雙倒水別莊

耶穌知 in ê 意思，就 kā in 講，見若國 ka-tī 爭拚，會致到 pha 荒；見若城 iah 是家 ka-tī 爭拚，的確 khiā bē tiâu。若撒但趕撒旦，是 ka-tī 爭拚，i ê 國 thài-thó khiā 會 tiâu？（太 12:25-26；巴克禮）

耶穌知 in ê 意思就 kā in 講，凡若國 ka-tī 爭拚，會致到 pha 荒，厝 1 間 1 間倒壞；若撒旦 ka-tī 爭拚，i ê 國 thài-thó khiā 會 tiâu？因為 lín 講我靠 Pia̍t-se-pok 趕鬼。（路 11:17-28；巴克禮）

（另外 mā 會用得參考馬可福音傳 3:24-25）

Tsit 幾段經文有 leh 讀聖經 ê 人 kiám-tshái lóng 真熟，經文頂段是耶穌 tú ùi 1 ê 人身軀頂 kā 鬼趕--出-來，結果反對 i ê 人試--i，意思是 beh kā 耶穌加誣講 i 是靠鬼王來趕鬼。（理解親像 tsit 類 ê 經文，tio̍h tāi-sing 知基督教對「鬼」ê 定義 kap 看法 hām 台灣民間傳統信仰有真大 ê 無 kâng，m̄-thang 濫做伙想）

頭一擺讀著 tsiah-ê 經文，拙者就起疑 gâi，疑 gâi ê 對象 m̄ 是耶穌靠 siánn-mi̍h 趕鬼，是耶穌 i 為 ka-tī 分訴所提出 ê 理由：「國、家 iah 城 ka-tī 爭拚，就 khiā bē-tiâu，所以無可能靠鬼趕鬼（tse 後 piah ê 意思 mā 包括「鬼本身 bē 去趕鬼」）。」

咱知 iánn 基督教會一般的來講，「態度上」是尊重別款信仰--ê，m̄-koh 態度 huân 態度，ta̍k 款信仰 ê 內容 lóng 有 i 本身 ê 「神 ê 觀念」、「世界 ê 實況」、「解決人生／生死問題 ê 手路」，lô-tsip-tik 來分析，無 kâng 信仰之間對頭前 tsiah-ê 主題 ê 講法，當然是互相 tshiâng-póng，sûi 人有 sûi 人 ê 解說。

在基督教來講，只有 1 位上帝，靈界內底，除去上帝 kap 順 thàn 上帝 ê 眾天使，無聽 thàn 上帝 ê 靈體 lóng 是妖邪，是屬 tī 反背上帝 ê 魔鬼撒但 hit-tsi̍t-pîng，若究真講，別項宗教所拜 ê 神明，tī 基督教神學--ni̍h，lóng 無可能是「正港 ê 神」，若 m̄ 是假佯--ê，無--者，就是「反背上帝 ê 靈體」。

問題來--a，基督教神學 tsit 款 kā 世界拆做兩 pîng ê 想法，hām 其他信仰 ê 現實手路，koh 加上耶穌為 ka-tī 所做 ê 分會（參考上頭前 ê 經文），自然的會產生 1 款矛盾：kám 講 tī 其他信仰內底 ê 「作彩、kué-sé、趕鬼」，mā 是靠「上帝 ê 權能」？無，nah 趕會成功？耶穌 m̄ 是已經講--ah，一國、一家、一城無可能 ka-tī 爭拚，無 tō khiā bē tiâu，無人會當靠鬼趕鬼，鬼 mā bē ka-tī 相 phah。

幾 ā 冬前，拙者 bat 讀過 1 本 ùi 英文翻譯 ê 中文冊，號做『走出撒旦教』，內底寫--ê，主要是撒旦教 tī 美國 ê 發展 kap 行放，透過 1 ê 做過撒旦教女司祭 ê 人分享 i 親身 ê 經驗，hōo ta̍k-ê 了解 tsit-ê 拜鬼教 ê 可怕。

冊內底，撒旦教 ê 信徒透過訓練，hōo 鬼替 ka-tī 做 tāi-tsì，產生魔法 hit 款 ê 效果，in 為 tio̍h 爭取教內 ê 地位，mā sái-lāng ka-tī 差用 ê 鬼互相對 tu，讀--起-來，有 iánn 是鬼 á 古中 ê 鬼 á 古，是講：列位人客倌，若 kā tsit 本冊 ê 理路，提來 kap 上頭前耶穌講 ê 話相比 phīng，你 kám bē 感覺其中有 1 pîng leh 畫虎膦？平平是基督教內，教導 suah 相踏 thut（tsit 時陣虔誠 ê 基督徒絕對會提聖經做唯一 ê 標準）。

基督教會 ê 冊店內底，有 juā tsē tsit 款冊 leh 賣？教會 ê 講道、團契等等聚會，有 juā tsē tsit 款 ê 教導 kap 分享？Koh 有 juā tsē 基督徒讀了聽了，是信 tauh-tauh，驚 tshuah-tshuah？

Aih！Lín 所信--ê，kám m̄ 是 hit 位「無一位無 tī-leh」、「無一事做 bē-tsiânn」、「無 i 答應無 1 件 tāi-tsì 會發生」ê 上帝？教會本身 tsit 款矛盾 ê 世界觀 kap 信仰，kám 無真烏白來？請問，若照耶穌 ê 講法（一開始 ê 經文），教會 beh án-tsuánn 解說其他信仰趕鬼、作法 ê 儀式 kap 效果--leh？

Tsit-ê 問題拙者 kah nā 已經想幾 ā 冬--a，當然有才調提供參考答案 hōo 列位：

(1)Tī 非基督教內底 ê 作彩、kué-sé kap 趕鬼 lóng 是「in 鬼互相之間假佯爭拚」做戲 hōo 人看--ê，目的是 beh 欺騙人來信--in。

(2)聖經 ê 經文有問題。

我想，基督徒 huān-sè lóng khah kah 意頭 1 ê 參考答案 ê 款。