March 13,2007
走（二）
A 欣看--起-來無精彩，A-tái 接著 i ê 電話，去中山路 kap 民生路口 tsih--i，tī 台北市 ê khan-pán kap ni-óng ē-kha，A 欣 ê 面無 siánn 血色，面皮 hōo thiám-thâu kauh--過，略 á 有 jiâu 痕。
「真辛苦，加班加 kah án-ne。」A-tái 輕聲細說帶疼惜。
A 欣 hit-tang-tsūn 應--siánn，kiám-tshái 是「ngh」ia̍h「oh」，A-tái tsín 想 bē--起-來，i kan-tann ē 記得 A 欣 hit 暗 kui-ê 人親像花枝 ia̍h 透抽 hit-tsi̍t 樣，冷冷滑滑，uá 過攬--i ê 時，好 tshan-tshiūnn teh kap 死體告別。
＊ ＊ ＊
「A 琪，你替我問--i，我問 i 無路來，親像 tìm 石沉入去 Ma-li-á-nah 海溝，有 tshē 底--無？Tiang 時 tshē 底？全全 m̄ 知。」A-tái 後--來 khà 電話 hōo i ê 朋友 A 琪，A 琪是 i 進前公司 ê 同事，舊年 bat 一陣人做夥去平溪放孔明燈，mā 熟 sāi A 欣，A-tái 想講，tsa-bóo gín-á huān-sè khah 摸有 tsa-bóo gín-á ê 心。
＊ ＊ ＊
Tsih-tio̍h A 欣了後，兩 ê 人去八方雲集食煎餃 kap 水餃，了後轉來 A-tái sùe 厝 ê 所在，A 欣直直 tu 講 i 真 thiám，ài A-tái hōo i 好好 á 睏--tsi̍t-tshínn，在水 mài 吵--i，A-tái 有聽，雖然 i 想無，做伴 tō 是好 tī thiám-sin kap 艱苦 ê 時，thang sann 扶 tshah sann 安 tah--ê，m̄-koh i suah 感覺 ka-tī tī A 欣 ê 性命內底，khah 輸 1 粒無張持生出來 ê 粒 á，摸 tio̍h tō ià，無--去 bē thiànn。
A 欣睏 beh 幾 ā 點鐘--ah，A-tái 倒 tī i 身軀邊，睏 bē ka-tsuē，i tshuē 無 1-ê tio̍h ê khuh-sè，thán-tshiò、thán-khi、thán-phak lóng bē khùinn-ua̍h，i 感覺身軀邊，有 1-ê i 愛入骨 ê tshenn-hūn-lâng。
透早 5 點外，A 欣翻身來向--i，青碰白碰來攬--i，kiám-tshái 無精神--過-來，到底有醒--無，A-tái mā m̄ 知，「i kám tsiânn 實知影 i 攬--ê 是 siánn-mi̍h 人？」A-tái 無張持 án-ne 想，總--是 i m̄ 甘--i，mā tshun 手 kā 攬--leh，面向面 ê 時，A 欣燒燒 ê 氣絲 á pûn 來 tī A-tái ê 鼻 á，A-tái kā tshùi 唇 khap tsiūnn A 欣 ê tshùi 唇。
＊ ＊ ＊
「A-tái,
我寫 tsit 通 email hōo 你，請你 ài 先諒解，為 tio̍h beh 知影 A 欣真正 ê 想法，我 tshām i 講 ê 時，有 khah 為--i，請 mài 犯嫌。
A 琪」
E-mail kah ê 檔案，是 A 琪 kap A 欣 ê msn 對話記錄，ē-kha kan-tann 摘內底 ê 幾句 á：
A 琪--馬 hông 起訴，放炮慶祝 (22:31)：
A-tái bat 點--tio̍h，講你 m̄-bat 對 i 承諾--過。
A 琪--馬 hông 起訴，放炮慶祝 (22:36)：
