<< 轉貼《母語中國》 | 回blog首頁 | Koo-tuann >>

February 28,2007

Candide 摘讀 (二)


（志文 1998-4 華文版 koh 台譯）


【p.167-168】

經過 ta̍k 款 ê 災 eh 了後，Candide kap i ê 愛人結婚，hām Pangloss、Martin tsit 兩 ê 哲學家、以及 精工 sè-jī ê Cacambo、老 tsa-bóo-lâng sann-kap 生活，ta̍k-ê tiānn-tio̍h ē 想講 i ùi 古早 Inca 族 ê 國家 tsah hiah-ni̍h tsē suān 石轉--來，日子一定暢樂無 tè 比。窮實 i hōo 猶太人 tsi̍t 擺 koh tsi̍t 擺 hóo-sai 了後，tshun--ê kan-tann 是 tsit-tè 細細 tè-á ê 土地 niā-tiānn。Tsi̍t-kang tsi̍t-kang ná bái ê 牽手 jú 來 jú 雜唸躁暴，老 tsa-bóo-lâng 因為行動無方便，性地 koh khah pháinn 過 Cunégonde。Cacambo 作田，去 Konstantinople 街-ni̍h 賣菜，oan-nā 不時為著 sit 頭重氣 tshuah-tshuah。Pangloss beh tī 德國大學出名 to 無望--ah。Nā Martin--leh，i 知影 m̄ 管去到 toh，歹運 lóng ná 司公 á tshiūnn-pue tuè-tiâu-tiâu，m̄-tsiah i 萬事 thun-lún。Candide、Martin kap Pangloss 3-ê 人三不五時為哲學 kap 道德問題車盤無 suah。


【p.168-169】

老 tsa-bóo-lâng 入來 kā in 講：「‧‧‧‧‧一來二去，lán ta̍k-ê 所 tú--過 ê 歹運，hām 無 gī 無 niū 坐 tī tsia，toh-tsi̍t 方面 khah 不幸？」


「Tse 是 1-ê 大問題。」Candide 講。


老 tsa-bóo-lâng tsiah-ê 話 lā 新 ê 話頭--出-來，特別是 Martin，i 論 tiānn 講，人類 nā m̄ 是活 tī 不安 ê bán-me--ni̍h，無 tō 是活 tī ià-siān ê 大眠--ni̍h，iā 人是為 tio̍h 過日出世--ê。


【p.172】


「想--起-來 你 tiānn-tio̍h 有大大 phiàn koh lè-táu ê 土地。」Candide kā tsit-ê Türkiye 人講。


「20 英畝 niā-tiānn。」Türkiye 人應講，「是我 kap gín-á 開--出-來-ê。只要作 sit，lán tō ē-tàng kap 無聊、歹習慣 kap sàn-tshiah tsit 3 大歹運離 kah 遠遠遠。」


＊　　＊　　＊


「我知，lán tio̍h tī ka-tī ê 田--ni̍h phah-piànn 作 sit。」Candide 講。


【p.173，冊上尾句】


「咱 tio̍h 作 lán ê 田。（Il faut cultiver notre jardin.）」（Candide 講。）

Posted by lausenghian at 樂多Roodo! │11:54 │回應(4294967292) │引用(0) │哲學
樂多分類：文字創作 工具：編輯本文
Ads by Roodo! 

引用URL

http://cgi.blog.roodo.com/trackback/2781003
回應文章
  


回最上方