<< 走（三） | 回blog首頁 | 走（五） >>

March 16,2007

走（四）


鹹酸苦 tsiánn 甜 hiam sia̍p，愛情是 toh 一款滋味？Huan-sè 隨人想法各樣，m̄-koh tú tam-tio̍h ê 時，攏是甘 kap 入心脾--ê，A 欣去學校上課，東煥去別位教課 lia̍h 外，不時做夥去看電影、se̍h 街路，兩 ê 人手牽手，A 欣頭擺感覺 tsit-ê 世界有可能是好--ê khah-tsē 過 bái--ê，koh ē jú 來 jú 好，相攬 ê 時，伊真相信有一工，萬項事 ē tsiânn 做無破 phà、無欠點 ê 款式。


Án-tsuánn 講愛情 ē tsiah-ni̍h siânn--人，kiám-tshái 讀者心內了解，真 tsē 時陣，tsē-tsē 人是 tī 愛情內底，tsiah 頭一擺 kap hiah-ni̍h 燒 ho hia̍h-ni̍h 深沉 ê thiànn tsih-tsiap，tse m̄ 是講 A 欣 ê pē 母無疼--伊，phah 算 A 欣 ē 講 kah bē 輸厝--ni̍h bat kā 苦毒、hōo 伊有欠缺，m̄-koh 對伊 sian m̄-thang 耳孔輕。總--是 lán nā 看 sì-khoo lìn-tńg，現此時厝--ni̍h ê 人親 tshiang sann-thiànn--ê，猶原是 hōo 人欣羨 ê 對象 kám m̄ 是？Tse 到底是 pē 母 ia̍h 細 kiànn ê 問題--leh，是人心理生成有 ê 變化，或者是了後 thiau 意故 ia̍h 無細 jī 放外外--ê，lán m̄ 知，上好是等社會學家斟酌來研究 kap 解說 khah 妥當。


A 欣 iáu tī 台北讀高中 tuà 厝--ni̍h ê 時，有一暗放學 khah 早轉，hit 陣無別人 tī-leh，kan-tann in a 母坐 tī phòng 椅頂 tsheh-khùi，伊 m̄-bat 看老母 tī 伊面頭前流目 sái，因為驚 tsuann-á 無問，無 juā 久，電話 giang，伊 uá 去接，bē-tsîng 出聲，hit-pîng 頭 1-ê tsa-poo-lâng 雄雄講：「A 淑！我是愛--你-ê！mài koh tiû-tû--ah，tsín sûi tuè 我走好--無？」


A 欣 tshuah-tsi̍t-tiô，m̄-koh 伊已經 m̄ 是細漢 gín-á--ah，kā 電話手出力 tso̍h--leh，走去 in a 母 hia，當頭 tō 問：「A 母，hit-ê tsa-poo 是 tsiâ？A 爸 kám 知？」


In a 母 kui 面全目 sái，gia̍h 頭看--伊，目頭結結，sió-khuá gông-gia̍h，A 欣無等伊應，「你是 án-tsuánn ē 做 tsit 款代誌--hannh！」A 欣尾--ah huah kah kài 大聲。


In a 母見笑轉想氣，出手 tō ùi 伊 ê 面 kua--loeh，A 欣 bē 堪得氣，雄雄 tshun 手 sak in a 母，換 in a 母去 hōo 驚--著，目 tsiu tián kah 大大蕊 kā gîn，A 欣無 tshap--伊，huan 身走入去 ka-tī ê 房間。


Khah 晚 in a 爸到厝，A 欣 in 老母 sûi tâu 講 tsa-bóo-kiánn 不孝，出手 phah--伊，in pâ 聽了，無問 tō 走入去 A 欣 ê 房間，kā A 欣 ùi 衫 á 領 tsang--leh，無話無句，大大力 phiak phiak 2-pîng tsiâu siàn。


