雙倒水別莊

        六色 ê 虹 (khīng)

今 á 日 tio̍h kā khīng-á 旗 gia̍h 起來 ia̍t

Tse 色儕儕　光 iānn-iānn ê 旗 á

                           Beh 解洗家己看做義 ê 魔神 á                  

                           逼趕 ài hōo 人流血--ê 惡煞 á

                           In 講按呢是白--ê

                           Hiah-ê 是烏--ê

                           來--ah！Kā 旗 á gia̍h 起來 ia̍t

                           Khiā-thîng-thîng ê 旗杆 kha

                           Kám 無看 tio̍h 十八世紀 ê 奴隸船內底

                           1 具 1 具 hip--死 ê tìm 色死體

                           猶浸 tī 目 sái--ni̍h

                           排 tī lí lán ê 面頭前

                           (2007-04-24）

食飯飽，暗時七點外 ê 民視新聞台 bē 輸綜藝節目，一堆 siáu 人 leh 練 siáu 話，比「全民大悶鍋」koh-khah 「全民大悶鍋」，tsit 內底有一件代誌後來重 koh 想--起-來，suah 不止 á 想氣，tī tsia beh 講：「台灣聯通 ê 執行長 kap 台灣社，tsit 擺我有影感覺 lín tsám-jiân-á 野樣！」

2 條新聞有 tī-tāi，1條是全民聯通 ê 執行長率領「台灣媒體革命工作室」beh koh 出「非常光碟」，tī 新聞紙買 beh 半版 ê 廣告，別項 mài 講，廣告內底有一句話是「馬英九‧‧‧‧‧斷背山」；另外 1 條是台灣社請 1-ê 歌手寫 1 條 khau 洗 TVBS ê 歌，tse 歌詞--ni̍h mā 順 suà 講 tio̍h 1 句講：「馬英九 gay！」

拙者實在認為斷背山是 1 齣 phah 了不止 á 好 ê 影戲，m̄ 知 tsit-tsām-á 是按怎 suah 變做罵--人 ê 詞，台灣 ê 社會 nah ē 猶 koh tsiah-ni̍h-á 蠻性，同性戀有啥物 m̄-tio̍h？Gay 有啥物無好？「同性戀」kap「gay」是按怎 kah tann 猶 hōo 人 the̍h 來 leh 譬相？

我雖然無 kah 意馬英九，死 to 無可能 kā 票 tn̍g hōo--伊，m̄-koh tse hām 馬英九是 m̄ 是「同性戀」並無關係，「選擇 ka-tī 所愛 ê 人，beh 選擇 tsa-poo ia̍h tsa-bóo」、「同性別 ia̍h 異性別」，tse 是個人 ê 決定，kap 別人有啥干礙？Koh tse kám tio̍h 台灣聯通、台灣社或者是任何人 gia̍h 1 支雞婆 tshíng，興 tshap 事、著芝磨（tio̍h-tsi-buâ）？

馬英九本人今 á 日無出來回應，in a 姊 hōo 記者問 ê 時，kan-tann ē-hiáu 應講：「Lín 看 kám 有可能？」真可惜，是按怎伊 bē-hiáu 應講：「啥物時代--ah，bē 見笑--sioh，kah tann iáu teh 蹧躂同性戀？」

我知影有 kuá 人 ē 講「同性戀驚惶症」（homophobia）是為 tio̍h beh 替同性戀起 khiàn 頭 ê 創詞，歹勢--hoonnh，拙者全無延緩，絕對 kap 同性戀 khiā 做夥，明明是久長以來，「同性戀驚惶症」ê 事實在先，現此時 lán ē-tàng 替同性戀講話、爭取權益，算是 tú-tú-á 好 niā-tiānn；tsit-ê 詞 kā 儕儕人 tseh-thuah 兼看無同性戀 ê 心理 kā 明呼明 tshiàng，個人看伊 tsiânn súi-khùi--lah！

台灣聯通 kap 台灣社，tsit 擺 lín 有影 hōo 我起 tu̍h-lān，講啥貨 to 無 beh tsham lín khiā tàu 陣，因為 lín suah 去參加 tī 台灣社會野蠻 ê hit-tsi̍t-pîng！