2011-11 月份文章 顯示方式:簡文 | 列表

November 23,2011

躘出玻璃沙漠(下pha)


(頂pha佇tsia)

你kám猶kha̍h佇玻璃沙漠?人對你親像咧使兒差kán,愛你按怎穿插,叫你袂使創啥,叫你趕緊去做啥物,行放著親像啥款,毋通變做啥款?

Sian毋通耳空輕,聽人講in有一套無移易ê道理就即時相信。就準是現此時ê基要派,若時間khiú長來看,嘛定定是趨時涉勢爾爾。

舉例來講,目今基督教ê保守派,會使講是tann傳統價值ê守護者,in tsia̍p-tsia̍p kā in所堅持--ê掠做是無綴時代改易ê真理,毋過,翻頭看歷史,咱看--著-ê,煞是另外一个樣相。

In往過捌是君王死忠ê擁護者,壓制君王ê對敵,毋過,今仔日,in講in是民主ê跟綴者;in以早反對避孕,甚至kā掠做是謀殺ê大罪kuà,tann主張講he其實無足要緊;女性佇過去予in當做比男性較低等,毋過人in現此時嘛綴喙咧支持男女平等;烏人做奴ê時代,教會分做兩派,支持奴隸制度ê教會引聖經創世記挪亞酒醉ê 故事,講烏人做奴是上帝ê旨意,廢奴了後,hia-ê教會就攏總恬--去;閣來,新約聖經明明定規查某人著留長頭毛,祈禱佮講道著kā頭殼罩tiâu咧,目今多數ê保守派教會,煞干焦kā tse當做是舊時代特殊ê文化背景,無欲遵守嘛無要無緊;上尾講逐个凡勢對教會歷史--裡ê異端裁判所佮宗教法庭攏有印象,受審了後,hông刣--死或者是活活予火燒--死是定定有ê代誌。教會毋但捌家己執行死刑,佇六○、七○年代hit跤兜,開始沓沓仔有人主張kā死刑廢無,hit當陣濟濟教會徛佇反對廢除死刑hit爿,講he是上帝予統治者ê權力;等廢除死刑tsiânn做世界潮流,變做主流了後,教會都也講píng就píng,引hit仝一本聖經,tann若講著廢sak死刑,大部分ê教會攏會講in自頭就是按呢咧tshiàng明。
...繼續閱讀

Posted by lausenghian at 20:23回應(0)引用(0)哲學

躘出玻璃沙漠(頂pha)


圖書館ê邊--仔是一條鋪石枋ê細條路,路邊ê低樹仔、草仔佮花欉ōm-ōm-ōm,平素時仔若熱--人ê日鬚反照,連玻璃窗仔都tòo一iân青huánn青huánn ê色水,毋過,今仔日uì內底看出去,煞掠準外口咧罩雺,倚近kā看較斟酌--leh,才知是幾若日落大水雨,雨水帶塗沙,kā玻璃噴kah花pa-li-niau,koh看較真--leh,致覺he塗沙ê花草頂頭,另外有黏寡長長、細細片仔ê葉幼仔,內中有「一片」koh頭伸長長,頭殼頂兩枝鬚幌--leh幌--leh,當時仔是刺毛蟲嘛去予風搧起來佇窗仔頂--ah!自按呢,無ti無tang,心情淡薄仔sàm-tām,感覺咱人,kám無親像tsia-ê刺毛蟲?

天已經開--ah,日頭tshiō--lueh,tse玻璃連鞭就會變做通光ê沙漠,hit隻刺毛蟲tham頭骨力趖,煞愈趖愈懸,離伊度活ê水佮草葉ná來ná遠,有影是tsit个環境對伊來講太大太僫得thang理解--ah,除了不管方向koh tshím試koh揣覓,無--者,就干焦會當留佇玻璃頂,等正中晝ê大日虎,kā曝做蟲乾。

毋甘願恬恬曝日hannh--死,愛欲離開tsit片屬佇咱ê世代、咱所佇咧ê所在ê玻璃沙漠,若欲目睭瞌--leh骨力烏白趖,較輸開始kinn絲,歇佇蝶仔蝦內底,發翼股躘飛予家己ê眼界楦闊!等thí翼趨飛ê時,咱自然毋免戇戇仔聽喙,咱會知影慼變,學會曉拄喙,咱無閣乖乖仔順趁,tse毋是單純咧張掇(tiunn-tuah)起khê-khang,是智識,是覺悟,予咱決定欲愛有咱人生ê主權!
...繼續閱讀

Posted by lausenghian at 20:09回應(0)引用(0)哲學

November 21,2011

看你咧kún-tsūn



我了解你無想欲白賊,因為教會教你毋通白賊,毋過,教會家己嘛捌白賊,兩千外冬,白賊攏已經毋知練過幾擺--矣,白賊--ê叫人毋好白賊,按呢,你敢閣hiah要緊白賊?

