雙倒水別莊

面向車 leh 行 hit 向，正 pîng uá 門，1 ê 白毛 á 少年，戴 1 頂烏 sìm-sìm ê 吐舌帽 á，帽 á kînn tshih kah 低低低，王抱撤 khiā tī 門邊，透過門邊 hit tè 烏 huánn 烏 huánn ê 玻璃看--i，白 tshang-tshang ê 頭 mn̂g kap 白 sí-sat ê 皮肉 ē-kha，像 ùn 露水 ê 玫瑰粉紅 ê 血色，去 tòo 1 iân 暗咖啡色，siat-thái-á siat-thái。

門邊，1 ê 大 khoo 大 khoo、目 tsiu 圓 lìn-lìn ê tsa-bóo gín-á phīng tī hit tè 玻璃 leh khiā，tī i 頭前，是 long 1 雙白色有 kia̍h ê sū-lí-pah，穿 kui-su 柳丁汁 thàu 牛奶色洋裝、枝骨 ko-tshiâng ê tsa-bóo-lâng，正手 ni 1 本冊皮有尪 á 頭 ê loo-màn-suh 小說 leh 讀，kā hit-ê tsa-bóo gín-á tsa̍h kah tshun 1 粒頭殼有 khuaìnn，tsa-bóo-lâng ê 倒手吊 1 支 khóng 色滾白邊 ê 截傘 (tsa̍h-suànn)，A 如就 khiā tī i ê 倒手旁，kap 王抱撤相對面，m̄-koh 頭 ua̍t 倒 pîng，kan-tann phah 鐵 á 褲 ē-kha，烏色光面尖頭 ê sū-lí-pah 直 tsîn-tsîn leh 相王抱撤，A 如正 kha ê kha 頭 u 邊 á，1 支銀色手柄頭 ê 截傘 beh 開 m̄ 開，白、青、桃 á 色、水色 ê 直線條，tuè tâm-sip、khioh-kíng koh 起 jiâu ê 傘面彎來 ua̍t 去。

足 tiām--ê，暗時 8 點外 ê 電車--ni̍h，落雨 ê 氣味，tī tshiūnn-bā ê 車窗 kian-tàng，車內人 tshah-tshah-tshah，王抱撤 ê 耳 khang 內 hit 1 句 tī 梘尾站入口，i 想 tsi̍t-khùn tsiah ìn A 如 ê 話 khûn lóng 無停：「我相信有 1 件絕對 ê tāi-tsì，kap 我做夥 ê 人 bē 來得著幸福。」

Hit-tang-tsūn tsi̍t-ē 聽，A 如 sûi 笑出聲，講：「我相信是按呢！」笑聲無 sîng 是假虔意--ê，m̄-koh tī 車內，A 如 suah sià bē-lī koh 進前 i 勸王抱撤 ê 話句，「無 siánn-mih tāi-tsì 是絕對--ê，無 hit-lō 定著 ê 好，mā 無 hit-lō 定著 ê bái。」 Nah 知 iánn 王抱撤 ē 按呢 kā ìn--leh。

電車駛來 tī 永寧，王抱撤送 i 出站，tī 車牌 á-kha 等 beh puann 公車，ùi 天頂無張 tî pua̍h pua̍h--落-來 ê 雨 mî-á，hōo 路燈染 kah 金金金。兩人猶原 liān-siáu 話 ài kún 笑，總--是 kāng 心 siau-siám hit-ê 無 beh koh lā 起 ê 話頭，僅僅據在心去反起反倒、反起反倒。