雙倒水別莊

Án-ne 真好，往早用手 tsih 簿 á beh 掀真 oh，有 ê 日子是格 á 無夠用，有 ê 日子是 tshuē 無 tshut 頭 thang 變，koh 紙永遠 tiām-tsih-tsih bē-hiáu 出聲提醒，tio̍h 不時 the̍h 來看--leh 看--leh，是講，beh 會記得看 tsit-tsân，是 m̄ 是 tio̍h koh 另外 kā 記--lo̍h-來-leh？

M̄-tsiah 我講 án-ne tsiann 好，若 tsún 已經無稀罕 ê 個人電子助理 (PDA) 對我有路用，我想我需要--ê mā kan-tann kah tsit 款程度 niā-tiānn，tse 算是 tsit-má 手機 á sù-siông 有 ê 功能，koh-khah ke，在我 mā 無意義。

Kám 無不時聽人講電子 ê mi̍h-kiānn bē 靠--得？做 tsi̍t 聲無--去 tō 無--去，救有是好運，救無 tio̍h 認份；若紙本--leh，除去 tio̍h 火燒，無 tsiah 差不多 m̄ 免煩惱 phah-m̄ 見（ka-lauh 來講，是 m̄ 是紙做--ê lóng 會），幾 ā 冬--a，電子 la̍h 日 m̄-bat 誤我 ê tāi-tsì，tsing-tsha 你 tú 無--去 hit 段日子，我無 kā ke 添 mā pîn-tuānn delete，hit 當 tsūn 想講，若無你做伙，siōng 好是 kā 萬項事 tsiâu 放 bē 記得了了，siōng-kài sù-sī。

你生日 ê 1 禮拜前，早起 10 點，我聽 tio̍h he 熟悉 ê 音聲，先落 5 度，se̍h huan 頭轉--來，sûi peh 8 度--起-lih，siōng 尾用 3 ê 低音收 suah，螢幕 kui-ê 光--起-來，寫你 ê 生日 beh 到--a；我 sió-khuá gông-gia̍h，是年初 ê 時，我 thiau-kang kā 設定，beh 好好 á、tsim-tsiok-á hua̍t-lo̍h，替你慶祝，tann tsit 7 ê 音符，suah 親像事後對感情 ê tò-khau，koh bē 輸是 Iok-su-a (約書亞) siōng 尾 1 擺 tshuā 以色列人 se̍h Iâ-lī-ko (耶利哥)，1 ê 音階準算 1 擺，ná 行 ná 唱，自按呢，tsit 幾 ā 月日我 piànn-sè tī 心--ni̍h khí-kuân ê 城壁，tuè 音樂崩--lueh，總--是，kap tāi-sing 就知 ki ê 運命當頭對面，目 tsiu 注麻 siā--a，1 滴目 sái mā 流 bē--出-來。

Iā 你永遠 tō bē 知，今 á 日我 suà 手整理 tsit 個月 ê hē-hāng，koh 看著初 10 ê 1 ê 項目，hō 做「海芋」，你上 kah 意 ê 花，aih！我記 tî bái，bē-hiáu 想，連 àn 算不時買花送--你 to thiau 意故 kā 記 tī 手機 á 內，gōng 人，tann kám 是海芋 ê 季節？早 tō 過--ah，kám m̄ 是？

Kāng tsit ki 手機 á，已經聽 bē-tio̍h 你可愛 ê 聲，1 通 1 通 ê 簡訊，bē koh 再有你糖甘蜜甜 ê 話語，我已經堅心 kā 早前設定 tī 未來，為你加--入-去 lóng-tsóng ê 提醒 thâi 掉，hah！電子產品 siōng bē 靠--得 kám m̄ 是？無量講 i tiàm tī 我身 khu 邊 ê 時間，suah khah 長過 lán tshan 像過冬鳥 ê 愛情。

知--無？電子 la̍h 日猶原會 mî-mî tsinn-tsinn hán-huah tsit 件要緊 ê tāi-tsì hit-ê 重要 ê 日子，總--是天地反變，無比以前，永永 to 無應該 koh thìng-hāu 會有 1 工，北 pîng ê 天--ni̍h，會有 ia̍t 翅 ê 音聲傳來到位。