雙倒水別莊

「A-tái，m̄-thang 因為 án-ne 來 lué 志 想放棄。」

「我無 beh 放棄，kan-taⁿ 是直直 teh 想，siáⁿ-mi̍h 號做 tú 手，人 leh 講--ê『事實』是 siáⁿ-mi̍h，koh ē-tàng 做--siáⁿ，siáⁿ-mi̍h tiāⁿ-tio̍h 無法度--i，koh，我 tio̍h án-tsuáⁿ 想 khah 好。」

A 琪 kha khûn--leh，面向博物館，A-tái kha kiu oá 胸坎，用手 mooh--leh，兩 ê 人坐 tī 廣場邊人作 kuân 1-gám--起-來 ê 樹 the̍h ê kîⁿ 項 kuân，A-tái thàng 過霧霧 ê 白濛，看 tio̍h 坐 tī 對 pîng 面 teh pok-hun ê 少年家，少年人 koh 點 hun，ná 像 mā teh 看--in，有 tsi̍t-tsām-á 久，lóng 無人講話。Hun tī 路燈 ē-kha phah-khoo-á，親像 kńg-lê-á 風 ê 形體，tī tsit 棚 hōo 眾天使 kap 眾人看 ê 戲--ni̍h，nah 聽無 pho̍k-á 聲？Ê？是 tsiâ khiā tsiūⁿ 戲台，he siâⁿ--人-ê 溫柔--ê 有 phòng 有 nah ê 身軀搖--leh 搖--leh，kám m̄ 是 phi 白紗 niú 頭 tsūn ām ê 女郎？無，應該是所應允 tī 日--時引 tshuā ê 雲柱？Nā 是 án-ne，日頭--leh？日頭！Kám m̄-bat 暗暝 ê 城市內底，坐位 pé 權、tsiâⁿ 千 tsiūⁿ 萬 ê 路燈 á 柱？

「你 án-tsuáⁿ 想--leh？」A 琪 koh tioh 1-ki hun 來點，ná 問--i。

「Tse 是 Camus tī La Peste--ni̍h 寫--ê，Oran ê tse，是生活！我 tī tsit 內底，無才調 pān-phue siáⁿ 時 tsit-ê tse tsiah ē soah，koh mā 無才調 tshûn-pān tiang 時 ē tsuaⁿ-á tsheⁿ-tshioh 死，生活 ê 本身 puâⁿ 過人 ê 意向，tú 敵 tiāⁿ-tiāⁿ m̄ 是普通人講 ê hit 款積極 ê 行動。」A-tái sió 停 tsi̍t-khùn，「mài 想 tsit-lō tiang 時 ê tāi-tsì，kiám-tshái khah khùiⁿ-oa̍h？」

「你 beh án-tsuáⁿ 做--leh？」A 琪 ê tsit-ê 問題，kap 頭前 hit-ê ká-ná beh sîng beh sîng，「想」kap「做」中間離 juā 遠，koh tsit 兩項 kám 一定有 kau-tshap？拙者 mā m̄ 知 A 琪問了有 juā 頂真，咱所知--ê，kan-taⁿ 是 i 問 suah 了後，ua̍t 頭 ùi tshùi--ni̍h 出力 kā hun bū 對車路 hit-pîng，無 lia̍h 講風 suah kā 吹轉來 A-tái tsit-pîng，tsit 位 hit 位、tsit 時 hit 時，風 beh án-tsuáⁿ 行，有 siáⁿ-lâng tsiâⁿ-si̍t 知 kah 到角--ê-leh？薄薄 ê 濛--ni̍h，1 片看 tio̍h koh khah 白、koh khah 明 ê 雲 khuaⁿ-khuaⁿ-á 飛--來，he 雲 hōo 路燈 tshiō kah 真光，「雲--ni̍h kám ê 有話--出-來？」A-tái 無張無持 án-ne 想，tài nicotine ê 雲 kā i tah-tiâu--leh，總--是無聲無 sueh，無人 thiah 白講 siáⁿ-lâng 是 tse 後壁 ê 主宰，「lín tio̍h 聽 i ê 話」，親像冊--ni̍h 所記載 hit 款。