<< 扑予你半小死，自然發展開始！ | 回blog首頁 | 坐毋著 >>

February 2,2007

Khok-hia̍h-á kám iáu 有 tī-leh？


Khok-hia̍h--ê 前 tsi̍t-tsām-á 人無抵好，無去工場，想講是 sió-khuá 感--tio̍h，tī 厝--ni̍h hioh--幾-日-á tō 好，無量講半暝重熱，去藥房 thiah 退燒藥 á 食了 mā 無效，隔轉工 暗頭 á tsuann-á kui-ê m̄ 知人--去，等 kah 早起叫救護車，送去到病院，已經救 bē 赴--ah。


今 á 日是送 tsiūnn 山頭 ê 日子，親晟朋友 tsiâu 來到位，Khok-hia̍h-á 嫂 穿麻帶孝 (tsīng-muâ tuà-hà) 、捶心搭紐 (tûi-sim tah-liú)，gia̍h 香跪 tī 板 á 頭前，ná 拜 ná 號，哭 kah 1-ê tshùi ná 布袋--leh，啥人看 to ē tuè leh 艱苦，連隔壁刺瓜 in 翁 á 某飼 ê 烏狗 A 財，mā 聽 kah un tī 壁邊 tsheh-khùi。


Tshàu-tú-khàm 莊--ni̍h hit-ê 因為細漢重熱孝呆--去 ê A-thian行過，無張持 uá 來 Khok-hia̍h 嫂--ah ê 身軀邊，tah i ê 肩 kah 頭，Khok-hia̍h 嫂--ah 號 kah tng 入意，雄雄 hōo tah tsi̍t-ē tshuah tsi̍t-tiô。


「你‧‧‧！Thiah--ê-oh，按怎--sìm？」


「大嫂，你 nah ē 號 kah tsiah 傷心？」


「Thiah--ê！你 m̄ bat--lah，tann Khok-hia̍h--ê kha tshun--leh 做 i 去，出山了後 tō 看無人--ah！」


「大嫂，你 nā 想講人過身親像臭油 ti̍h-á 燒 ta 火 hua 準 suah，按呢你是 teh 拜--啥？」Thiah--ê 停 tsi̍t-khùn koh 講--loeh，「你 nā 相信人過往是去到另外 tsi̍t-ê 所在，i to iáu tī hia 相等--leh，按呢你是 teh 號--啥？」


Khok-hia̍h 嫂--ah 目 tsiu 金金、tshùi-á 開開，tsi̍t 時陣應無話，hit 工送山 mā 因為 tsit-tsân 代誌去 tshiân--tio̍h，有慢 beh 半點鐘。

Posted by lausenghian at 樂多Roodo! │13:42 │回應(0) │引用(0) │講古
樂多分類：文字創作 工具：編輯本文
Ads by Roodo! 

引用URL

http://cgi.blog.roodo.com/trackback/2688665
  


回最上方