2011-12 月份文章 顯示方式:簡文 | 列表

December 30,2011

關係婚姻




J教授用心紹介covenant kap agreement無仝ê所在,講起自古早用血立約ê慣俗,參婚姻tī基督教內底是按怎bē用得拆分開ê因端,tse,hōo 我koh一擺去揣資料來看,思考婚姻ê源起頭是啥,婚姻tī人類社會--裡,tī無仝ê時代、文化,有啥無仝ê款式,因為我需要整理tsia-ê想法,khah知影家己愛按怎想khah好,啥mih款立場,tsiah是khah妥當--ê (對我個人ê理解出發)。

是--lah!用血立約、背約者死,確實是一寡文化內底ê現象,總--是,tsit个現象,是原始社會內底,tī the law of the jungle下跤,透過結盟求自保ê手段,tsit號手段,kám有超文化、超時代ê共通性或者是重要價值?Covenant hōo人用agreement/contract來替換,是退步ia̍h是進步?是必然ê發展或者是穢惡上帝?Beh回答tsia-ê問題,khah輸直接問講「咱kám有必要hiah "返祖"」(atavistic)?」 斟酌kā想,tse suah kap封建社會(封閉社會)行向文明社會(開放社會)ê脈絡,相連蒂帶(tuà)--neh。

若婚姻--leh,uì爸權發源,為著確認爸系ê後嗣來設立,兼考慮增加生產力kap經濟力(查某人tī古早是查埔人ê財產),若無,就是為著政治kap權力(透過結婚來結盟),現代ê婚姻,早就無古早ê內涵--ah,極ke是「借殼上市」ê新發明,beh tshiû根源講伊有神聖ê源頭,kám m̄是teh騙人騙家己?

咱koh舉一個例:西方文明內底,一夫一妻ê基本框殼,是Saint Augustine ê發明,聖經內底並無頭尾一致ê要求,咱kám知?

Posted by lausenghian at 15:56回應(0)引用(0)文化

December 28,2011

毋通看伊無


倒爿這張相,是今仔日句法專題半中站下課翕--ê。

Kah tann已經三个箍仔內ê序大(A、L kap T)講做這無路用--ah,袂少人對這款理論tik ê基礎研究攏帶偏見。 

總是,阮相信語言ê運作毋是意識會當掌握--ê,就親像人是按怎會當看見、會當聽見,對聲音,有才調判斷伊來ê方向,彼後壁運作ê原理/原則,咱人無法度直接用淺白ê話開破,因為彼是佇意識下跤ê腦ê運作。 

對囡仔學習語言,in所得著ê材料(刺激)佮發展出語言才調ê速度,咱看著一个奇怪ê現象:刺激無遐夠額/齊全(stimulus poverty),發展煞不止仔緊;若閣加上對語言佮語言中間實拄實觀察會著ê共同性質,語言,應該毋是單純後天ê社會現象,伊有伊先驗/生物ê成份佇--咧。
 
阮相信佇腦科學/認知科學揣著技術/方法對腦內底語言ê運作做直接分析進前,阮會當透過形式/推理/歸納/數學/邏輯ê方式,來揣著語言後壁ê一寡原理原則。 

Einstein佮濟濟理論物理學者,干焦靠一枝筆佮思考,就會當行佇物理實證/實驗ê頭前,看著一寡宇宙後壁ê原理原則,阮形式語言學研究者,透過對語料ê觀察、整理佮形式化ê歸納,參模型ê起造,嘛希望會當行佇語言實證科學ê頭前,提供一寡預測、假設,佮有目識ê想法。 

所以,雖然恁是序大,毋過,我袂因為恁講按呢就放棄我欲做ê研究,恁毋捌,無怪--恁。

Posted by lausenghian at 20:55回應(0)引用(0)學術

December 15,2011

If you [pi~~] with anyone...


昨暗厝頭家來kā我換電視,換好勢開來試看覓,無張持看著某一个新聞台咧報邱毅參陳致中辯論ê新聞,in引某一个學者ê評論,講tsit場辯論用詞真粗魯,水準蓋低等等,內中,有剪一段陳致中咧批評邱毅ê私生活,來回應邱毅對伊私生活ê攻擊,電視台剪ê hit段,是陳致中講:「你較早開補習班,開甲去[消音]家己ê學生,了後佮某離婚...」,看著tsit款ê處理方式,拍算消音hit字檢采是「kàn」抑是「tshàu」,我想任何看著電視台做tsit款處理ê人,檢采攏會按呢理解。

無想著講,我烏白tsūn,tsūn去較後壁ê頻道,煞拄好看著有一台咧重播規个辯論過程,自按呢,我就那無閒工課,那聽看in兩个人到底是有講啥物,嘛因為按呢,我聽著陳致中hit段ê發言,窮實,伊只不過是講:「你較早開補習班,開甲去"睏“家己ê學生,了後佮某離婚.....」

當時仔,「睏」變做hiah垃圾,著予電視台消音啊???

