雙倒水別莊

Tse 王梨是新 á，頭冬--ê，khah bē 酸。

「新 á」 kap 「頭冬--ê」應該是 kāng 意思，是 kāng 1 欉王梨頭一冬出 ê 果子，普通 3 冬了後 tō kui 欉 tshò--起來重種新栽。

駛 juā hiong？

頭擺聽人 kā 「hiong」用來講「速度」，íng-kuè 拙者 kan-taⁿ ē-hiáu 講「駛 juā hiông」，m̄ 知 thang 講「駛 juā hiong」，總--是二姑丈按呢講，koh 講幾 ā 擺，合該然有 tsit-lō 話。

人 nā 問我去 toh 位，去 hiah 久，我攏 kā 應講去「一周」（it-tsiu），hah！Se̍h 台灣一周--lah！

Tse mā 是二姑丈講--ê，事實上伊是 leh 講透早去台北深坑 á 割 tshiⁿ-á，koh 趕去苗栗割，等戴去賣了後，轉去 kah 梅山已經是暗頭 á--ah，人好玄問伊是去 siáⁿ-mi̍h 所在去 hiah 久，用文言音應講「一周」是 phah 笑詼，hiông-hiông tsi̍t-ē 聽，ē lia̍h 講是「toh-tsi̍t 洲」，不止 á 心適。

Hia tsit-tsām-á tsiàm-tīⁿ--ah，ín 無頭路--ah。

Tsit 句是大姑丈 leh 講打貓 hit-tah 1-ê 遊樂區 ê tāi-tsì，íng-pái 少年家 tú 出業 nā beh 留 tī 故鄉趁食，攏 thang 去 hiah ín 看有 sit-thâu thang 做--無，tsit-tsām-á hia 無 khueh--ah，姑丈用「tsiàm-tīⁿ」講，tse 我有影 bē-hiáu。

厝起了 khah 深間，tsiah 有 30 坪；nā hia beh 起，tio̍h 起 hōo khah 闊面，mài hiah 長 liau。

「深間」，《台日大辭典》有收「深落」，意思應該 sio-siâng。

小玉 á（sió-gio̍k-á）

Tsit-ê 詞 huān-sè 人客倌真 bat--ah，西瓜 ê 種，m̄-koh 拙者 suah 是頭一擺聽人用 Hō-ló 講--tshut-來，tsiah 知「小」字是讀「sió」，無讀讀冊音 ê「siáu」。

厝 kuà 做 su-lóo-phuh，‧‧‧‧‧正身護龍（tsiàⁿ-sin hōo-lîng）

「su-lóo-phuh」我想 tō 是英文 ê「slope」，後--來 Hō-ló koh ùi 日文借詞來--ê，意思拙者無 kài 確定，kiám-tshái 是「雙倒水」、「一倒水」ê 「倒水」。

「正身護龍」tsit-ê 詞真 sù-siông，ē 引起拙者 ê 注意，是因為二叔 leh 講 ê 時，「身」--字 mā 有轉調，四字 kap 做 1-ê 聲調單位。

房捐（pâng-kuan）、地契（tē-khè）

Tsit 兩 ê 詞應該 tō 是「房屋稅」kap「地契稅」ê 意思，拙者進前 m̄-bat 聽 tio̍h tsit-lō 講法。（我 khah 淺見，無法度‧‧‧‧‧）

番麥筍 á（huan-be̍h sún-á）

Tse ta̍k-ê huān-sè 攏有食--過，細細支 á，kui 支食落腹肚 ê 番麥，大姑 kap 姑丈講 he kap 一般 ê 番麥 kāng 種，是作番麥 ê 人 1 欉 kan-taⁿ 留 1 穗（sūi），beh hōo 生了 khah súi khah 好價，所以 bē-tsîng 大穗 tō 先 kā 無愛--ê 割起來賣，tsiâⁿ 做咱食 ê 番麥筍 á。

Tsiâⁿ (有 tè thang) pa̍k--ah！

五月節 beh 到--ah，beh 轉 ê 時，a 母 kā a 嬸 the̍h kuá 粽葉 á 準備時到 beh pa̍k 粽，a 嬸 the̍h 3-pé 了後，問講「m̄ 知 án-ne 有夠--無？」大姑應講「tsiâⁿ pa̍k--ah！」In koh 講 he 1-pé（用草 á 捆做 1-pé）tō thang 好 pa̍k 1, 2 斗（米）--ah，「tsiâⁿ pa̍k--ah」，我想是「tsiâⁿ 有 tè thang pa̍k--ah」ê 簡省，是過去 m̄-bat 注意 ê 特殊 ê 用法。

警衛 á、碩士

Tsit 兩 ê 詞 ê 正音是「kíng-uē-á」kap「si̍k-sū」（「碩」轉調了後讀第 4 聲），m̄-koh 二姑丈 kap a 媽 in 在地 ê Hō-ló 人攏已經講做「kíng-ūi-á」kap「sik-sū」--ah，看--起-來 tsit 兩 ê 詞呼音 tī 台灣已經普遍，後擺無的確 tio̍h kā 當做勾破音看待。