<< 走（四） | 回blog首頁 | 走（六） >>

March 17,2007

走（五）


一起 khiàn 是按怎 uan-ke--ê？相信 koh-khah uan kah 烏天暗地 ê 情人，後手 mā tiānn 想 bē--起-來，m̄-koh tsit 款代誌，因端是--siánn，kap 尾手兩 pîng beh 對 tu juā 久，ia̍h 是 kui 氣煞鼓，無直接關係。


兩月日無見面--ah，東煥 mā 無來教烏笛 á ê 課，A 欣 tī 朋友面頭前假做 kāng 款，伊 tī in tau「學做人」學 kah 真透，幾 ā 冬 ê 時間，有夠伊演員訓練班畢業 koh the̍h 頭前名，暗時 koh khah 睏 bē 去，ka-tī 1-ê 人 ê 時按怎艱苦，tī 外口講話行放，攏全看 bē 出，日光 ē-kha，伊照常花瓣光豔、枝葉翠青、lè-táu 健 tiu。


無 ti 無 tang 有一暗 10 點外，1-ê tsa-bóo gín-á 來 lòng 門，A 欣開門，看無熟 sāi，tsa-bóo gín-á 穿淺色闊 long-long ê 長衫，kui 面全目屎，無張無 tî 1 句：「請你放東煥 suah 好--無，我 gín-á 後個月 tō beh 生--ah，mā 已經 tī 法院公證，我 bē 堪得伊不時 the 講伊無法度 kā 你放 bē 記--得，伊 ê 心無 tī 我 tsia‧‧‧‧‧」


2-ê 人 khiā tī 樓梯間，A 欣 to iáu bē 赴想 mā 想攏無--leh，tsa-bóo gín-á suah khînn koh-khah uá--來，兩 pîng 手 kā A 欣 ê 手骨 tsang kah ân-ân-ân，出力 hiu，āng 聲 huah：「你放伊 suah！你成全--阮！你放伊 suah！你做好心放伊 suah！」Kui-ê 人 bē 輸起魔公。


A 欣大著驚，對 tsiah-ê 代誌，全無心理準備，無意中去 pué 去 sak，thài-ē 想力頭 ài tsún-tsat，tsa-bóo gín-á 倒頭 hiàng，雄雄 tsuann-á ùi 樓梯 pua̍h--loeh，大大力 tǹg 塗 kha，「aih-ioh！」ai 1 聲，腹肚 lám--leh，kha 開開 khiau-ku 坐，A 欣看烏 tòo 紅 ê 血 liâu-liâu-á 透對長衫 ē-kha--出-來，tsa-bóo gín-á tshùi pè ha-ha，目 tsiu 金金 khû-khû 直 tsùn。


＊　　＊　　＊


確實東煥無才調 kā A 欣放 bē 記--得，A 蓉 làu 胎了後，月內 bē-tsîng 做 suah，伊已經轉來 kā A 欣上課。


Gín-á 無--去-ah，gín-á ê 老母 mā 娶--ah，東煥對 A 欣無變，猶原 hōo 伊感覺伊是伊全世界上 kài 愛 ê 人，精差 A 欣三不五--時 ē tī 半暝驚 tsi̍t-ē 精神，伊知伊 tio̍h 離開 tsit-ê tsa-poo-lâng，m̄-koh 有心無力，親像 ia̍h-á tshū 火是天地生成--ê，koh-khah 惡毒熱 mā 是 ē uá--過，tse kám 有理？讀者 nā 對人有認 bat，應該知影車 ē tòng--得、牛 ē 牽--得，nā 人 ê 心--leh，有時陣 m̄ 是人 ka-tī--ê。

Posted by lausenghian at 樂多Roodo! │23:08 │回應(0) │引用(0) │講古
樂多分類：文字創作 工具：編輯本文
Ads by Roodo! 

引用URL

http://cgi.blog.roodo.com/trackback/2867335
  


回最上方