雙倒水別莊

I kui 工 tī 人前健丟活潑，話講 tio̍h 直理直路、像 tsiah 破雲 ê 金龍吐連涏，面笑 kah 圓 lìn 圓 kô、是 tú 削皮 ê phōng 果流甜湯，暗頭 á 明明行入門--ah，門鎖「khuáⁿ」一聲，房間內 tiām-tiām-tiām tshun 1 ê 孤影，i suah 猶原親像趕戲暗唸劇本 ê 演員，無，tō 是 1 景獨白 ê 戲，tshùi--ni̍h se̍h-se̍h 直唸，liam-piⁿ āng 聲 ná tsing-piàⁿ pua̍h 刀 tsa̍h 大路，liam-piⁿ 輕聲 ná 新婦 kha̍p 頭會不是，等 kah ka-tī kā 衫洗好 phi 好，兩 ki kha tsi̍t-ē áu，人對椅 á 坐--lo̍h，無張 tî 吐 1 口氣講：「輸輸去--ah，輸輸去--ah！」 

西北雨來 tio̍h 青碰白碰，haiⁿ-tshan hōo 艱苦 ê 喘氣剁 kah 1 kueh 1 kueh，化做 kui 珠 kuāⁿ ê 鈍雷，人 phak--leh，「我 tòng bē-tiâu--ah！」暴憑 tsông 去開 thuah-á，kā 水果刀 á gia̍h--出-來。

「你軟母--lah！」

「我無！」I kā 刀 pue̍h--出-來，用刀 khing tī 倒手肚 ūe--tsi̍t-ē；「tio̍h-ài 浸 tī 燒水內底 tsiah ē 用得，」i 起攔頭 beh iân-tshiân。

「我 m̄ 管你 tsit 擺死有成無成，ài 見血，血！Hōo 血 phùn--出-來。」

I the̍h 目 sái kō 半 tâm ê 紙去擦刀，了後，kā 刀 mê khîⁿ uá 手肚，koh suá 落去手腕，目 tsiu kheh--leh，hit 潭水 giâ íng tú 天，「刀 mê tshiám 入去腹肚、kā ām-kún 割 hōo 斷、耳 á ē-kha ê 動脈 kā tu̍h hōo 破」，想 a̍h 想，1 擺 koh 1 擺，上尾吐大氣，是 kā 雨 káng 抽倒轉去 ê hit 聲脆雷，刀雄雄插入去刀殼。

「軟母！Lám-kha-siàu！」

「Tio̍h！我是 lám-kha-siàu！」坐 tiàm 塗 kha，倒手 khuè tī 椅 á 頂，手肚 m̄ 知是按怎有 1 痕所在燒燒 tsha̍k-tsha̍k，明明刀 mê iáu 無 ùn 血 kám m̄ 是？

「無想 beh 看皮膚 ē-kha 有 siáⁿ-mi̍h？」Iáu leh kā 試。

「有 1 ki 銃 ē khah 妥當，khah 緊 khah kui-khì，對 1 ê lám-kioh-siàu 來講．．．．．」I 按呢應--i。