雙倒水別莊

色水 ná 白玉蘭 ê 門假嗽，門 lîng khi 頭 bē 赴借問，kā iù-tsínn 白 tshi̍h ê sio̍k-phàng lih 破--ê，是用笑色凝水石雕琢推金 ê 昭和櫻，i ê ue 伸長，身 thîng-thîng，在水 m̄ 是世俗 kap-tsoh ê 手路可比，he 是用濟 mî-muá ê 月眉做 ê ka-nn̂g 款式，是 ùi 外海遠望 phāu 雲 ê 仙山，kuân-ta̍h khà--出-來 ê liâu-phah，kap 心跳出力相 tsông koh 相 tsông，滿餘香 ê 芳已經 tin kah 一四界。

相 lám ê 時，按怎 beh 閃 bih 紅 iām-iām ê 唇，總 tio̍h 等 iòng 日果 ê 葉全 pak--lī，斷紗 tsuā ê 身體相 ù，tsiah 知靈魂 kap 靈魂中間，有一世人趕 bē 得著 ê 迢遠。

M̄-tsiah he 生份 ê 喘氣、生疏 ê 汗 sio̍h ē 無張 tî khàm 過 siânn--人 ê 芳水味，雄雄看見面頭前 tsiūnn 千 tsiūnn 萬，深 uang-uang ê 毛管 khang，直直 thàng 去 kah 宇宙寒 tshìn 稀微 ê 盡角，活命樹 tī hia 枯 tâ、tòm 落，i tiām-tiām-á kā sak--開，peh 起，致覺 ka-tī 浸 tī khó-tsut-tsut ê 烏墨--ni̍h，想 beh tsheh-khùi。

王抱徹精神 ê 時，的確 iáu 是暗 so-so ê 三更半暝，i 喉 ta 舌 khuah，勉強 kā 夢--ni̍h bē 赴出 tshùi ê 字句說出。

「A 如，真失禮，兩人三跤，我定著行無一世人 hiah 遠，請你．．．你 tio̍h 緊緊離開！」王抱徹 kā 面 tshih tī 被--ni̍h，好 tshan 像有聽見 si-si suh-suh leh 穿衫 ê 聲，koh 聽著色水 ná 玉蘭花 ê 門開--開、khōm--起-來 ê 聲，「是我自來就行 bē 遠‧‧‧‧‧」I 細細聲 á nauh，無 tann 頭看，m̄-koh，i 知影 he 定著是 1 ê 冷 tshìn-tshìn koh 帶  phí-siùnn ê 面。