2012-4 月份文章 顯示方式:簡文 | 列表

April 24,2012

電腦咬niáu鼠

當時仔我ê電腦--體號「白--ê」會咬niáu鼠!

當原初niáu鼠仔歹去,koh去買一隻來用,無偌久koh死--去ê時,我是掠準講he niáu鼠仔品質bái.....自按呢koh去買一隻新--ê來替,無想著講,無偌久,第三隻koh死死--去。

無可能le!我無刑虐--in,而且,牌子無仝,無道理會相連紲直直害--去。 唯一ê可能就是「白--ê」反形teh做貓!

Tann,毋敢koh kā niáu鼠仔接佇「白--ê」,無,koh較濟嘛死無夠.....我有咧想講tse檢采是當原初kā「白--ê」format灌Ubuntu了後,啥物韌體走精才去致--著ê怪病,tse了後,著認份,kōo觸控板用摸--ê。

嘛因為重灌了後毛病hia一項tsia一項,我想,就準koh kā format一擺,裝「窗仔門」(Windows),嘛是袂照原--ah...所以koh ha̍k一台「烏--ê」,予「烏--ê」安「窗仔門」,按呢文件格式佮台語輸入攏會較利便,啊若「白--ê」就繼續用「有畚櫉」(Ubuntu),做iú-pì--ê好--ah.....

唉.....叫幾若十个囡仔出面去tshiâu-tshik問題,毋甘tiuh-tiuh neh...

Posted by lausenghian at 18:30回應(0)引用(0)罔話

April 8,2012

來講故事



有一寡仔話囥幾若月日,無講出喙,拄才看公視ê『新世紀福爾摩斯第二季』ê路尾集了(我嘛干焦看這集爾爾 舌),閣一擺碰著彼一款ê劇情排比,所致,決定這馬欲kā講講--出-來。

有一个資深ê先生,講我ê故事攏袂bái,獨獨一項無夠斟酌,設使較點陳--咧,就會加真好,彼就是:「愛注意故事ê合理性。」

這句話基本上是無毋著,假使有一个故事完全無合理,按呢,彼个故事若毋是「毋tsiânn故事」(窮實「傷過合理」嘛會講無故事--啦...),無,就是屬佇另外一个世界ê故事--ah(semantically speaking, a possible world 墨),毋過,咱就準毋捌讀足濟故事、無看過蓋濟戲齣,咱只要會當kā hia-ê戲文、劇情看迵--過,檢采會發現,「無合理」和「無清楚」基本上有兩款來源,一款,是作者無細膩、無張持,一款,是存心刁故意--ê,這號物,作者是無必要著予人「交代」--ê。(後--來有交代--ê就叫做「埋案底」(華語:『伏筆』)--啦 貓

佮意看美女抑壯兄(tshuàng-hiann;華語:『猛男』)ê人,應該袂歡喜一起khiàn就褪甲光裼裼、現拄現ê肉體(hi̍k-thé)hoonnh,上蓋siânn--人-ê,攏嘛是ná看有ná看無,袂輸知、閣也無定著,啥人都會用得提供一个各樣ê答案ê彼號遮閘。

就是按呢,一寡作者有tsang著這个鋩角,所以,咱就莫怪in愛kā讀者tih-tuh--ah(欲講欺負讀者嘛無--打-緊-啦),這件事上心適ê位仔,是「無張持ê疏忽」參「刁意故kā落勾」,其實彼變弄ê效果無啥精差...

壯兄show抑是脱奶舞,he半刁工半無意ê掩崁,是起存心--ê抑是無張持--ê?

一出滋味重重疊疊ê菜,敢袂真oh得通佮孤一項食食彼號直拄直ê氣味相比並?!

Posted by lausenghian at 14:28回應(0)引用(0)文學
 [1]