2014-2 月份文章 顯示方式:簡文 | 列表

February 21,2014

(短篇小說)年球




「你叫啥乜名?」

伊翻頭看--我,無隨應,顛倒kā我講:「你kám會當kā我ê車牽去路邊,較免佇hia擋路。」我注神看--伊,三十外歲人,佇車厄tio̍h傷ê人邊--a鬥顧,看--起-來面憂憂。
實在講,in這个時代ê車,我袂曉駛,行倚,坐入去hit隻形ná像角魟,無輪仔,離塗兩吋浮浮ê「車」,tsia摸hia摸,無ta-uâ,手khuè佇椅仔邊ê手扞,才咧想講欲按怎駛去路邊爾爾,手扞煞tshiō出笑青ê光,了,車家己駛振動,寬寬仔徙去邊--a停甲好勢好勢,「喔,用意念就會當控制...」Tsit陣,我想著佇病院ê時,明明昏迷不醒,毋過醫生都也用kōo儀器,透過腦波,問我欲接受器官換新通抽壽--毋,若照按呢kā想--起-來,in tsit个時代ê車會生做按呢,就無奇怪--ah。

伊講伊號做Haava,毋知in ê名是按怎號--ê,我是kā想做「夏亞麻」,姓「夏」ê無濟,取「亞麻」做名--ê真罕,總--是按呢想我會較好記;尾--à,我規氣叫伊「阿麻」,我想伊會諒情啦,閣較按怎講,醫生有提醒我干焦賰一工ê時間,意思就是我嘛干焦tsit一工ê時間會當kā交代代誌,tann過晝--ah,伊若明仔載抑是佗一工想著我,應該袂怪--我啦honnh。

Kā阿麻鬥相共,將昏--去ê駕駛tshah去路邊等救護車,我想,阿麻ê心肝袂bái才著,若佇阮hit个時代,見死不救是四常有--ê,都趕時間、無愛找(tsāu)家己麻煩、閣驚人賴kioh是咱kā害--ê,愛咱kā賠,欲按呢,真濟人規氣假佯無khuàinn,頭越咧做in走。

毋過我會揀阿麻,猶原是靠直覺較濟啦,tse「tawil」終其尾愛交代予一个人,愈善良ê人愈好,啊人心生佇腹肚內,看thài-thó會準?睏破三領蓆都無一定掠有咧,靠直覺做選擇,我想是無較輸啦;閣再講,若連我tsit款粗夫俗子to知影著按怎做較好--ah,阿麻定著嘛會曉才著。


...繼續閱讀

Posted by lausenghian at 11:31回應(2)引用(0)講古 │標籤:小說,文學,台語,台語文

February 6,2014

不止仔thá-khuh ê年


今仔日初七,uì二九暝e晡到tann,我攏無出門,等--leh六點頭一擺beh出--去,按呢有夠「thá-khuh」(宅)--無? XDD

雖罔一直關佇厝--裡,我有運動,tsit幾工peh樓梯就有五六kái(一kái 40 thóng分),逐擺peh了汗攏像雨用滴--ê,了後就做豹形健身上無50 ē。

其他時間,抾起陪厝--裡ê人,有做足濟平素時仔無時間做ê代誌(像整理資料佮冊),嘛有好好仔歇睏(tse嘛是學期中無法度有--ê),著kah今仔日,我tsiah有koh處理寡正港ê工課路。

後禮拜四就beh轉去竹塹--ah,koh來tsit學期毋知tshiâu有時間倒來台北--無。不管按怎,tsit个過年按呢生過,我真滿意  :D

Posted by lausenghian at 17:42回應(0)引用(0)罔話
 [1]