2013-9 月份文章 顯示方式:簡文 | 列表

September 25,2013

做人先生


有ê先生真辛苦,若去予學生問一下應袂出來,嘛愛假佯做聽無,無,就是愛轉舌關、豬舌搭馬鼻,硬拗--過。

窮實,毋是學生刁工欲找麻煩(tsāu mâ-huân),是學生生成就是這个性,問佛就愛問看佛骨有幾枝,欲學就欲學予透機。先生都也免hiah弓,毋知就現場做伙討論,若論袂--出-來,轉去稽考了,後擺才來應答就會用--得。

毋過這个理,做學生--ê大沉著會曉看人目色,毋是逐个先生攏會堪得直人講直話,這愛看先生ê性。

Posted by lausenghian at 11:14回應(0)引用(0)心內話

September 18,2013

你就無「賣肉」?!



今仔日新聞報講警察查著一个賣姦(māi-kan)集團,內底有一个「看肉師」,負責鑑定賣肉ê查某囡仔ê好bái了thang定價siàu,記者寫kioh:「不動產、古董攏有專業鑑定師,想袂到,人肉市場煞嘛有鑑定師!這種將女性當做「肉品」ê行做,有影真毋是款!」

前拙者就捌討論相關ê議題(啥物號做物化賺食ê法度),像記者先生hām社會上真濟人,掠準講kan-tann「趁食查某」等等特殊ê行業,才算做是「出賣家己」、「將人物化」,實在是想了無真,一種「蜜婆是鳥,徛鵝毋是鳥」ê淺薄想法。

Kám講,咱去允頭路ê時,寫履歷,hông面試,就毋是咧受「鑑定」?未tsîng做,學歷、才情、心理狀況等等會hông比長論短,入去了後,逐冬hông拍考績,主管hông評鑑,教師hông鑑定,教授受趕升等,tsia-ê過程kám就較「高尚」?敢應講「有較高尚」ê人,咱且借問,kám講:「咱一个人ê價值,會當用頭前tsia-ê項mi̍h來評判--sìm?」頭前tsia-ê抾起,足濟公司會要求允頭路ê人先健康檢查交報告,閣有一寡工課,是進一步會對咱ê肉體秤斤秤兩--leh,拙者無烏白講,無,恁kám掠準講he手機仔店ê店員無用生張佮枝骨來過揀?閣有,幾若擺,台電招員工、清潔隊招隊員,毋是攏比鬥走、扛沙袋仔,一陣人為著欲搶hit幾个khueh,並kah大粒汗、細粒汗、舞甲強強欲歪腰--去,甚至傷--著to有,tse,kám毋是人咧kā咱「看肉」?若有tsing差,是tsing差佇看「啥mih所在」無仝niā-tiānn,啥人講毋是!

拙者ê意思毋是欲剾洗任何人,拙者獨獨是欲提醒:「毋通凊彩欲鄙相人ê頭路,因為咱揣頭路、做工課ê規个過程,嘛是咧賣肉,是法度無sio-siâng niā-niā。」

Posted by lausenghian at 12:03回應(0)引用(0)文化

September 8,2013

媒人(hm̂-lâng)



貴--à家己bih teh房間暗靜仔tsheh氣,細漢查某囝阿香tuì門口行--過聽--著,liam跤倚去伊邊--a,貴--à將津來喙角ê目屎pué掉,phuinnh一句:「恁秀--ê甲tann猶未嫁...」阿香隨知中晝in母--à去街仔,定著koh去搪著Lua̍h-khua̍t姆--à,he Lua̍h-khua̍t姆--à上關心人ê序細嫁娶,見著人連相借問to懶,攏直破問講:「啊恁雄--ā佮公司hit个行了按怎?福榮伯--à講hit个查某囡仔生著kài福相。」「恁阿玲phàng好緊交交--leh oo,三十thóng--à neh...he天保嫂頂工講會替你煩惱...」其實天保嫂--à ia̍h福榮伯--à攏毋捌講啥,是Lua̍h-khua̍t姆--à烏白tshiàng名thang做伊家己ê城垛子(siânn-tó-tsí),khah好伊使話箭,啊人若聽了目頭結結,伊煞會喙仔la-hi,袂輸冤家ê人一句過,直透揬入去對頭ê嚨喉空,佔贏咧風神hit一樣。

秀--à欲暗仔下班轉--來,隨tsông入去灶跤,看貴--à就le:「Má!我後月日欲升協理--ah,閣來公司ê總務佮人資就攏我hua̍t-lo̍h--ah oo,副總講月給(gue̍h-kip)上無欲加予我萬五箍neh!」In小妹阿香佇樓頂聽--著,緊走--落-來,「阿姊!Hóo,你báu--死-ah!你愛請阮食飯,無,無欲放你煞啦!」 「戇阿香!餐廳做你揀講,阿姊閣按算年底欲換一台較好ê車--咧,我轉--來ê路--裡有土算,街仔hit間透天--ê無,凡勢落後年貸款就會當納清--ah,eh...咱明年規家伙仔做伙出國好--無?」

