May 23,2014 16:14

無正常ê海豬仔腦



設使「失眠」是睏了無夠ê意思,tshím想,「失眠」會較好過「無眠」,to「失眠」ê時,「睏眠」是極加kan-tann拍毋見一部份,較贏攏總拍無--去咧「無眠」kám毋是?人講:「怨無,無怨少」,就是tsit个意思,毋過,「睏」tsit件代誌干干仔佮別項無仝,伊kánn是缺欠較慘tsiâu無。 會記得捌佇新聞紙讀著一个婦人人ê故事,伊無眠已經數十冬久,啊to也活著好勢好勢,醫生是逐款愛睏藥仔試了了,就是無才調予伊睏,記者講伊真困擾,總--是,新聞內底,無進一步解說伊是按怎會感覺困擾。

伊ê困擾我凡勢知!因為幾若冬前,我也捌無眠,窮實無眠假若「無要緊」,hennh,有影tshan像「無啥要緊」,人明明無法度睏,毋過日--時煞仝款精英,攏袂愛睏,嘛袂忝頭,hit當陣,獨獨一項症頭咧kā我點tuh講無眠袂用--得,就是腹內不時袂輸有火咧燒,是咧燒按怎咱毋知,檢采是親像oo-tóo-bái走了傷過頭久,ia̋n-jín欲sok--起-來按呢,嘛閣「燒」還「燒」、「袂忝」還「袂忝」,若據在伊去燒,都也無欠體力佮精神,日子照常咧過,凡勢oo-tóo-bái就是按呢生,才會走kah ia̋n-jín sok-sok去。

腹內火to̍h隨在--伊?我都無咧悾闇koh,究真人毋是oo-tóo-bái,oo-tóo-bái ia̋n-jín若sok--起-來是開錢bőo-lìn-guh就好,若人忝一下用張老衫(tiunn-lāu-sann)「束」--起-來,恐驚仔bőo-lìn-guh都無效--去-ah,「無眠症」做一下利流,顛倒變「無閣再精神」-hit一句「睏到十三殿--去」字面ê意思。

是講tse歹講呢!人hit个婦人人無眠數十冬都也無「sok」--起-來咧,假使人生(jîn-sing)行出尾就是愛「眠無煞」,是按怎袂用得上尾才做一擺「睏予夠氣」?若「活咧」是福氣,啊「睏眠」是活物(ua̍h-mi̍h)生成愛還ê債務,按呢,無學一般人偏舖還(phinn-phoo-hîng),顛倒有hit號天份,會當佇人生ê上落尾一擺總清,按呢都也無較bái,kám毋是?橫直對期若到,是予你無睏就袂使--得咧!

苦憐我前一擺「對期」到ê時,檢采是一隻海豬仔ê款。

一冬前睏眠病閣開始咧反症,tsit擺真bái,「無眠」換「失眠」,我後--來想講,kám會重閣投胎ê時,我帶一粒海豬仔腦?無,thài-thó會睏袂ka-tsuē,規暝透暗淺眠,ná像oo-tóo-bái油路khit窒--著,頓--一-下sìm--一-下,天光進前,著精神數十擺。

是按怎佮海豬仔有底代?後壁才交代。Tann咱先來kā想看覓,是攏袂愛睏較好,a̍h是愛睏煞睏袂落眠較好?若無別項好揀,我敢相輸,hit个無眠ê婦人人伊會甘願無眠,嘛袂愛數十冬精神數千擺咧失眠,tse理由真簡單:人若「無眠」會當擋幾若冬,毋過he「頓眠」ê「失眠」毋免久,三兩工就袂堪--得ah,按怎講,咱thìn好換一件來比論:咱攏知坐長途車真忝頭,毋過,若車坐咧一直順順仔行,做一擺予過,定著較贏車hián規路,「失眠」就袂輸是去坐著khű-sióng歹--去ê bà-suh,趒攏無停,趒甲連袂眩車ê人to tshi̍k甲接載(tsih-tsài)袂牢,毋才講,欲「失眠」,甘願「無眠」。

翻頭來會--一-下,毋是我無代無誌去牽拖海豬仔啦,是有一擺代誌處理了bái--去,hông罵kioh:「你是豬喔!」我知影豬其實真巧,予罵--我ê人做就好,若我咧,我閣較巧,我應伊講:「我若是豬,嘛是海豬!」自按呢,性命hām海豬仔相交tshap,無張持有一工煞無事無白會替海豬仔煩惱;咱攏知海豬仔佮海翁毋是正港ê「魚」,in是飼奶動物,所致正港ê魚用鰓來喘氣,啊海豬仔佮咱人相像,是用kōo肺,tann惱--ah,咱kā想,泅水欲泅會雕達,要緊就是愛會曉換氣,因為tse肺不比鰓,是袂注水--得-ê,閣咱嘛知海豬仔會曉換氣都著,in不時會浮來佇水面吐氣、suh氣,自按呢無激水死ê問題,問題是,禁氣無禁規暗ê理,按呢,海豬仔若愛睏,毋就攏浸浸--死?