你 kám 有愛--i，2-ê 人 beh 行來講。。。人 kap 人本 tsiânn tō 無生成像落榫 hiah bā--ê，nā 有問題 mā 免 siunn 煩惱，mài 閃 phiah，做夥處理。。。sio tháu-thuah，定著 ē 解決--ê，mā ē jú 行 jú 好。
A 欣 (22:37)：
我 kap i 應該是無望--ah，2-ê 人 bē 輸是無 kāng 星球來--ê，beh án-tsuánn 好好 á tàu 陣--leh？
A 琪--馬 hông 起訴，放炮慶祝 (22:37)：
意見 koh 樣 m̄-tsiah 正常，價值觀有精差，兄妹之間 mā tiānn 有--ê-ah，總講 1 句，你 ài kā 講--ah，beh 行 m̄ 行，lóng ài 溝通--ah。。。A-tái 講 lóng m̄ 知你 án-tsuánn 想--neh，lín 應該好好 á káng--tsi̍t-ē。。。
A 欣 (22:38)：
Gún ka-tī ê tāi-tsì ka-tī 知影，橫直我看 tsit 段感情一定 ē 死，定著 tio̍h tshé--ê。。。
＊ ＊ ＊
A-tái ê 手 tê 順 A 欣 ê kha-tsiah-phiann，來 kah i ê 腹肚邊，落去 kah kái 邊，感覺 tâm-tâm-tâm。
天 tú 拆 ha̍h，潭--ni̍h 有孤舟 thenn 篙，水含船 pue、pue pué 水，潭 phôo 船身起起落落，船 lu 潭水 giâ íng 起泱。
A-tái 尾--ah un 倒 tī A 欣身軀頂，面 phīng tī A 欣 ê 耳 khang 邊大大力喘氣 ê 時，i 的確想講 A 欣是 siunn thiám，m̄ 是對 i ê 感情有變，無，kám 講 tse 一切是天光進前 ê 茹絮夢？
Tsit-lō 心理，hōo i kāng hit 暗讀 tio̍h A 琪寄--來 ê 電子批 kap MSN 記錄 ê 時，頭殼 bē 輸去 hōo 鐵鎚 á 猛 khiat-khiat hám--落，心肝 ínn-á 親像用 khau 刀 1 片 1 片 liô--起來，kui-ê 人 un 落去塗 kha，直直起 bán-me̍h，目 sái lìn--出-來 ê 時，i 想 beh 大聲 âu 叫，m̄-koh hit 聲 suah khah kuân 過 i ē huah--ê，肺管--ni̍h kan-tann 凋凋冷冷 ê 空氣 nǹg--過。
＊ ＊ ＊
手機 á 直直 tân 直直 tân，A-tái kan-tann 坐 tī 塗 khah tsheh-khùi 無去接，一直 kah 手機 á 出無 kâng ê 音樂聲，i tsiah kā khioh 起來看簡訊。
「你 m̄ 接電話，是 beh án-tsuánn 講--lah！」A 欣 ê 簡訊。
A-tái 想 tsi̍t-khùn，「好，講 hōo 明！」tsiah khà--過。
「我 lóng 知--ah，kah nā 是你 ê 心無 tī 我 tsia--ah，lán mài koh 互相 tam 誤。」
「無 hit-lō tāi-tsì！」A 欣 pué-tshùi，「你是 teh 話--siánn？你 m̄-tio̍h 聽我親身 kā 你講--siánn，我對你無變，mài 烏白想好--無？」
隔轉工透早，A-tái tī 電子批口座看 tio̍h A 欣 ê 批。
「A-tái,
你 tī 我 ê 心內，猶原是無人 ē-tàng 替換--ê。
Kā 你 ê tāi-tsì 處理 hōo 好，來 tshuē--我，kā 我求婚。
我想你 tiānn-tio̍h 對婚姻驚惶--ah，m̄-koh 我 ê 想法 tō 是 án-ne。
A 欣」
