 手真無閒，tī 醫生 phòng-sai-sai ê 胸 khàm 直直 so 直直 so，kiám-tshái 是 leh tshiau 身軀（動物室主任 ê 權有影 kài 大），醫生 hinn-hinn hainn-hainn，目頭 kat-kat，長長短短 leh 問：「你講--ê-oh，ē tshiau 1 位 hōo--我-hoonnh，ah...ah...，上無 ài 有 15 隻...ah... niau 鼠 á，後禮拜...一定 ài 有...ah...無我今年 paper ē 做 bē 赴...ah...beh 升...ah...無法度...ah...無法度 ah...我 beh 升高級專員--lah！」

好死 m̄ 死，醫生 ê phaīnn-á 內底手機 á suah leh tân，hit 8 隻狗 á 去 hōo  逆耳 ê 鈴聲驚--著，pūi kah 大細聲，了後 pûn 狗螺。

醫生 beh kā 主任 sak--開，主任 m̄ 肯，硬 kā pa--leh，兩 ê 人 tsuann-á 一前一後 kap 做伙 ná 兔 á 跳去接電話。

「Pah，我 iáu tī 病院做實驗--lah！‧‧‧先 mài tōng--lah！」醫生真 siūnn 氣，出手 beh kā 主任 sak--開，主任當興，tshùi-á 開開，phe 命 leh 搖 kha-tshng 花，「Ah...無..ah，ah...我是叫我 ê 助理 mài koh kā niau 鼠 á 注射--a-lah...ah...ah...ah...無...m̄ 知--neh...pûn 狗螺--oh...我無去用狗 á--lah...ah...mài koh...ah...無--lah，真緊就會轉--去...」