Kám講海豬仔tsiâu親像hit个婦人人,攏khit致著「無眠症」?就是tsit个咧好玄,我緊去google,看海豬仔是會睏a̍h是會死。

平平是飼奶動物,海豬仔巧是通人知--ê,咱凡勢嘛攏臆有著海豬仔ê腦參咱人仝款分做兩爿,毋過,恁kám知,海豬仔in真gâu,欲睏眠嘛欲喘氣,當時仔(tang-sî-á)就是in ê腦會當相放伴呢!啥乜意思?著!就是你想ê按呢生!海豬仔ê倒爿腦咧睏ê時,正爿腦就負責維持,取固定ê速度泅進前、保持警戒,有需要ê時,閣知浮上水面喘氣;啊倒爿腦睏--一-站-仔了,就會精神來當值,換正爿腦去siàng大眠。

Uah!Tse kám無蓋奇巧?!兩爿腦輪流睏!自按呢規暝睏--一-下、精神、眠--一-下、醒--起-來,ká-ná咱人失眠ê款式,精差海豬仔腦是兩爿腦相換工,毋是親像人腦會齊(huē-tsê)同起落,海豬仔腦較sîng是咧坐硿蹺枋(khōng-khiàu-pang),就是tsit个關係,我講tse失眠ê腦,平平是睏--一-下、精神、眠--一-下、醒--起-來,毋過伊是歹--去ê硿蹺枋,吊槔(tiàu-oo)卡死死,縛縛做一伙咧浮沉,袂撨摵--得。

自古早甲tann,真濟文學家將「睏」當做「會喘氣ê死」來論,以睏眠佔咱一世人三份一ê時間來划算(huâ-sǹg),咱若學會曉海豬仔ê步數,咱隨人毋就攏加三份一ê歲數thang活!

可惜人類佇睏眠tsit方面,無海豬仔tsiah發展;就是因為按呢,咱有醫生咧tánn-tia̍p「無眠」、治療「失眠」,嘛是因為按呢,「無眠」佮「失眠」tsiâⁿ做不止仔濟文學作品ê主題,比論美國歌手、bai-óo-lín演奏家兼詩人 Emilie Autumn,伊描寫失眠ê字句,有影足生真活掠: 

是按怎我永遠無才調倒轉去眠床頂?
是啥人ê聲佇我ê頭殼內tân無停?
Tsia-ê hông落志ê夢ê意義是佇tah-lo̍h?
是按怎我佇半小死ê時著愛精神?

咱ê文學閣較豐沛ê因端,煞是因為咱ê腦較輸海豬仔?!毋過足了然,我並無因為按呢,寫啥mih媠ê詩--出-來,關係「失眠」tsit个顧人怨ê症頭,我無欲親像Emilie Autumn hiah孽,講號做「我kan-tann睏我心愛ê人,tse就是我失眠ê起致 。」我欲牽拖,愛欲牽拖對我頭殼骨內底hit粒無正常ê海豬仔腦去!

Tse牽拖ê邏輯是按呢生--ê:假使我ê前世人有可能是海豬仔,按呢,我應當愛會曉將hit粒進步ê海豬仔腦捾來後世人才著!事實煞是:Tse倒爿腦佮正爿腦毋知按怎咧撨摵袂好勢,in袂曉相放伴歇睏,結果就是規暝siò-tooh siò-tooh,過--一-站-仔就欲「做伙」醒--一-擺,kám講,佇tsit个人世間沐沐泅,嘛著驚家己會因為睏--去,tsua̋nn袂記得浮上水面換氣thiām-thiām--死-sìm?

昨--日,佮一个朋友講起tsit層代誌,伊ê解說予我真gông-gia̍h,伊講:「He是因為人有靈魂,所以海豬仔腦才會無才調佇人ê肉體(hi̍k-thé)正常運作。」我問伊按怎講,伊應講:「若人兩爿腦分拆,隨个做隨个ê代誌,毋知會齊(huē-tsê),,按呢靈魂毋就花花--去,毋知著佇佗一爿腦主張?」伊閣講:「設使人ê靈魂獨獨一个,袂使分拆,按呢,咱人ê腦合該然袂使得分拆做兩个,予一个當值,閣一个歇睏,因為純潔單一ê靈魂本身,莫(mài)講pit做兩橛(kue̍h),伊連淡薄仔hâm-sau都無!」

若照按呢講,我煞會煩惱海豬仔有靈魂--無?Tse傷歹google,較久仔才閣來試;啊若人咧?是有google著一寡資料,內底講,誠實(tsiânn-si̍t)有人腦梁斷--去,去致著兩爿腦隨个隨个咧活動、袂相整會ê病症lioh,若照頂懸ê理路,hit个人毋就無靈魂?(A̍h是靈魂有影會當斷做兩橛、湠做兩个?)

想來去倒,我猶原毋知靈魂到底是啥貨,嘛猶未決定是有靈魂較好,ia̍h是會當兩爿腦輪流睏較好,我著kōo tsit粒無正常ê海豬仔腦閣紡--一-下,thang考慮予真。

  • 您可能有興趣:

    補償 ê 心理
    lausenghian 發表於樂多回應(0)引用(0)心內話編輯本文
    樂多分類:文字創作切換閱讀版型 │昨日人次:0 │累計人次:683

    引用URL

    http://cgi.blog.roodo.com/trackback/28246616