2014-3 月份文章 顯示方式:簡文 | 列表

March 7,2014

補充「天地生成」


前我捌寫一篇文章號做「天地生成」,內底講起著關係「性」ê功能,ing暗看著下跤tsit塊影片,伊uì演化佮社會學ê角度討論「咱人是按怎愛穿衫」tsit个議題,其中,一个因端是:咱ê智慧發展到一个程度,腦佔身體ê比例蓋大,致使人類ê幼嬰仔無法度親像一寡動物足緊就獨立,需要tshiânn需要io;啊「穿衫」tsit件代誌,抾起保護、燒暖、衛生hām社會功能,會當減少性刺激,予人類mài hiah tsia̍p發生性行為,才袂生囝生siunn濟,自按呢無法度好好仔tshiânn囝,所以,穿衫tsit个慣勢就tiâu--leh,因為伊有人類「物種生存」頂懸ê優勢。

也就是講,因為演化,有人類ê智慧發展佮社會功能等等起致,咱人愛beh穿衫,咱uì tsia kā想看覓--leh:演化,予咱人為著智能發展,發生tsiah-nī濟生理變化佮為著物種生存適應ê行為改變,照講,若是「性」獨獨是「生殖功能」,按呢頭前tsia-ê情況綜合來講,應該是「袂直直起痟(華語:『發情』)ê人」會較佔生存優勢,也就是講,hia-ê袂直直起痟ê人,著愛是「演化ê勝利者」才著。

毋過,人類演化kah tann,煞猶原hām大部份ê動物無仝,人類就是「隨時會當起痟」--ê,tsit項生物 / 演化ê事實,其實嘛有證明講:人類ê「性行為」在水(絕對)毋是單純ê生殖功能!




Posted by lausenghian at 21:57回應(0)引用(0)文化
 [1]