對照下晡seminar ê時,阮做伙讀ê一篇關係不定詞佮自由選擇詞項(free choice item)ê論文,內底拄拄有一句例句,號做:「If you sleep with anyone, I'll kill you.」 若照hit台電視台ê logic,tsit篇句法論文內底例句太put-tóng,凡勢嘛愛kā「sleep」tsit字tsō烏或者是挖空,總--是,按呢敢無傷過khi-khiau?

關係政治人物ê私生活,或者是結婚、離緣,男女交往、用金錢做性交易,事實講,我根本無要意,感情ê代誌、欲佮啥人睏,he是咧行ê兩个人之間愛家己處理、liú-la̍k--ê,毋免別人去家婆關心。總是,佇「睏」tsit字kā人消音ê電視台(做tsit个決定ê人),實在有夠惡毒,在我來看,tse根本是刁工挖空予陳致中跳,人不過是講「睏」,你煞kā人消音,予觀眾誤會伊tshoh啥字眼出喙,若欲比in兩人辯論內容、用語按怎,tsit種媒體,才是正港ê糞埽,敢講毋是!?

Posted by lausenghian at 7:58回應(2)引用(0)文化

December 13,2011

欲死tōng幌ê大尾紅龍



Tsit站仔歐洲聯盟行衰運,毋但揹債務揹甲哀哀叫,一寡成員國甚至想欲規氣拆分開,無想欲閣繼續結(kat)--落-去,幾若个國家ê民意調查,嘛顯示民間對聯盟ê支持度降低,較愛隨人行隨人ê。

Tse,予我想著--ê,煞是幾若冬前,歐洲聯盟當tshìng ê時,一寡人講tse就是聖經ê讖語欲成(tsiânn)--ah,in koh講歐洲聯盟就是《啟示錄》內底七个頭、十枝角ê大尾赤色ê龍(啟12:3;17:3;17:7),tsia-ê人koh根據「十枝角」,讖講歐盟會有十國,結果,莫講歐盟ê旗仔頂是十二粒星,今仔日ê歐洲聯盟嘛已經楦甲二十七國去--ah,角煞比in tànn--ê有重倍較加。

按呢無--打-緊,歐洲聯盟,並無照hia-ê人講--ê,愈來愈興,尾--ah予歐洲變做新ê羅馬帝國,並且出現一个政治大頭人(對敵基督--ê;Anti-Christ;約一2:18;2:22;4:3;約二1:7),了後介入宗教,變做政治宗教ê大帝國...

歹勢呢,歐洲聯盟這馬ê狀況,是莫裂胸散甲就阿彌陀佛--ah,欲按怎有才調閣較和齊、黏閣較倚,而且出現一个逐國攏聽趁ê頭人咧?

親像講tsit款讖語ê人,有影真gâu畫虎lān,講ê時喙舌轉蓮花,等代誌出破,煞無人出來會失禮,顛倒是過--一-站-仔,就閣另外有人出來吐大腸頭,照時勢變化,講一个新ê古予恁聽,出一个新ê讖語講欲成(tsiânn),按呢咧品講聖經偌厲害拄偌厲害,世局按怎行in早就知知知。

Hennh啦,一半擺仔臆著就品勢頭,臆無著就鼻仔摸咧激啞口(é-káu),有影世界gâu都著。

台北101拄起好無偌久,台北有一間會友成(tsiânn)萬人ê大教會,有人講讖語,講101會倒會崩崩--落-來...tann七冬都也欲過--ah,講會倒ê hit位「先知」,敢捌出來tshē毋是...或者是,欲繼續拗--落-去,橫直無成(tsiânn),就當做毋捌講tsit件代誌?

Posted by lausenghian at 23:25回應(0)引用(0)哲學

December 10,2011

《置疑婚姻家庭連續體》摘譯



(第2頁)三十歲一下到,就無一項代誌,會比參加結婚式閣較討厭--ê-ah。參加結婚式比參加葬式閣較礙虐蓋濟佇咧:著包禮、著穿甲真pih-tsah、愛紹介家己、交代最近好--無、愛逐家做伙翕相、愛看愛情宣傳ê短片,閣愛閃避某一寡話題,而且,嘛愛假佯誠心祝福一對多敢會用離婚來收尾ê新人,閣著愛參無啥熟似ê人仝桌食飯食酒,食薰--咧煞愛孤孤單單去外口食。參加葬式加足簡單,只要激一个愛哭面、蝦米腰、去邊--a坐--咧就好勢--ah。(李智良,2008:62)

