雙倒水別莊

Tsit 篇討論 2 ê 問題，華語 ê「破格」kap「打蛇隨棍上」beh án-tsuáⁿ 用 Hō-ló 來講，tī tsia 先感謝兩位提供問題 hōo 拙者轉（斷）腦筋 ê 朋友

-___-"。

 1.破格

「破格」m̄-nā 是華語詞，事實上 mā 是日語詞，日語漢字呼音是「hakaku」，意思 kap 華語相 siâng，lóng 是講組織 tshiàⁿ--人 ê 時無照原底 ê 規定 ia̍h 例來行，hōo 1 ê 本底看--起-來無可能坐 tsiūⁿ hit-ê 位 ê 人坐位；日語有當時 á 意思 koh khah 闊面，tō 是「例外／特殊」ê 意思。

拙者 ka-tī 是無 tshiau 著 tú 好對 thīn ê Hō-ló 詞 （請人客倌牽教），tsit 款情況，ē 考慮創詞 ia̍h 是借詞，koh kah nā tsit-ê 漢字詞 kāng 時 tsūn mā 是日語詞，拙者對直接借詞 ê 意向 tō ē khah 強，khah 煩 lóo ê 是：Hō-ló 本身已經 kā tsit-ê 漢字詞另外做使用--a。

「破格」讀白話音「phuà-keh」，是「出世 ê 命數歹吉兆，或者是有欠點、無 tsiâu-tsn̂g」ê 意思，sù-siông 是用來罵--人 ê 話，意思 kap 華語 hām 日語精差 kài tsē。Huān-sè lán ē-tàng 考慮文白各讀，hōo「phuà-keh」kap「phò-kek」有無 kâng ê 意思，讀冊音（phò-kek）算是借詞，用來表示 kap 華語、日語 kāng 漢字 ê 詞意。

Tō 親像進前有 sian-pái 建議「人才」文白各讀，讀冊音（jîn-tsâi）表示「內才」，白話音（lâng-tsâi）表示「生張」，是 sio-kâng ê 道理。

以上，kan-taⁿ 是拙者 ka-tī 烏白 tàu--出-來 ê 意見。

2.「打蛇隨棍上」

「打蛇隨棍上」beh án-tsuáⁿ 用 Hō-ló 講，kā 手頭 ê 辭典 kap 諺語典 píng-píng--leh ，iáu 無 tshuē 著 tú-tú 好 tah-bā ê 講法（拙者 jîn-tsâi 欠缺，kāng 款請 ta̍k-ê 雅教），想想--leh，nā-tsún 是我必須寫著 tsit 款 ê 情況，我 kiám-tshái ē 用 「順風駛船」（sūn-hong sái-tsûn）、「順風駛盡帆」 （sūn-hong sái tsīn phâng）、「抾著銀假哭」（khioh -tio̍h gîn ké-khàu）tsit 幾 ê 諺語。

例句：

我是好心相 tháu-thuah kā 留地步--neh，無想講 i suah 抾著銀假哭，順風駛盡帆，tuè 話尾騎起來 kah 頭殼頂。

一來二去，拙者 lóng 無考慮 kā「打蛇隨棍上」直接讀做 Hō-ló 漢字呼音 ia̍h-tsiah 是自 án-ne kā 翻譯--過，tsit 點，算是個人 kha ku-moo ê 原則問題．．．Or2