雙倒水別莊

地場：草地田邊 ê 細條 á 路

人物：A-iāu ( 短衫短褲，kuāⁿ 1 kha 運動袋 á，30 外歲人)、火泉( 戴草苙 á，giâ 鋤頭，70 外歲 )

A-iāu：火泉伯--ah！食飽--bē？

火泉：少年--ê tsín beh 去 toh？

A-iāu：做運動--lah！

火泉：Hioh～做運動員--oh，bē-bái--hoohⁿ，khah 贏作 sit 作 kah 彎腰 khiau-ku，koh thàn 無夠買藥 á 來 hu。

A-iāu：火泉伯--ah，你 kám beh sūn-suà kap 我來去 hua̍t-tōng 中心運動？

火泉：活動中心？Hia 今 á 日是 thiāu-á-kha beh 開會 ah 是 beh 請桌？Hehhh‧‧‧‧‧無聽人講--li‧‧‧‧‧

A-iāu：火泉伯--ah！火燒莊 kap 咱莊交界 hia ê 活動中心--neh，新起 ê--ah，內底有 thang phah 球、走 kiāⁿ、siû 水，無來 kā 用--tsi̍t-ē，恐驚 á kan-taⁿ 留 leh hia 飼 báng！

火泉：你講「運動」--oh，有 iáⁿ hoe--去-a，莫怪講 bē tùi-tâng‧‧‧豬母牽 tùi 牛墟--去。

A-iāu：‧‧‧hehⁿ‧‧‧運動--ah？！（Sa 無 tsáng）

火泉：(行 uá--來，手來 mua tī A-iāu ê 肩 kah 頭，兩 ê 人行去路邊石頭頂坐)  咱有 iáⁿ 無 kāng 時代‧‧‧若我 leh 講--hoohⁿ，kā 人「做運動」、「做人 ê 運動員」，he 是替人 kng 轎 tàu 選舉 ê 意思--lah！Tsit-ê 運動 kap hit-ê 運動，鋸柴所‧‧‧tsha tsē--ah-oh！

A-iāu：Kah tsiah hàm？！火泉伯--ah，kám 講‧‧‧lín hit 輩--ê，自少年時代就無 leh 運動--oh？

火泉：運動？Ah 田 m̄ tio̍h koh 倩人來作？ Aih，he 是 lín 好命--lah！阮自做 gín-á、顧牛、割草、khioh 柴、作 sit‧‧‧toh-tsi̍t 工 m̄ 是作 kah bē-hù 喘，thah 有 thang 親像 lín 有閒去 giâ kê kng 交椅，khai 錢做會員，精差驚流汗流無夠 ê 道理？

A-iāu：( 想 tsi̍t-poo 久 ) Mā 是 tio̍h--lah！田--ni̍h 無閒，厝--ni̍h mā 無 leh juā khùiⁿ-ua̍h，gín-á-phí ài lia̍p 屎 lia̍p 尿，tsàu-kha tio̍h hiahⁿ 柴起火‧‧‧

火泉：Hah！koh 有 thang 講 kah tùi gín-á-phí--去，我 kā 你講--lah，無留 kuá 氣力，天烏倒 loeh 就 khùn，gín-á kám tsiaⁿ 實 ē ka-tī ùi 石頭 piak--出-來 sìm‧‧‧

A-iāu：有 iáⁿ 有 iáⁿ！天 bē-tsîng thiah-ha̍h tio̍h phe 命作 sit，日頭 hâⁿ 山--a koh tio̍h phah-piàⁿ 生 kiáⁿ，koh 十一哥 mā ài ka-tī lut...（Iáu-bē 講 suah 話就 hōo phah-tsih）

火泉：少年--ê，講話 khah 有 tsām-tsat--leh-oo‧‧‧

A-iāu：我是講 lut‧‧‧‧‧‧‧lân 得有 îng ê 時 tsūn mā tio̍h kā 桌 á 椅 á kā lù lù--leh，十一哥 mā 是知清氣 siùⁿ khah 好‧‧‧kám m̄ 是‧‧‧

火泉：（hàiⁿ 頭）Lín--oh，食飯 khaⁿ 中央--ê，m̄ 知往早 tshiâⁿ kiáⁿ 艱苦--oh！（停 tsi̍t-khùn）Gín-á 細漢 iáu tī 塗 kha pê，khioh 雞屎來食--ê 時，he 有 iáⁿ 是 án-ne 用心計較，ǹg 望 i mài 夭--去，緊大漢--起-來，厝內 thang 添 kioh-siàu tàu-kha-tshiú，做 sī-tuā--ê 看 ē khah khin-khó--無。

