雙倒水別莊

「Bat tī-leh？」永活 ê 讀者--a！Roland Barthes kám 無通知你「作者死--a。」就親像 Voltaire 指出上帝創造萬項 mi̍h 了後，siān-siān thenn 後殿，無 koh tī tsit 世間 tshap 手，Nietzsche kā 簡省做：「上帝死--a！」Tsit 句話有夠 tsha̍k 耳，kiám-tshái ē hōo 信上帝 ê 讀者 bē-khat-kin Barthes ê 「讖語」緊 tsiânn，iā tsiah-ê 字句來做作者 ê 遺囑字，作者 ê 遺囑字透過 gún，或是豬或者 m̄ 是，lóng 是透過讀者大人 ê 閱讀 koh 活 ê kioh-siàu，beh 傳接作者 kiám-tshái 無 thang 照原 ê 意思，話講 kah tsia，僅僅 ǹg 望列位讀者大人 thang 了解，mài koh giâu 疑「有 1 隻 ē-hiáu 講話 ê 豬。」因為「作者已經死，人死 bē 對指。」

轉來講「動物室」，tsit-ê khangpang 是棕銀病院--ni̍h 獨獨 1 tè 大大典典 kā  khiā 內底--ê 是 tsiâ 寫 hōo 明--ê 所在，你若離開 tsia，m̄ 管是 kāng tsit-tsàn ê 「太平間」，一樓 ê 「急診」、「掛號 la̍p 錢櫃台」，二樓 ê 「門診」（包括「齒科」、「內科」、「精神科」、「皮膚科」等等），三樓 kah 六樓 ê 病房，七樓大官虎 ê 辦公室 kap 會議室，基本的 in 攏歹勢加「人類」兩字，比論「人類太平間」（阮若 hōo 新藥 thāu 死了後是 bē-giàn hông kng 去 hia--ê）、「人類急診」、「人類齒科」、「人類精神科」等等，án-ne  mā 好，kun-tu 人 m̄ 是「動物」，雖 bóng 坐辦公桌、khiau kha nuà phòng 椅--ê 有算「植物」--無，阮講無路來，m̄-koh 阮攏自動 tī tsiah-ê 寫了無明 ê khangpang 上頭前加「M̄-tsiânn 猴」3 字。

「Siánn！？你講 siánn？」讀者大「人」huān-sè hông 火氣 thuat，m̄ 是我ài 「一豬逆眾人」，to 大「人」 lín kui 身軀幾 tah-á lia̍h 外，毛 liù kah kiōng-kiōng-beh 無 khuaìnn，koh tio̍h 作衫買裙 phah 褲來穿，beh 比 peh 樹、鬥走，khah 輸猴公猴母，況兼 tsîng 源起頭 kah tann，m̄-bat 聽猴 san hōo toh-tsi̍t 條河溪烏 lok-lok 臭 moo-moo、害 lán tsit 粒星 tì greenhouse effect ê 症頭，講 lín 「m̄-tsiânn 猴」kám 無 khiā 真 khiā 現？可恨阮 tiàm tī 外口是菜刀 á 命，來 tī tse 內籬 á tio̍h 食 môo-hui 注毒 siā，增差無 1 雙手革命來 kap lín tshia 拚！