A 欣了後離厝，日--時去學校，暗時 tī phà-bù a-lú-bài-toh，ka-tī tī 外口 suè 厝、kā-tī 食穿，1 工睏無 3 點鐘，m̄-koh i tsiânn kiūnn-phiah，等半冬後 in pâ tī 病院 tshuē-tio̍h 伊 ê 時，人 sán kah 親像用 iân 線 khûn--起-來-ê，tse 中間 suah 攏 m̄-bat kap 厝--ni̍h 連絡。


走厝 koh 轉 hit 暗，in 一家夥 á 連 in a 兄 4-ê 坐 tī 飯桌，in a 母 kap a 爸 tshuân kah 真 tshenn-tshau，食飯 ê 時無人出聲，kan-tann A 欣 in pâ 直直唸講：「轉--來 tō 好，轉--來 tō 好。」不時 ua̍h 入去房間擦目 sái。


食飯飽，in a 母 koh 走出去買 pháng，the̍h hōo A 欣，「tse 是你上 kah 意 ê pháng，定著 tsiânn 久無食著--ah-hoohnn。」講 ê 時，目 tsiu 無 siánn 敢 kap A 欣對看。A 欣無去 hōo hit 幾塊 pháng 買收--去，事實上，in a 母隔轉工對伊 mā 踏硬變 1-ê 人，自 hin 了後，母 á-kiánn 不時 uan-ke，兩 ê 人中間，一直 bē 輸有日頭 tshiō bē-tio̍h ê 烏影 tī hia，A 欣 ê 講法是 in a 母心肝重 khi-pîng，khah 疼 in a 兄，in a 母--leh，講 tsit-ê tsa-bóo-kiánn 無有孝--伊，厝--ni̍h ê khang-khuè m̄-bat tàu-sann-kāng--過，一來二去，人厝--ni̍h ê 代誌，lán beh 知真 oh，toh 一句是白賊，toh 一句是事實，tī tsia 無按算 beh pué-huē。


M̄-tsiah A 欣 ka-tī 來 tī 新竹讀大學了後，ē 感覺得著 tháu 放，東煥 tsiânn 做伊性命 ê 日頭，精差 beh 十 juā 歲，hit 當陣 mā 無頂真想 ē 透流 ia̍h bē，橫直一世人幾 ā 十冬，mā 是 1 工 1 工粒積--來-ê，少年 ê 時，siánn 人 m̄ 是 1 工--過準算 1 工。


戀愛 ê 人，四常 kuānn 1 支「我愛--你」 ê tshùi，khah-tsia̍p 講--ê，huān-sè 1 工 ê 飯 to 無食 kah hiah tsē 粒，有 1 工 beh 暗 á，兩人沿清華大學牆圍邊 á ná 行，日頭 tshiâ 西半 lâm-hânn，邊 á 攏無雲，m̄ 知是風飛沙 ia̍h 是 sió-khuá tah 濛，色水粉紅 bē tsa̍k 目、看著圓 lìn-lìn，A 欣無張持講：「我愛--你！」無量講東煥 ē 笑笑 kā 應：「真希望你 tsit 世人獨獨對我 án-ne 講。」A 欣 hit 陣 tshùi 無答應，suah 親像去 hông 落符 á 起堅心，了後 7、8 冬，tsiân 實 m̄-bat 有第 2-ê tsa-poo-lâng ùi A 欣 ê tshùi koh 聽著 tsit-3 字。


話 huân 話，事 huân 事，日頭無隨時 tiàm tī 天頂，四季 ê 日光 mā ē 變化，nā ta̍k-tsān 愛情攏 bē 改變，m̄ 知人生 ē ke juā 好--leh。

Posted by lausenghian at 樂多Roodo! │22:36 │回應(0) │引用(0) │講古
樂多分類：文字創作 工具：編輯本文
Ads by Roodo! 

引用URL

http://cgi.blog.roodo.com/trackback/2862539
  


回最上方