雙倒水別莊

I 開 tshùi 就是暗暝 ê 大車路邊，烏 huánn ê 雨亭 á 跤，無等人搖頭吐大氣，liam-pinn 佔講：「mài 感覺奇怪，mā mài 來 jû 講：iū-koh 是 án-ne ê 場景。因為 tio̍h-ài tsit-lō 時 tsūn tsiah 會想東想西想 m̄ 知好停。」

「星，he 是當然無看--ê，」i koh 講--lueh，「人，kan-tann thang ka-tī tshúi-sióng kui 天--ni̍h 光 sih-sih，像烏絨布頂 kuân seh 金箔 iù-á 來反照水銀燈；無意中 koh 伸手去 juê 倒目，aih，lín m̄ 知--lah，m̄ 知是 án-tsuánn，hit 暗倒目無 tāi 無 tsì ta kah，有夠艱苦--ê。」

「目 tsiu peh 金，tì 覺天星無 koh 散 iā-iā，tann  排做 1 lìn，1 粒  uá  1 粒，bē  輸用寶石 á 貫--起-來 ê phua̍h-liān，1 粒 phīng 1 粒，tsiah 知平平是星，總--是 sûi 粒 ê 媠 lóng 無一致。」

I ná 講 ná 比手畫刀，「紅寶石、suān 石、青石 á、青玉 á、琥珀‧‧‧‧‧，ah！注目獨獨看 toh-tsi̍t 粒 lóng tsiânn súi，m̄-koh‧‧‧‧‧若 beh 我 kan-tann 揀--1-粒-a，suah 揀無路來，斟酌想，mā 無 toh-tsi̍t 粒 thang phín-phóng i 無 khang 無 khiah，就親像 gia̍h 頭 leh 比長論短 ê 人--oh，mā tio̍h ka-tī 照鏡摸心肝 kāng 款意思。」

「摸心肝來講，tse 就是 kah 意，mā 僅僅 tshun kah 意 niā-tiānn，上 ke 是兼 kuá bē 過心 ê 疼惜，」講 kah tsia，tshùi 唇皮 sió-khuá khiú 長，tshùi 角 ná beh  khiàu ná m̄ khiàu，是厚心思想奸巧，iah 是帶古意起歹勢--leh？

「就 tshun tsit 兩項感覺--ah，若 beh ke 問愛--lah，ún-tùn--lah，相信--lah hit 款貴強 ê 信仰，ē-sái 講 tsiâu 不在--a，tsiânn 千冬有 juā 濟支筆 án-ne 寫、juā 濟條歌 án-ne 唱：『心無--去-a！Làng kui 位空空！』相信你 mā 已經聽 kah 臭酸--a tsiah tio̍h。」

「講 kah tsia，ùi 場景、表情、想法、譬喻‧‧‧講 ê 人 lóng 已經 ka-tī phì-siùnn 了了，m̄-koh m̄ 是 thiau-kang beh 學 meta ê 手路，因為 tse 明明 mā 是故事本身 bē-īng 得無 ê 1 部份；一來二去，siánn 人 m̄-bat 私 kha-ē ka-tī tu̍h ka-tī ê 話--leh？Kám m̄ 是 án-ne？OK！Tsit-má tio̍h 你應--a，khah 省 beh 開始來檢討我 ê 心　不在。」