我知影你無想欲白賊,你講聖經內底愛人袂使白賊,總--是,聖經內底嘛講王是上帝所差,毋通反抗,你煞為著王權hông揠倒,民主建立咧拍pho̍k仔;聖經敢無講做奴--ê著好好仔盡奴才ê本份,你煞講奴隸受㪗放是大進步。

你敢無讀著聖經講查埔人是頭,較贏查某,講查埔人毋是為查某人來創造,顛倒查某人是為著查埔人來創造,毋但按呢,為著欲予查某人降服,in攏著留長頭毛,而且愛罩紗仔巾,通做in順趁查埔人佮上帝ê記認.....你敢無讀--著,抑是你對教示就親像食食(tsia̍h-si̍t),食欲揀食,讀聖經嘛會揀讀?

我毋是愛你gâu講白賊,我是欲講,若欲「揀讀」,按呢毋就斟酌「揀」。閣有,若一項教示變甲hiah死性,你想,按呢人講he是真理到底有偌濟可能性?兩千外冬--矣,教會直直修改in對聖經ê解說,而且現此時ê教會,佗一間無咧掠話頭、斬(tsánn)話尾,你煞猶hiah條直,共聖經內底ê字句,當做無通推(tshiu)tshiâu ê戒律,tsit款ê信仰,想予透徹,是真,抑是假--咧?

Posted by lausenghian at 18:23回應(2)引用(0)罔話

November 14,2011

老,就厚症頭


當原初發覺講,對蹛ê所在行去學校,愛行三、四十分ê時,就決定欲牽一隻鐵馬來騎--ah,雖罔佇台北讀冊ê時,不管時嘛行欲一點鐘對學校轉厝,毋過,he究真是欲倒--去,無趕時間,若是欲去上課,上好時間掠較ân--leh,有伸勼較妥當。

閣再講,竹塹不比台北,佇台北行路來去轉,規tsuā路有人行道,倚車頭有地下街,行--起-來加真放心,若tsia--leh,光復路一段接二段hia,著tshua̍h對高速公路下跤過,經過兩个交流道,車濟無--打-緊,幾若百公尺hiah長,煞無人行道通行,幾若十冬--ah,咱毋知新竹市政府心內咧想啥,均屬咱都毋是在地--ê,貧惰去捶烏豆,行路無利便,咱就踏tōng輪。

學校對面hit間今年才收--起-來ê店,網路頂評價蓋bái,毋過,tann tsit台車就是佇hia牽--ê,hit當陣頭家娘姑情(koo-tsiânn)我買新車,我驚拍毋見,無愛,伊自按呢kā tsit隻人寄賣--ê賣--我,俗是有較俗--lah!而且,舊漚舊相(siùnn),有影袂驚人愛póo--去,就是無想著講,車佮人仝款,老,就厚症頭。

Tsit幾月日,調擋仔無算,干焦換部品,就有勾齒仔(『飛輪』)、鏈仔、一條擋仔內線,共總開六百箍,斟酌kā想,都強欲是買tsit隻車ê價數--ah!按呢,kám有khah省?

今仔早起,騎入去學校,來佇欲起lih人社院ê長崎,變速馬仔切--lueh,煞規个踏空--去,試幾若擺,攏切袂過,無ta-uâ,落車牽上崎...ná牽ná ka̍uh-ka̍uh唸:「Kán!Koh來teh討數--ah...」等e-poo四點外,刁工較早離開圖書館,欲牽去修理,伊煞koh好好,袂輸早起ê代誌自來毋捌發生...

Tsit隻漚古車lī-leh,有影,老,就厚症頭!