暗頭 á，A 欣 khà 電話約 A-tái--出-來，兩 ê 人坐車去烏來浸溫泉，溫泉 hoo-the-luh ê 房間--ni̍h，浴間 ê 溫泉水 kòng-kòng 流，水氣燒燒白白，燈光黃 huánn 黃 huánn，A 欣倒 tī 眠床頂，kui 身軀 kan-tann hâ 1 條白 sí-sat ê 浴巾 á，kha 腿交 thia̍p，手抱 tī 胸前。
「你 kám 無想 beh kap 我 sńg‧‧‧‧‧？」A 欣目神親像山頂鹿 kok 叉 khînn uá--來 ê 天星光 iānn-iānn。
A-tái 畏畏 kā 看，sió tiû-tû、liâu-liâu-á kā A 欣攬--leh，kā 浴巾 khiú--落。
＊ ＊ ＊
Kui 月日久，A-tái 見無 A 欣 ê 人，心情親像地下室漏水，sàm-tām koh tshàu-phú，A 欣不時 huah 無閒，電話無接，兼 the 講無時間見面，ta̍k 暗 tī MSN 頂 kuân，A-tái 問 i 是 m̄ 是變心--ah，i suah tsènn 死 m̄ 認，總--是 i 猶原無確定 ê 承諾，A-tái kā 山頂垂--落-來 ê 索 á khiú--leh，1 步 1 步 peh kuân，m̄-koh sa 無頂面索 á 縛有 ân--無，或者是 hit-ê 人 siánn-mi̍h 時陣 ē 放手在 i pua̍h--落。
2 月 14，想 tio̍h i tsiah 無閒，kan-tann 知 tio̍h 對 i khah 好，A-tái 早起出門去花店買 A 欣上 kah 意 ê 海芋，ē-poo 直接去 A 欣 ê 辦公室，khà 手機 á 請 i 落--來。
「情人節快樂，我真愛--你，ē-tàng 見 tio̍h 你，比死了 koh 活 khah 好‧‧‧‧‧」A-tái 停 tsi̍t-khùn tsiah koh 講--lueh。
「只要你心無變，tō-tsún 你是 to̍h-mé-mé ê 日頭，我 mā 甘願做 1 隻 ia̍h-á tshū--你，燒做火 hu mā 無要緊。」
A 欣 kā 花接過手，sueh 多謝講 i 真歡喜，m̄-koh A-tái 感覺 i ê khùi-kháu bē 輸熱--人暗時 ê 涼風，等 tsi̍t-khùn，A 欣 tsiah kā A-tái 攬--leh，真輕力，A-tái hiàng 時無頂真想 tshun，明明出日，hit-kang 是 án-tsuánn iáu 寒 kah。
捷運頂，看 tio̍h A 欣 kah hit-ê tsa-poo 做 sán-khùi，i tsiah 知影，有 ê 人談感情是 hē 性命，m̄-koh 有 ê 人 kan-tann kā 當做 kè-muh，tsám-tsue̍h iáu 算好--ê，nā 反起反倒，用瞞用騙，求婚 mā thang 好做 i mài 明明 á 分拆 ê nuâ 頭，beh 問是 án-tsuánn--leh？問 bóng 問，m̄-koh 恐驚 á 是連睏做夥 ê 時，心 to 無一定有 tàu 陣，koh-khah 免講 lia̍h i 有路。
無的確是報應，A-tái 想，精差反背了後，是老實是白賊 niā-tiānn。
引用URL
http://cgi.blog.roodo.com/trackback/2842843
![[Syndicate this site]](http://cdn.rimg.tw/images/blog/rss.gif "Syndicate RSS feed"){kind=small}
![[Syndicate this site]](http://cdn.rimg.tw/images/blog/atom.gif "Syndicate ATOM feed"){kind=small}