任何一个捌那滾kiūnn那kā朋友佮厝--裡ê人講咱愛--in,毋過就是無想欲參加in ê結婚式ê queer,攏對心肝底實實知影結婚式牽召ê強迫做干證充滿空間紡koh夯ê動力。強迫做干證毋干焦是講你袂用得缺席,(第3頁)閣較重要--ê是這个原始典型ê操演(prototypical performance)會發動閣較豐沛ê「做干證」ê意義。干證社群ê建構,造tsiânn結婚式:干證噷噷(hm̍h-hm̍h),是恬恬仔容允這个結婚式(咱這馬毋出聲,後日就永遠袂使閣出聲--ah);「咱有在場」這个赤theh-theh、消極tik、有力量毋過煞無自由ê言說行為--拍算特別是hia-ê hōo婚姻體制排斥放逐ê人ê出席--就按呢kā婚姻特權ê正當性做認定,嘛kā伊phôo-thánn--起-來。(Sedgwick,1998:95)

頂懸引--ê兩段文字,一段是亞洲ê作家寫--ê,一段是美國ê學者,毋過in仝時說出一个強迫ê機制,hōo婚禮tsiânn做一款指導ê聖諭(sìng-jū),一款按怎交代過去、現在kiau未來ê軌道佇咧會場內底做監視、控制,袂輸攏總ê人佮婚禮干焦有一種正當ê關係,而且足濟話佇tsia袂講--得。結婚式--裡,新郎新娘講「我願意」,窮實和當事者ê心情意願抑動機無hiah大ê底代,英國ê語言哲學家J. L. Austin捌分析講,這句是操演(performative)句,伊毋是用來「描述」事實,是欲「做tsiânn」事實:你著愛根據這號儀式講出「我願意」,才會當tsiânn這个結婚式。閣來,婚禮和宴會--裡ê人客嘛攏愛做伙kā隨人ê性命參感情狀況攏收收--起-來,操演來做tsiânn結婚式定規ê心情、行為和語言,hông強迫來歡喜做干證。

(第5頁) ...對無仝ê觀點來看,真濟queer認為婚姻是會礙著情慾或者是情感ê表達--ê,各樣ê親密形式才有提供咱追求幸福上好ê試驗。總--是,基本上tsia-ê聲齊(tsiâu)hōo對婚姻聖壇直tsông ê人陣崁過--ah。就準有久長ê批評歷史,和濟mí滿失敗ê證據,婚姻猶原是實現愛情ê金羊毛。(Love, 2008:53)

(第6頁) 無的確就若親像Heather Love講--ê仝款:「婚姻和家庭這種制度上ku怪ê特色,其中ê一項,就是in永永有才調hōo制度--裡佮佇制度外口ê人,攏感覺艱苦罪過(kan-khóo-tsē-kuà)。」(Love, 2007:125-139)。

Posted by lausenghian at 20:21回應(0)引用(0)文化

December 2,2011

閣一款模樣


拜四Siraya語法課,讀著馬太福音第四章,耶穌hōo魔鬼tshuā起lih聖殿頂懸受試,「聖殿」tsit个詞,翻譯者kā翻做「人做敬拜ê kuva」,「kuva」tsit个詞,hām 平平是南島語族ê Cou(鄒)ê「kuba」仝源頭。

Cou ê kuba,是指男子集會所,男子集會所tsit个場所/制度,照老師ê講法,有幾若个台灣ê原住民族採用,比論:Cou、Puyuma(卑南)等等,照文獻,Siraya嘛有tsit个制度。

取tsit个制度ê民族,查埔囡仔若到一个歲數(親像四歲抑六歲),就愛離開老母,去蹛佇集會所內底,過團體生活,佇hia,年歲較濟ê人負責kā in牽教,年歲較少--ê愛順趁,受人差用,等較大漢,有出草成功了後,才有資格娶某生囝。

平平設tsit號制度,有ê集會所並無hōo人一直蹛--hia,毋過親像Siraya tsit款母系社會,查埔人是固定佇集會所徛起--ê,步平並無佮某囝做伙蹛,是有時仔才轉去揣某睏--一-下按呢,著一直到年老(古早三四十歲就算老--ah),才離開集會所,去佮牽手做伙。

Tsit个意思就是:Siraya ê大漢囡仔佮查埔人,是過團體生活,並無親像咱較慣勢按呢,翁佮某、爸母佮囝同徛,tsit世間ê文化多元,佇tsia閣得著一个實例。

接紲躘出玻璃沙漠,補充tsit个例,通(thang)知文化形式、社會制度、家庭組織,並無啥乜「袂改移ê真理」,濟濟社會學家,用一夫一妻、爸母細囝鬥陣來當做一个「正常」ê標準,甚至推(tshui)論講若無按呢,對囡仔ê發展不利,實在是因為in ê淺見、無知,有tsit款想法ê人,敢無欲佮人類學者加交陪--寡,對無仝文化ê內涵佮款式,做較深入ê認捌、了解?

Posted by lausenghian at 10:50回應(7)引用(0)文化
 [1]