A-iāu：伯--ah，siáⁿ-mi̍h kioh-siàu？Tú-tsiah tsiah tòng 我 mài 歹 tshùi--niā-tiāⁿ，你 ka-tī suah‧‧‧

火泉：Lín leh 運動就 hām 阮 koh 樣--leh，kioh-siàu nah 是歹話？

A-iāu：M̄ 是--oh？Kám án-ne？（停 tsi̍t-khùn）講 tshī kiáⁿ 艱苦，tse 阮 kiám-tshái mā bat--leh！你無看我 kah taⁿ iáu m̄ 敢生！（看火泉）火泉伯--ah，lín 棟--a 轉去台北--ah-sìm？

火泉：Aih‧‧‧轉--去-ah-nooh，bē 輸行--去-ah-leh，khah 早咱是磨心磨肝 kā io-tshī，原底希望 in kā 鋤頭 tsih--過，咱 thang iáng 老 suê，後--來社會變 tio̍h thài 緊，sûi 人 ê 後生 lóng mā 講 ài 讀冊 tsiah 有出 thuat，讀 jú kuân jú 好，aih‧‧‧為著栽培--in，咱連米母 to 無惜，為 in 交 mā 交--出-去-ah，taⁿ 翅 kóo 尾 á ta--ah，lóng 走去 tī 都市 thàn in ê 大錢，mài 講有心悶--咱、有管咱食飽穿燒寄 lui 來添補--無，kui 年 thàng 天 to 罕得轉來 1 擺--leh，若有轉--來，mā tuà 無三兩工 á，就趕緊 beh 走，ka-tī ê 祖厝 bē 比得旅舍‧‧‧（停 tsi̍t-khùn）taⁿ 老--ah，鋤頭、鍥 á suah thn̂g 無人，mā 是 ka-tī leh 作，tsit-má--oh‧‧‧做 juā tsē 算 juā tsē，作 bē 去--ê 就據在 i 去 pha-hng，人 khah 早孤丁過代 mā khah 贏--咱，．．．是好 ka-tsài tsit-ê 歲頭 khah m̄ 免 bú 生 kiáⁿ ê tāi-tsì--ah，無，氣力 a̍h 有夠用？

A-iāu：Mā bú 無路來--ah ê 款‧‧‧（話未講 suah，火泉伯 á the̍h 草苙 á 對頭 kā khà--loeh，tsuaⁿ-á tòng-tiām）火泉伯--ah，tsit-má 田 koh 作--hoohⁿ，有 iáⁿ bē-hô--a-lah！咱 tsit-khoo 圍 á oan-nā 略 á 有 leh 發展，huān-sè 等看有大生理虎來開發，地皮 ê 路用改改--leh，thang 好換 kuá 養 siām 銀--無‧‧‧

火泉：Hah！Pang-kah háu‧‧‧久久久--leh，阮 tsit-iân--ê m̄ 敢 ǹg--ah-lah，終其尾--hoohⁿ，我看是少年--ê 收收--去，tiàm 都市吹冷氣賣 hit-lō 狀元地，tse 命底生成--ê，tio̍h lín 去等看有 thang 做便田 kiâu-à--無 niā-tiāⁿ--lah！

A-iāu：（目 tsiu m̄̄ 敢看火泉）火泉伯--ah，講 án-ne tsiâⁿ 心酸--neh！Khah 輸來去做運動員，（停 tsi̍t-khùn）hit-ê 番婆莊 ê 蔡金才--a，聽講 beh 出來代表顧面桶選立委--neh，a 伯你地頭人頭 lóng tsiah 熟，去 hia̍p--tsi̍t-ē，年底進前替 i 做運動，tiāⁿ-tio̍h khah ba̍uh 作田作十冬！

火泉：Hehⁿ--lah，好 thio bóng 好 thio，食 tshìn 飯丸 to 有--oh！時到 tsiah 看有 hit-ê tshùi 齒 thang pōo--無，（注目 kā A-iāu 看--tsi̍t-ē）Ah 你--leh，你 tiang 時 beh 轉？

A-iāu：Ing 暗就 beh 起--lih-ah，tuà 3 暗--ah-le，kā 公司請 siuⁿ 久，驚 ē 半年 beh heh ē 連 bē--起-來，時到 beh 出國就真歹 tshiâu--a‧‧‧‧‧火泉伯--ah，有 îng tsiah 來台北 tshit-thô--lah，( khiā--起-來 ) 我先來去運動--ah！

火泉：（無出聲 kā ìn，手 the̍h 草笠 á ná ia̍t 風，ná 看 A-iāu jú 行 jú 遠--去）

 ( Soah )