Posted by lausenghian at 18:21回應(0)引用(0)罔話

November 13,2011

The Invention of Lying



暗時看HBO ê The Invention of Lying,一齣蓋gâu訕削ê影戲,就親像有人佇網路頂所講--ê,tsit齣電影主要予咱思考兩點:第一、有白賊ê世界檢采無比無白賊ê世界較bái;第二、編劇佮監督(導演)kā宗教洗面,嘛用戲文kā宗教ê源起頭甚至教主khe kah。關係第二點我就無beh講--ah,橫直我tsit兩三冬對宗教ê批評真濟,人in用he摳洗ê手路,比咱ke真高明佇咧...

關係第一點,較無看著討論嘛較心適ê位仔,是編劇上無透過兩个所在teh點tuh講白賊嘛愛有撙節。故事ê主人家Mark有兩擺機會,會當靠白賊來予伊心愛ê查某囡仔佮伊結婚,總是伊無,一擺是查某囡仔問伊:「有錢koh出名敢就會當改變基因?」閣一擺是佇結婚式內底,逐个問伊講天頂彼个人敢有指示伊佮意ê查某囡仔愛嫁予啥人,伊煞攏無白賊。第一擺無白賊,是因為伊知影白賊無法度改變後--來會發生ê代誌,親像基因遺傳、囝種老爸tsit款;第二擺無講白賊ê起致,戲內底無做交代。毋過,咱約其略臆有伊ê意思:「咱人有愛另外一个人--無,是無法度用“要求”用“命令”--ê。」簡單講,就是Mark伊相信愛情,伊beh愛hit个查某囡仔家已beh愛--伊,毋是因為「某mih款權威」ê關係決定beh嫁--伊。

毋過,咱看tsit齣活動寫真內底關係揀對象tsit件代誌,編劇ná親像無足了解「一般」社會上女性ê想法.....咱提異性戀來討論,對「一般」ê男性來講,確實是親像戲內底按呢,真注重女性ê外表,tse通對基因選擇演化優勢ê角度來分拆,tsit號情況,嘛是自古早就有ê趨勢;總--是,「一般」女性--leh,in要意--ê應該毋是外表/基因,是經濟能力佮社會地位,咱知tse嘛是自古早就按呢--ah。人類學者講tse是因為考慮著beh得著khah濟資源,通利益囡兒佮本身來設想--ê。我想,編劇若有接觸著人類學抑社會學ê研究,就袂kā男婦老幼選擇對象ê觀念規个攏硩佇基因tsit孤一个觀點來看--ah,按呢,會予tsit齣戲閣較符合人類社會ê現實。

Posted by lausenghian at 22:18回應(0)引用(0)電影

熱--人ê衫仔裾



毋但(m̄-nā)一擺佇路--裡看著tsit塊牌仔--ah,會有印象,是因為tsit塊公家單位ê牌仔kōo台語寫講「真歹勢!」我咧臆tsit款公家ê告示牌,檢采揣無第二塊。

Hit工閣搪--著,緊kā翕--落-來。

今仔日閣看著tsit張相,心內數念--ê,毋是頂懸ê台文,是hit个下晡光huánn-huánn ê日頭光,kap燒lō會流汗ê樂暢。

毋知是按怎,一直感覺今年ê熱--人走著特別緊,無ta-uâ,kan-tann會當佇記持--裡去tsang熱--人ê衫仔裾(ki)。

「莫(mài)走--啦!心愛--ê...」

Posted by lausenghian at 13:34回應(3)引用(0)罔話

November 10,2011

雨落tsiah-nī粗



竹塹ê風真透,有時仔無張無持透方時風(png-sî-hong),會乞予吹一下khí-moo蓋bái;毋過,竹塹ê雨比--起-來就無hiah-nī厚,平平佇北部,定定是台北咧落雨,若來佇竹塹,極加烏陰,有時仔出日都有,總講就是tsia袂親像台北不三時都浸踮雨--裡。