兩个姊妹仔手牽--咧,歡喜甲直直趒,tsiah雄雄注意著in母--à攏無應聲。

「Má!你無歡喜--喔?」 「無...無啦!阿母當然替你歡喜--ah!」貴--à喙罔ngiāu,頭煞攏無越,手--裡煎匙嘛無停,秀--à聽了隨接:「Má!多謝你kā阮飼甲tsiah大漢,閣來,阮會kā你有孝,袂予你煩惱食穿徛起!」 阿香斡頭siam著老母ê面,想著e晡ê代誌,緊kā秀--à kháinn--咧,講欲去客廳討論禮拜欲去食佗一間餐廳。

Lua̍h-khua̍t姆--à tsit陣嘛拄到厝,kā電火擗著,厝內恬tsih-tsih,伊kā pháng hē蹛飯桌頂,將桌頂ê紹興--ê開--開,未曾tîn--一-甌,電話giang--起-來。

「Hàinn.....啥?兩千萬?你有講毋著--無?你當做恁祖媽咧khong--sìm,兩千萬就欲離婚?做你蹛大陸佮越南參hia-ê狐狸精(tsiann)消遙?你食較bái--leh啦!做你去gām想啦!恁祖媽攏有倩人咧綴--leh,你就ke燒寡香予豬哥神,mài予恁祖媽tsang--著,無,你一sián五釐to免想欲留,時到,欲放你煞--無,閣愛看恁祖媽ê心情--leh!」Lua̍h-khua̍t姆講煞,隨將電話手抨--落。

酒拄斟好,就猶未搵著喙唇--leh,電話煞閣tân--起-來,Lua̍h-khua̍t姆--à氣phu̍t-phu̍t狂去攑--起-來:「你聽無人話--sìm!?...」Thài-thó知hit爿頭是一个oo-bá-sáng ê聲。「無...無啦,我咧罵阮翁啦......hennh......伊......伊昨昏對大陸--轉-來.....無啦,真無閒,過--幾-工-仔就愛閣過--ah.....阮阿玉仔?Ai-ioh!天保嫂--à你嘛毋通聽人烏白講,阮阿玉仔是佮in翁冤家niâ,無甲欲離婚hiah嚴重啦!無啦!洗面礙著鼻he to定定有--ê,eh...顛倒是恁阿芳--啊,愛緊揣對象oo,hennh啊hennh啊,無欲做老姑婆喔?」聽天保嫂--à有綴喙,Lua̍h-khua̍t姆--à tháu一口氣,緊紲接講:「另工我kā恁阿芳--a紹介--一-下,保證讚--ê-啦!.....啊.....有人咧tshi̍h電鈴,你等--咧tsiah閣敲--來,好...好...先按呢。」走去kā門開--開,阿玉仔一个面臭tū-tū,兩个烏目墘袂輸點仔膠糊--ê,抱一个幼嬰仔mà-mà-háu。

「阿母!維真愛麻煩你鬥顧--兩-工-仔,he夭壽奶母講逐月日欲ke提兩千,我kā講欲揣別人tshuā,毋過臨時臨iāu猶問無適合--ê.....」

Lua̍h-khua̍t姆--à hm̍h-hm̍h將囡仔tsih過手,翻頭行入去客廳,tsiah講:「Hit-sòo毋是兩百萬予--你,閣講一月日欲匯你一萬鬥出--leh,奶母欲起兩千就予起--啊,to也tshuā tsiah久--ah,重揣kám就較好?」

阿玉看著飯桌頂ê酒,「阿母!你閣啉!你to高血壓...」

「好--ah啦!我咧問你你是有聽--著-無?Hit-sòo予--你-ê無夠補添--sìm?」

「阿母!你有食暗--無?哪會桌頂佮冰櫥內底攏空空?」

「玉--à!你是去予恁hit箍毋成老爸帶--著-sìm?臭耳講攏袂翻車!我問你hia-ê錢--leh!你是攏開去tueh?你是無咧替維真拍算sioh!」

「阿母!」阿玉雄雄咻足大聲!「戶政事務所手續辦to辦--ah,伊錢毋匯--來我是有法度--sìm!!!我逐工上班忝甲欲死!!!是欲按怎有hit號閒工走法院kā告愛伊吐錢出來啦?」

Lua̍h-khua̍t姆--à坐佇膨椅頂,孫抱--leh,頭犁犁,喘氣ê時,感覺規間厝袂輸罩烏雺洘洘,胸坎縛縛,電話giang一聲,伊規个人tsua̋nn趒--起-來。

「Hàinn...天保嫂喔...無...無啦,是隔壁來借豆油啦.....拄tsiah講kah tah--ah...啊,hennh,安排恁芳--ê對看,tio̍h啦!看會當緊嫁嫁--leh-無,咱講有一个倚靠honnh,做爸母--ê嘛較放會落心,較免逐日操煩.....」Lua̍h-khua̍t姆--à羊羔面快píng,目nih仔閣喙笑目笑--ah,心內開始咧拍算欲牽佗一家ê後生予he芳--ê,會較有機會。

Posted by lausenghian at 0:52回應(0)引用(0)講古
 [1]