雙倒水別莊

人 lóng 講快樂 ê 時間過了 siōng 緊，在王抱徹來看，tio̍h 代先回答「快樂」ê 定義 tsiah 講會落--去。

Bat 聽人 tī sió hioh 喘、lio̍k-á tòng-tiām ê 時 tsūn，hiông-hiông huah 1 聲：「Ai-ioh！今 á 日拜五--a-lioh！一禮拜 koh 過--a，nah 會 tsiah 緊！？」--無？　M̄-nā án-ne，月底，koh-khah 是年尾，tsit 款半 tio̍h 驚半怨嘆 ê 話句 uan-nā kài tsia̍p 聽--著，lán tsim-tsiok kā 想，tsiah-ê 人 (事實上也就是 lán 人) leh 過--ê 是 siánn-mih 款 ê 生活--leh？「Kám 有快樂？」無張 tî tsi̍t-ē 問，大多數人恐驚 á 無法度 sûi ìn，為著 3 頓燒，不時頭殼 mooh leh 燒，kha 手拚 kah 痠軟痛，koh m̄ 知有價值--無？Kheh 目進前會退悔--無？Án-ne huān-sè 講是「庸庸」(iông-iông) ê 生活，會 ke khah bā-sà？庸庸 ê 生活過了 siōng 緊，kám m̄ 是？

王抱撤 m̄-bat the̍h su-tóo-phuh uà-tsih 來量--過，i 無確定是庸庸 ê 日子、或者是 kap tsa-bóo-kiánn 做伙 ê 時間過了 khah 緊，i kan-tann 知 iánn，照世間人像水司公 án-ne gōng-gōng se̍h、phe 命走趁，kā 青春趁 hōo 老 khok-khok、kā 理想囥 hōo 舊 lak-lak、kā 熱情磨 hōo 冷 tshìn-tshìn，尾--a 留 hiah-ê ka-tī 無滿足、koh mā khai bē 著 ê 米母，tsit 款日子，清醒 ê 時，就 tsún 過 1 秒 mā ài 緊 huah「su-tóo-phuh！」　若是 kap tsa-bóo-kiánn tàu-tīn ê 時--leh，i 是 bē-khat-kin beh 向時鐘 hán「su-tóo-phuh！」  I 真 ài kap A 勻 koh ke sńg--一-時-a，m̄-koh in lāu-bú 就 beh 來--a，i tio̍h 先走，khah 免兩人相 tú 頭。

Bē-tsîng peh 起身，電鈴已經 tshi̍h tân，A 勻走來 khiú lāu-pē ê 衫 ńg，大聲 huah：「緊入去 bih--起-來！Pa-pa，緊！」王抱徹看 tsit-ê gín-á，雄雄無才調 kap tú-tsiah tī 白紙頂面 tsō 字 ê gín-á 想做 1 ê，i khû 落去 kā A 勻出力攬--leh，tsim i ê 頭 hia̍h，ua̍t 轉身開門 tsông--出-去。