是講tsit幾工ê雨竹塹閃無離,一个朋友講,伊佇竹塹讀大學讀四冬,研究所讀冬外--ah,上知影tsia ê天時,若連竹塹都落雨,台灣別所在定著愛落。

我討厭落雨,嘛討厭寒--人,tann,tsit兩項煞kap-kap做伙,是精差溫度猶佇二十度tsit跤兜,無講tsiânn實寒甲佗位--去。

欲暗仔下課,因為鐵馬前輪ê擋仔害--去,孤不將著騎欲半點鐘去修理,可憐學校對面ê店仔前一站仔倒--去,見若欲修理車,攏愛騎tsiah遠,干干仔雨落袂停,等車創好勢,轉--來ê路--裡,閣落甲不止仔粗,出力lop tsiūnn光復路ê長崎,ná lop ná大喙喘氣,雨潑佇面--裡,雨水走入去鼻空,淡薄仔滲入去肺管,以早泅水ê記持雄雄對頭殼底浮--起-來,當時仔騎鐵馬ê感覺會佮泅水tsiah-nī成hannh.....

Posted by lausenghian at 23:15回應(0)引用(0)罔話

November 3,2011

啥號做物化


Tsit个問題我想蓋久--ah,想罔想,to嘛hênn--leh,無頂真hiau資料來看,也tann干焦會當小喋--一-下,檢采無法度深入,閣內容有濟濟誤tânn也kú-kánn。

毋知tī時開始,不時聽著人kōo「物化」tsit个詞teh做評論,比論in會講透過有肉tshài ê查某囡仔teh tshui銷物件,是kā女體物化;嘛有人講性工作者出賣身體來tsuán食,是kā尊貴ê身軀kap人格物化,一來二去,若照我個人ê解讀,tsia-ê講法ná親像攏牽涉著kā「身體」用做商業行為kap趁食ê家私,設使我tsit款理解無問題,按呢,我煞感覺不止仔疑ngā,想來去倒,想無thang tháu--neh。

咱束結來講:「佇tsit个時代,咱隨人ê身軀,beh按怎有可能mài去hām商業行為kap趁食sio牽連?」就準咱毋是汽車展覽、3C展覽ê show girl,就準咱毋是性工作者,咱kám就無用咱ê身軀teh趁錢?咱ê身軀kán攏參商業行為斷半參tshap?

Beh thài-ē有可能hannh!佇tsit个工商發展ê資本主義社會--裡,啥人有才調家己種作家己食,家己起厝家己蹛,規个hōo工作ê本身參個人ê實際需要sann結合,thang uì tsit款工作hām人本身脫節、顛倒參金錢勾連ê中間脫走--leh?咱出賣家己ê時間、體力、心神,就是beh愛幾萬箍仔ê月給,thang去換食食(tsia̍h-si̍t)、衫仔褲、徛起ê所在、kap做藝量ê項mi̍h,咱佇工課路內底,看頂司使(sái)兒差kán,有時仔閣著予客戶抑頭家倒摳正削,閣較是咒khàng lé罵,咱攏恬恬仔吞忍,身體流汗按怎忝頭不論,心內流血人格受傷不管,想較真--leh,kám有影有比現身軀予人看ê show girl抑是出賣身體ê性工作者較高尚?Kám tsiânn實按呢就較有贏面?若有,請恁kā我拆白!

當然,咱人類ê社會行甲tsit个坎站,無啥可能目一nih變做規个無仝ê款式,也我講頂懸tsia-ê代誌,毋是beh講予恁逐个刺鑿,嘛毋是beh使唆恁peh起來kap啥人捙拚,我beh講--ê,獨獨是:既(kah)若社會有階級ê精差,既若專業分工已經tsiânn做事實,既若金錢已經變做社會運作無法度缺欠ê媒體,咱啥人有才調予家己ê身軀、人格參靈魂對頭到尾自由、自主,毋免為著生存來委屈家己(出賣身體、加加減減人格受損斷)?咱啥人有法度予工作佮本身ê需要完全結合,拒絕金錢介入造成「異化」?假使咱頭前tsit幾个「基本目標」to做袂到,按呢,咱beh用「物化」來評論啥人、啥貨抑啥款頭路ê時,kám無beh先想看咱規年thàng天是為啥mih teh流汗,三不五時氣身惱命有啥mih款ê因端?咱,kám tsāi-tsuí無為著生存,向某mih寡人出賣一部份ê「家己」?若beh kā人戴「物化」ê帽仔,凡勢愛先留一頂予家己,kám毋是?

Posted by lausenghian at 19:17回應(1)引用(0)哲學
 [1]