雙倒水別莊

10 外冬走 tshuē kā 性命翻新 ê 力量，終其尾是 làu 空 kiâⁿ，代先，kā 聖經 ê 地位重 koh 確認，he 無可能是 tsiâu-tsn̂g 無誤 tâⁿ ê 啟示，我棄 sak 揀選 ê hâu-lak 話，看破「無底止 ê 疼」kap「無破 phà ê 義」中間 ê 矛盾，總--是有朋友 nā 問，我猶原 iáu 應講：「拙者 kāng 款信 Iâ-soo，信十字架流血 ê 救贖，信伊 ùi 死--ni̍h koh 活，tsing-tsha 無信 tse 救贖 ê khang-khuè 受制限，無信 tse 功效獨獨到 tī 一部份 ê 人。」

今 á 早起 ná 讀冊 ná tshím 想，另外 1 ê 16 冬滿--ah，頭殼 tsi̍t-ē se̍h，感覺 ka-tī 已經準備好 sè，堅心 ùi 心內 huah 出：「じゃ、クリスト教！」實實講，tsit 句話 m̄ 是為 tio̍h 使激 táu beh 反背 tah 底，的的實實是拙者想了徹 ê 虔心決定。

Tse 了後，原在 ē 真尊存各人 ê 信仰，m̄-koh 無代表我 ē i-o 從事，聖經照原 ē 讀，總--是 i 不過是經典--ni̍h ê 1 phō，無 phôo-tháⁿ 遵 thàn ê 必要。

＊　　＊　　＊

無 ài 1 ê 等待「伊 ka-tī」伸手 phah-tsām 痛苦 kap 慘齣 ê 上帝（彼後 3:9），一面講「揀選」tī 創造進前，一面看罪惡 kap 病痛拖磨 tú 出世 ê âng 嬰 á，伊 teh thìng 候 siáⁿ-huè？（kám 有 tsit 款上帝？）Thìng 候 tsit 世間 koh 生出 tsi̍t-kuá 受揀選、kap 另外 tsi̍t-kuá 無 hōo 伊揀選 ê 人--sìm？

離經--oh！繼續 lia̍h 屠殺、艱苦、i̍k 病、失望來做代價，無 khîng 分來加 tī 男婦老幼 ê 身軀頂，tsit 款 thun-lún kap thiàⁿ-thàng，bē-sái ti̍h！Mā tsāi-tsúi 無 ài ti̍h--tsit！

＊　　＊　　＊　

...the tendency of the divinity to "often ignore the guilty and to mete out undeserved punishment by slaughtering the innocent...( The Rebel, Albert Camus, Vintage International p.31)

「道 tsiâⁿ 肉體，khiā-khí tī lán 中間」（約 1:14；Pa-khik-lé），「因為基督也 1 pái 為著罪受苦，義--ê 替不義--ê」（彼後 3:18；Pa-khik-lé），Iâ-soo ê 受苦，hōo 教會 the̍h 來回應 ē-kha tsit-ê 久長 ê giâu 疑：是按怎世間 ê 苦難 tshiân 長，suah 有 1 位 tiām-tiām 無聲 ê 上帝？教會講：伊 m̄ 是 tiām-tiām 無聲全無 tsùn-būn--著，伊親身來 tī 世間，tam siōng 大 ê 艱苦到 tī 死，i 知影 lán lóng 總 ê 感覺、苦惱 kap 疑 gâi！　我講 tsit-lō 講法真 hàm，請看 ē-kha ê 譬喻：

1 ê 人 tī hē tsiūⁿ gá-suh 爐 ê 鼎底看著 1 隻 káu-hiā，i m̄ 甘 káu-hiā hōo 燙--死，m̄-koh，i suah 無 liam-mi kā 火 tsūn--hua，mā 無想步 kā káu-hiā pué--出-來，kan-taⁿ ka-tī kui 身軀淋汽油點火，講：「taⁿ 我知--ah！我知 iáⁿ 你 lóng 總 ê 艱苦--ah！因為 tsiah-ê 驚--人 ê 一切，我 taⁿ 親身試--過！」

Tsit 款回應，斷斷 bē 做得頂 kuân hit-ê 問題 ê 答案，koh 再講，上帝 kap 受造 ê 人中間 ê 差別，the̍h 人 hām káu-hiā 之間來比論，疼心 kap 能力 lóng tsing-tsha 太 tsē--leh，有 tsit 款答案，實在是對上帝 ê 極大侮辱！

1 ê 有 tsiâu-tsn̂g ê thiàⁿ、koh 無 siáⁿ-mi̍h 做 bē 到 ê 上帝，tsit 幾 ā 千年，除去 tsit-lō 答案，suah 猶原 tiām-tiām，猶原目 tsiu 金金看萬萬億億 ê 生老病死、屠殺、相戰、橫逆、tsau-that，tse 萬萬億億內底，有 bē-tsîng 有天地 tō 受揀選--ê，有--ê，是出世以先，tō 註該 tio̍h 滅亡--ê！？無譜--oh！Kài 無譜 kám m̄ 是？

「幾 ā 千年？」有人應講，「幾 ā 千年算--siáⁿ？主看 1 日親像 1 千年，1 千年親像 1 日（彼後 3:8；Pa-khik-lé），詩人 kám 無吟：因為在你看，一千年親像已經過--去 ê tsa 日，koh 親像暝間 ê 1 更（詩 90:4；Pa-khik-lé）。」

去問看--māi！做 lín 去問，救--人 kap 賑濟--人-ê，是 tài 念 ka-tī ê 時間，或者是受救恤者 ê 時間？Koh-khah 免講，tsit 位 tī 能力、慈愛、公義 kap 智慧 tsiâu 無欠 khueh ê 救主，伊 nah ē 用伊 ka-tī ê 時間做藉詞？教會--ni̍h nā 是拜 tsit 款上帝，kám bē hōo 人起 lún-neh？

＊　　＊　　＊

Already, as we can see, the great problem of modern times arises: the discovery that to rescue man from destiny is to deliver him to chance. That is why the contemporary mind is trying so desperately hard to restore destiny to man - a historical destiny this time. ( The Rebel, Albert Camus, Vintage International p.30)

Nā 有人感覺「無確定」siuⁿ 過恐怖，據在 in，he 是 in ê 權、in ê 自由；m̄-koh 拙者認為人 tō 算定著 ē 死，koh tsám-jiân-á 有限，mā 應該為 ka-tī ê 理性儘量勇敢，khiā 直面對無法度 pān-phoe ê 海洋，khah mài 去 nǹg 燒 ho ê 兔 á khang。

＊　　＊　　＊

朋友--ah！拙者無 phah 算 beh 影響任何人 ê 信仰，mā 無 beh 對 Iâ-soo 侮弄 iah hia̍p 疑，「自上主創造宇宙以來，伊 hōo 人看 bē 著 ê 本性，tō 是伊永遠 ê 大能 kap 神性，人 nā 看著伊所創造 ê mi̍h tō ē 明白，所以 in lóng 無辯解 ê 餘地（羅 1:20；紅皮）。」Amen！Amen！

Siáⁿ 人 ē-tàng 證明萬項 mi̍h ê 源起頭是無因致端--ê-leh？上無拙者無才調否認有造物主 ê 存在，不而過，想來去倒，hit 位造物主，確實無 sîng 是教會--ni̍h 所講 ê hit 1 位，koh-khah m̄ 情 m̄ 願、姑不而將，mā tio̍h 說出：「じゃ、キリスト教！」、「按呢 tsún-tú-suah，ki-tok-kàu！」